Dual PanelSahap ni si Job na Parpudi: Seng Dong Pangarapan bani Halak Parjahat
1Dob ai inunut si Job ma mangkatahon hatani, nini ma,
2“Songon sintongni manggoluh Naibata, na mambuat humbangku hapintoronku, Pargogoh Na So Tarimbang in, na mambahen paet tonduyhu,
3sadokah ibagas ahu ope hosahku, anjaha hosah na humbani Naibata ibagas igungku,
4seng anjai bibir ni pamanganku mangkatahon na so tongon, barang pamanganku pe mangkatahon sipaoto-oto.
5Antigan pe lang ra ahu mangkatahon paboa sintong hanima; ronsi matei ahu hupartahankon, paboa seng dong salahku.
6Poltik do hujolom hapintoronku, seng paluahonku ai; seng pala isolsoli uhurhu ahu age sada, pasal ari-ari ni goluhku.
7Songon na bani halak parjahat ma namin mangonai bani munsuhku, anjaha songon bani halak pargeduk ia imbangku.
8Ai aha ma pangarapan ni halak parjahat, anggo itarik Naibata hosahni?
9Tumaram ma tangihonon ni Naibata doruh-doruhni, anggo roh hasosakan bani?
10Mintor boi ma ia marmalas ni uhur mangidah Pargogoh Na So Tarimbang in? Mintor tarbahensi ma tongtong martonggo bani Naibata?
11Ahu ma mangajari hanima pasal pambahenan ni Naibata; seng ponopkononku bannima sura-sura ni Pargogoh Na So Tarimbang in.
12Hanima pe namin domma ididah hanima sandiri ai. mase ma sai inunut hanima mangkatahon na soya-soya?
13On do rupei na pinatongon ni Naibata bani jolma parjahat, ampa tean-teanan na jinalo ni halak siunsagahkon gogoh humbani Naibata.
14Anggo tambah dakdanakni, panganon ni podang do ai, anjaha ginomparni hurangan sipanganon.
15Simasimani na tading ai buaton ni sampar do, anjaha seng tangisan ni na mangkabaluhon sidea ai sidea.
16Ipagukguk pe pirak songon orbuk bueini, anjaha ipatumpu pe pakeian songon tanoh halampung bahatni,
17ipatumpu do tongon, tapi halak parpintor do na marhiouhon ai, anjaha halak na so marpipot marbagi pirakni.
18Rumahni ipauli doskon rumah ni lawah-lawah, songon sopo-sopo, na pinauli ni halak parjaga.
19Bayak do ia laho modom, tapi seng tarulakisi be, ipabodak matani, hape aha pe seng dong be.
20Songgot-songgot do mandorabsi songon bah marbanggal, anjaha halisungsung manluahonsi borngin.
21Habahaba na hun purba do mamboansi, anjaha ipurpurhon ia daoh humbani iananni.
22Seng maralang-alang ipanahkon Naibata sior-Ni bani, maningon podas ia maporus manlembangi tangan-Ni.
23Martopap tangan ma halak halanisi, anjaha marsiul-siul halak humpudini.”