Dual PanelHona Uhum Bangsa na Marungut-ungut
1Dob ai ipagogoh bangsa ai ma sorani; mandoruhi ma bangsa ai bornginni ai.
2Marungut-ungut ma ganup halak Israel dompak si Musa ampa dompak si Aron; nini ganup tumpuan ai ma hubani sidea, “Ambit matei ma namin hanami i tanoh Masir. Ambit matei ma namin hanami i halimisan on.
3Mase ma iarahkon Jahowa hanami hu tanoh on, ase matei hanami bahenon ni podang, ase parinangonnami pakon dakdanaknami gabe taban-taban? Ai lang dearan hanami mulak hu Masir?
4Nini sidea ma samah sidea, ʻAngkat hita ma sada pambobai, ase mulak hita hu Masir!ʼ”
5Dob ai marrogop ma si Musa pakon si Aron hu tanoh i lobei ni ganup tumpuan ni halak Israel.
6Tapi anggo si Josua, anak ni si Nun pakon si Kaleb, anak ni si Jepunne, na dihut mangkahapi tanoh ai, irigati sidea ma hiou ni sidea bei.
7Nini sidea ma hubani ganup tumpuan ni halak Israel, “Ia tanoh na dob ibontas, anjaha na ikahapi hanami ai, tanoh na dear tumang do ai.
8Anggo marosuh Jahowa mangidah hita, boanon-Ni do hita masuk hu tanoh ai, anjaha bereon-Ni do ai hu banta, tanoh habaoran ni dadih pakon manisan ni lobah ai.
9Tapi seng bulih manrusuhi nasiam dompak Jahowa, anjaha seng bulih gobir mangidah bangsa na i nagori ai, ai hira ruti do sidea bondutonta, domma surut pangondingi humbani sidea, tapi Jahowa do hasomanta, ulang ma habiari nasiam sidea.”
10Jadi sahata ma ganup tumpuan ai margijig sidea bani batu. Tapi marsinalsal ma hamuliaon ni Jahowa ibagas lampolampo partumpuan ai hubani ganup halak Israel.
11Nini Jahowa ma hubani si Musa, “Sadia dokah on apasan ni bangsa on Ahu? Sadia dokah on seng ra sidea porsaya Bangku age pe domma buei tanda Hubahen i tongah-tongah ni sidea?
12Papaan-Ku ma sidea marhitei sampar anjaha siapkonon-Ku ma sidea, tapi Hubahen pe ho gabe sada bangsa banggalan anjaha gogohan humbani sidea.”
13Dob ai nini si Musa ma hubani Jahowa, “Bogeion ni halak Masir ma barita ai. Domma iarahkon Ham bangsa on luar hun tongah-tongah ni sidea marhitei hagogohon-Mu.
14Patugahon ni sidea ma hata ai hubani pangisi ni tanoh on, na dob mambogei homa, Ham i tongah-tongah ni bangsa on, domma pala dumpar bohi bei, ididah ale Jahowa, anjaha hombun-Mu jongjong i babou ni sidea, anjaha Ham mardalan i lobei ni sidea marhitei hombun na jongjong ai arian, anjaha marhitei apuy na jongjong ia borngin.
15Anggo ibunuh Ham sonari bangsa on, songon na mambunuh sahalak jolma, jadi hatahonon ni bangsa na mambogei ai ma,
16ʻHalani na so tuk do gogoh ni Jahowa mangarahkon bangsa on hu tanoh na dob binulawankon-Ni berehonon-Ni hubani sidea, mambahen na isiapkon sidea i halimisan.ʼ
17Sonari pe, sai marmulia ma gogoh ni Tuhan in songon na dob binagahkon-Mu, ai nimu do,
18ʻLumbang do uhur ni Jahowa anjaha paridop ni uhur banggal, marpangulaki do uhur-Ni mangidah hajahaton pakon panlanggaron, tapi seng palopason-Ni maluah humbani uhum anggo halak parsalah, sai balaskonon-Ni do hajahaton ni sagala bapa hubani anakni ronsi sundut patoluhon pakon paompatkon.ʼ
19Marpangulaki ma uhur-Mu mangidah hajahaton ni bangsa on, romban hubani hinabuei ni idop ni uhur-Mu, anjaha romban hubani parontou ni uhur-Mu mangidah bangsa on singgan Masir nari ronsi nuan.”
20Dob ai nini Jahowa ma, “Domma marpangulaki uhur-Hu halani pangindoanmai.
21Tapi tene, songon sintongni manggoluh Ahu, maningon gok hamuliaon ni Jahowa magira sab dunia on,
22ise pe lang humbani dalahi in, na dob mangidah hamuliaon-Ku pakon tanda na Hubahen i Masir pakon i halimisan, hape domma pala sapuluh hali ilajou sidea Ahu, anjaha lang itangihon sidea sorang-Ku,
23seng bulih mangidah tanoh, na dob Hubulawankon hubani ompung ni sidea, ganup tene na dob mangapasi Ahu, seng bulih mangidah tanoh ai.
