Dual PanelIpaunduk si Job Uhur ni i Lobei ni Naibata
1Dob ai marsahap ma Jahowa hubani si Job,
2“Sihol do partinggilhonon ni halak siparhutuk, Pargogoh Na So Tarimbang in? Ibalosi siaduhon Naibata in ma on?”
3Dob ai nini si Job ma mambalosi Jahowa,
4“Aha pe lang ahu; naha ma ningku mambalosi Ham? Hututup ma gelah pamanganku bani tanganku.
5Domma marsahap ahu sahali, seng ulakanku be ai; dua hali tene, tapi seng nunutonku be ai.”
Sambat ni Parsahapan ni Naibata; Pargogoh Na So Tarimbang do Naibata
6Dob ai roh ma balos ni Jahowa hubani si Job humbani habahaba, nini ma,
7“Gonditi ma binongeimu songon dalahi; adong do sungkunon-Ku bam, anjaha patorang ma hu Bangku.
8Sihol parsedaonmu do uhum-Hu? Sihol salahkononmu do Ahu ase pintor ho?
9Ai partangan songon tangan ni Naibata do ho? Mintor tarbahen ho ma marsora longgur songon-Si?
10Pajagar ma dirimu marhitei hamuliaon ampa hatimbulon, marhiou hatunggungon ampa hasangapon ma ho.
11Pataridahkon ma gajag ni ringismu, pardiatei ma haganup sigijang maruhur anjaha patoruh ma ai.
12Kawahkon ma ganup halak na jungkat maruhur anjaha patunduk ma ai, anjaha lotloti ma halak parjahat bani iananni.
13Ponopkon ma sidea hubagas orbuk, anjaha tambatkon ma bohi ni sidea bani ianan na ponop.
14Jadi dihut ma Ahu homa mamuji ho, halani tangan siamunmu sandiri mambere hamonangan bam.
Biak ni Huda Nil
15Tonggor ma huda Nil, na hujadihon songon panjadihon-Ku bam; poyon-poyon do igagat usih songon lombu.
16Tonggor ma, ibagas binongeini do hagogohonni, anjaha ibagas urat-urat ni boltokni do habetengonni.
17Boi do ibahen gonggong ihurni songon hayu ares, anjaha mardandan do urat-urat ni hae-haeni.
18Songon pipa tombaga do holiholini, anjaha gorini songon balok bosi.
19Ia do jadi-jadian ni Naibata na parlobei, na jinadihon-Ni gabe raja i tongah-tongah ni hasomanni.
20Dolog do panampalan bani, ianan ni binatang-binatang marguro-guro.
21I toruh ni batang ni hayu na marbunga do ia rosuh marlinggom, marponop i tongah-tongah ni arung-arung ampa paya-paya.
22Batang ni hayu na marbunga do manlinggomisi, anjaha bulung ni tolong do manrungkubsi.
23Marbanggal pe bah seng gobir ia, totap do uhurni age pe roh bah ansa banggal ni Jordan mandorabsi.
24Ise ma na boi manangkapsi hun lobeini? Barang mannahkon halihir hubagas igungni?