Dual PanelSahap ni si Elihu na Parlobei: Seng Tahan be Ia Sip
1Dob ai maronti ma sitolu halak ai marsahap pakon si Job, halani sai ipintori dirini.
2Jadi gajag ma ringis ni si Elihu, anak ni si Barakel, halak Busi ai, humbani ginompar ni si Ram; manringis tumang do ia bani si Job, halani sai ipintori dirini i lobei ni Naibata.
3Manringis homa do ia bani huan-kuan ni si Job sitolu halak ai, halani seng tarbalosi sidea si Job, age pe domma ipatorang sidea parsalah do si Job.
4Ai domma ngolngolan hinan si Elihu laho mangkatahon hatani hubani si Job, halani torasan halak ai humbani.
5Tapi dob ididah si Elihu lang tarbalosi sitolu halak ai si Job, manringis tumang ma ia.
6Dob ai nini si Elihu, anak ni si Barakel, halak Busi ai ma Mambalosi, “Poso ope namin ahu, tapi nasiam domma ubanon, halani ai malang anjaha mabiar do ahu patorangkon pingkiranku bani nasiam.
7Ningku ibagas uhurhu, ʻNa matua ma lobei mangkatahon hatani, anjaha sigijangan umurni mangajarhon hapentaran.
8Tapi tonduy na ibagas jolma in, ai ma hosah ni Pargogoh Na So Tarimbang in, ai ma mambere pangarusion bani.
9Seng sai halak na matua tong sipentaran, anjaha seng halak na ubanon tong na mambotoh na sintong.ʼ
10Halani ai do ase huhatahon, ʻTangar nasiam ma ahu, sihol do homa patugahonku hapentaranku.
11Tonggor ma, domma ngolngolan ahu paima-imahon hata nasiam, sai hupatangi-tangi do sipaingat nasiam, paima jumpah nasiam balos na hona.
12Huparimbagaskon do namin hata nasiam ai, hape, tonggor ma, seng dong na mantaluhon si Job, seng dong humbani nasiam, na mambalosi hatani.
13Ulang ma ninuhur nasiam, domma jumpah hanami hapentaran; Naibata ma na manaluhonsi, jolma seng mangasup.
14Seng dompak ahu hatani na hinatahonni ai, anjaha seng marhitei sahap nasiam ai ia balosanku.
15Domma humationg, seng tarbahen be marbalos, domma jut sidea mangkatahon sihatahononni.
16Mintor soh ma ahu, halani na so marsahap ai be sidea, halani na jonong ai sidea jongjong, lang marbalos?
17Ahu pe sihol marbalos do, ahu pe sihol do patugahonku pingkiranku.
18Ai domma gok bangku sahap, sai iajar tonduy na ibagas ahu do ahu.
19Tonggor ma, doskon anggur na so binuha do tontonku, doskon gusi bobak na baru na sihol pultak.
20Halani ai maningon marsahap do ahu, ase luas huahap, maningon buhaanku do bibirhu laho marbalos.
21Seng martonggor jumbak ahu, barang sihol mamuji-muji atap ise.
22Ai seng hubotoh naha palemes-lemes parsahapan, halani anggo sonai, tontu podas do ahu masab ibahen Sitompa ahu.”