24Tapi anggo juakjuak-Ku si Kaleb, halani maruhur na legan ia anjaha gok uhurni mangirikkon Ahu, boanon-Ku do ia masuk hu tanoh na dob niebatanni ai, anjaha ginomparni manean ai.”
25Tapi anggo halak Amalek pakon halak Kanaan marianan do i habungan ai; halani ai bingkat ma hanima patar, mulak hu halimisan bani dalan laho hu Laut Sigerger.
26Dob ai nini Jahowa ma hubani si Musa pakon si Aron,
27“Sadia dokah on sai marungut-unguti bangsa na jahat on dompak Ahu? Domma Hubogei ungut-ungut ni bangsa Israel, sagala na niungut-ungutkon ni sidea dompak Ahu.
28Hatahon ma hubani sidea, ʻSongon sintongni manggoluh Ahu,ʼ nini Jahowa, ʻManingon bahenon-Ku do bennima songon na hinatahonnima ibogei pinggol-Hu.
29Maningon martibalan do bangkeinima i halimisan on, anjaha haganup hanima na dob tarbilang ai, marguru hubani haganup bilanganni ai, singgan ni na marumur dua puluh tahun pakon i atas ni ai, sagala na marungut-ungut dompak Ahu,
30seng bulih age sada humbennima masuk hu tanoh na dob Hubulawankon, na gabe ianannima namin, sobali si Kaleb, anak ni si Jepunne pakon si Josua, anak ni si Nun.
31Tapi anggo dakdanaknima, na hinatahonnima, sitabanon ma in, arahkonon-Ku do sidea masuk, ase itanda sidea tanoh na tineoskon ni uhurnima.ʼ
32Tapi anggo bangkeinima sandiri, maningon martibalan do i halimisan on.
33Anjaha anaknima maningon gabe parmahan do i halimisan on ompat puluh tahun dokahni, ase marsapata hubani sidea pangelukonnima in, paima bois martibalan bangkeinima i halimisan on.
34Domu hubani bilangan ni ari pangkahapinima bani tanoh ai, ai ma ompat puluh ari, na sadari gabe satahun, maningon ompat puluh tahun ma manginsonoh hajahatonnima ai bennima, ase iahap hanima sogam ni uhur-Hu.
35Ahu Jahowa tene na dob mangkatahon in, maningon sonin bahenon-Ku hubani ganup tumpuan na jahat on, na martumpu mangimbang Ahu; maningon i halimisan on bois sidea, anjaha ijon sidea marmateian.”
36Jadi dalahi na sinuruh ni si Musa mangkahapi tanoh ai, anjaha na mulak use, na mambahen marungut-ungut ganup tumpuan ai hu bani, marhitei na pararat barita na bajan pasal tanoh ai,
37marmateian ma tongon dalahi ai, na pararatkon barita na bajan ai pasal tanoh ai, hona papa i lobei ni Jahowa.
38Tapi anggo si Josua, anak ni si Nun pakon si Kaleb, anak ni si Jepunne manggoluh do tading humbani dalahi na laho mangkahapi tanoh ai.
Talu Bangsa Israel Ibahen Munsuhni
39Dob ai ipadas si Musa ma hata ai hubani ganup halak Israel, gabe pusok tumang ma uhur ni bangsa ai.
40Dob ai ipagirah sidea ma sogod laho anjaha tangkog ma sidea hu pakpak ni dolog ai, nini ma, “Tonggor ma, ijon do hanami sihol tangkog hu ianan na dob binagahkon ni Jahowa hinan, ai domma mardousa hanami.”
41Tapi nini si Musa ma, “Mase ma sonin panlaosinima bani parentah ni Jahowa? Seng anjai monang nasiam.
42Ulang ma nasiam tangkog, ai lang i tongah-tongah nasiam Jahowa, ase ulang talu nasiam i lobei ni munsuh nasiam.
43Ai halak Amalek pakon halak Kanaan do ijai i lobei nasiam, gabe marrageian holi nasiam bahenon ni podang, ai halani na dob itundali nasiam Jahowa, seng anjai hasomanan ni Jahowa nasiam.”
44Tapi iutuskon sidea do tangkog hu pakpak ni dolog ai halani hengkeng ni uhurni, age pe lang meret poti parpadanan ni Jahowa pakon si Musa hun tongah-tongah ni parsaranan ai.
45Jadi tuad ma halak Amalek pakon halak Kanan, na marianan i atas dolog ai, lanjar italuhon anjaha ipardakdak ma sidea das hu Horma.