Dual PanelIsambat si Elihu Parsahapanni:; Bagei-bagei do Dalan ni Naibata Marsahapkon Jolma
1“Tapi, tangar ham ma sahapkon, ale Job, bogei ma ganup hatangku!
2Tonggor ma, domma huungkab pamanganku, domma marsahap dilahku ibagas pamanganku.
3Humbani bujur ni uhurhu do huhatahon hatangkon, anjaha torang patugahon ni bibirhu parbinotohan.
4Tonduy ni Naibata do na dob manjadihon ahu, anjaha hosah ni Pargogoh Na So Tarimbang do pagoluhkon ahu.
5Anggo boi ibahen ham, balosi ham ma ahu; dear ma balosi ham ahu, marugas ma ham.
6Tonggor ma, songon ahu sonai do ham i lobei-lobei ni Naibata, ahu pe humbani sangkimpal tanoh halampung do ijadihon.
7Tonggor ma, ulang pala mabiar ham mangidah ahu, seng borat pangodohkonku bamu.
8Nimu nongkan hubogei, anjaha sora ni hatamu hutangar,
9ʻBorsih do ahu, seng marpipot; pitah do ahu, anjaha seng dong hajahaton ibagas diringku.
10Tonggor ma, na mangindahi sindir do Ia dompak ahu, munsuh-Ni do ahu ihira.
11Inahkon do naheihu hubagas bayangan, anjaha itulimati do ganup dalanku.ʼ
12Tonggor ma, ibagas on ma lang bujur ham, ai ma balopku bamu. Banggalan do Naibata ase jolma.
13Mase ma marhutuk ham dompak-Si, nimu, ʻSada pe lang humbani hatangkai na ibalosi!ʼ
14Ia Naibata, tongon marsahap do Ia sahali dua hali, seng iparimbagaskon jolma.
15Marhitei nipi, marhitei panonggoran borngin, sanggah renges jolma modom, sanggah modom-modom bani podomanni,
16ijai do iungkab pinggol ni jolma, anjaha ihirjati sidea marhitei lumba-lumba-Ni,
17laho paholangkon jolma humbani hasalahan, laho manjora jolma humbani pangenjengon,
18laho paluahkon tonduyni humbani tanoman, anjaha goluhni ulang magou ibahen podang.
19Ambahni ai ipalumba do ia marhitei naborit sanggah tibal bani podomanni, sanggah maborit iahap das ronsi holiholini.
20Pala gineian iahap mangidah sipanganon, anjaha sobalan ia bani sipanganon harosuhni hinan.
21Marherut sibukni, seng haidahon be, anjaha holiholini, na so taridah hinan, boi bilangan.
22Dohor-dohor mando hosahni hu tanoman, anjaha goluhni bani malekat pamunuh.
23Porini adong hasomanni sada malekat, pangapiti, sada humbani na saribu, na patorangkon bani jolma ai ukumanni,
24jadi maidop ma uhur-Ni bani, anjaha hatahonon-Ni ma, ʻTobus ma ia, ase ulang tuad ia hu tanoman, ai domma jumpah Ahu tobus ni tonduyni,
25jadi suang ma jorgit angkulani lobih humbani haposoonni hinan; mulak poso ma ia.ʼ
26Martonggo ma ia bani Naibata, jadi balosan ni Naibata ma ia; pataridahkonon-Ni ma bani bohi-Ni ibagas malas uhur, anjaha pasuangon-Ni ma hapintoron-Ni hubani jolma.
27Jadi mandoding-doding ma ia i lobei ni jolma, nini ma, “Domma mardousa ahu, anjaha hupapeol uhum, tapi seng hona balos ai bangku.
28Ipaluah do tonduyhu, ase ulang tuad hu tanoman, anjaha marmalas uhur goluhku mangidah haliharon.ʼ
29Tonggor ma, ganup na sonai ai, ibahen Naibata, dua barang tolu hali bani jolma manisia,
30laho mamboan tonduyni mulak humbani tanoman, ase marmalas uhur ia ibagas sinalsal ni hagoluhan on.
31Parimbagaskon ham ma on, ale Job, tangihon ham ma ahu! Sip ma ham, ase hutoruskon mangkatahon hatangku.
32Anggo adong ope sihatahononmu, bere ham ma balosmu bangku; marsahap ma ham, ai isura uhurhu do mamintori ham.
33Tapi anggo seng dong be, tangar ham ma ahu; sip ma ham, ase huajarhon bamu hapentaran.”