Dual PanelPanjahaion ni si Bileam na Parlobei Pasal Israel
1Dob ai nini si Bileam ma hubani si Balak, “Pajongjong ma bangku ijon pitu anjapanjap, anjaha pasirsir ma bangku ijon pitu lombu pakon pitu biribiri tunggal.”
2Jadi ibahen si Balak ma romban hubani hata ni si Bileam; jadi igalangkon si Balak pakon si Bileam ma sada lombu pakon sada biribiri tunggal i atasni ganup anjapanjap ai.
3Dob ai nini si Bileam ma hubani si Balak, “Padohor ma jongjong hulambung ni galangan situtungon in, ase laho ahu, andohar ialo-alo Jahowa ahu; anjaha hata na ija pinatalar-Ni bangku, ai do patugahonku bamu.” Dob ai laho ma ia hu sada buntu-buntu na leseng.
4Dob ai pajumpah ma Naibata pakon si Bileam, jadi nini si Bileam ma, “Domma pala hupajongjong pitu anjapanjap anjaha hugalangkon sada lombu pakon sada biribiri tunggal bani ganup anjapanjap ai.”
5Dob ai inahkon Jahowa ma sada hata hu pamangan ni si Bileam, anjaha nini ma, “Mulak ma ho hubani si Balak, anjaha sonon do hatahononmu.”
6Jadi dob mulak ia hubani raja ai, tonggor ma, jongjong ope ia i lambung ni galangan situtungon ai rap pakon ganup kopala-kopala ni Moab.
7Dob ai ipungkah si Bileam ma marsahap, nini ma, “Hun Aram ialopi si Balak, raja ni Moab ahu, humbani dolog na hampit hapoltakan, ʻRoh ma ham, burai ma si Jakob bangku, roh ma ham, papai ma Israel!ʼ
8Naha ma tarbuari ahu na so binuraan ni Naibata? Naha ma tarpapai ahu na so pinapaan ni Naibata?
9Ai hun pakpak ni dolog huidah ia, hun buntu-buntu hutatap ia. Tonggor ma, sada bangsa na pulou marianan, anjaha na so masuk bilangan i tongah-tongah ni bangsa sipajuh begu-begu.
10Ise ma na boi mamilangi orbuk ni Jakob, barang na marribu-ribu humbani Israel? Songon parmatei ni parpintor ma namin parmateihu, anjaha ajalhu songon ajalni ai ma namin.”
11Dob ai nini si Balak ma hubani si Bileam, “Ai aha do na binahenmu on bangku? Laho mamurai munsuhku do mambahen na husuruh mangalopi ham, hape tonggor ma, sai inunut ham do mamasu-masu sidea.”
12Nini si Bileam ma mambalosi, “Ai lang maningon dingaton ni uhurhu do hata na ninahkon ni Jahowa hubagas pamanganku laho mangkatahon?”
Panjahaionni na Paduahon
13Dob ai nini si Balak ma hu bani, “Eta ma hita laho bani ianan na legan, ase boi tataponmu sidea hunjai; pitah sidohoranni ope humbani sidea na nididahmu ai, seng ganup sidea ope na nididahmu ai; jadi burai ham ma sidea bangku hunjai.”
14Dob ai iarahkon ma ia hu ladang Zofrim, hu pakpak ni Pisga, anjaha ipajongjong ma use pitu anjapanjap, anjaha igalangkon sada lombu pakon sada biribiri tunggal bani ganup anjapanjap ai.
15Nini si Bileam ma hubani si Balak, “Padohor ham ma jongjong hujon, hu lambung ni galangan situtungon on, laho ma anggo ahu hujai mangalo-alo Jahowa.”
16Dob ai pajumpah ma Jahowa pakon si Bileam, anjaha inahkon ma hata-Ni hubagas pamanganni, anjaha nini ma, “Mulak ma ho hubani si Balak anjaha sonon do hatahononmu.”
17Dob ai mulak ma ia hu bani, anjaha tonggor ma, jongjong ope ia i lambung ni galangan situtungonni ai rap pakon kopala-kopala ni Moab. Nini si Balak ma hu bani, “Aha do na hinatahon ni Jahowa?”
18Dob ai ipungkah ma mangkatahon hatani, nini ma, “Jongjong ma ham, alo Balak, anjaha tonggor ma; patarei ma pinggolmu bangku, ham alo anak ni si Zippor.
19Anggo Naibata sedo jolma na ra marladung, barang anak ni jolma na ra manolsoli dirini. Mintor hatahonon-Ni ma, lang bahenon-Ni sonai?
20Tonggor ma, domma iparentahkon ahu mamasu-masu, mintor naha ma tarbahen ahu manlanglangi, anggo domma Ia mamasu-masu?
21Seng dong ididah hajahaton bani Jakob, anjaha seng dong hangaluton ididah bani Israel. Jahowa Naibatani do hasomanni, anjaha surak-surak ni sada raja do i tongah-tongahni.
22Domma iarahkon Naibata sidea luar hun Masir, anjaha songon tanduk ni badak do in bani sidea.
23Ai seng marguna partabason mangimbang Jakob, anjaha lang marguna partondungon mangimbang Israel. Hatahononkon do bani panorangni hubani Jakob pakon hubani Israel, ʻBanggal ni in pambahenan ni Naibata.ʼ
24Tonggor ma, jongjong do bangsa ai songon singa boru-boru, anjaha padirgakonni dirini songon singa tunggal. Seng anjai manggompang ia, anggo lang lobei mangankon sorohan, anjaha isobur daroh ni na binunuhni.”
25Dob ai nini si Balak ma hubani si Bileam, “Anggo na so tarbahen ham do mamurai sidea, ulang ma sai nunut mamasu-masu sidea.”
26Nini si Bileam ma mambalosi si Balak, “Ai lang domma huhatahon bamu: Sagala na hinatahon ni Naibata, ai do sibahenonku.”
27Dob ai nini si Balak ma hubani si Bileam, “Eta ma, ase hubobahon ham bani ianan na legan, ra marosuh do Naibata buraanmu sidea bangku hunjai.”
28Jadi iarahkon si Balak ma si Bileam hu pakpak ni Peor, ai ma panatapan halimisan.
29Dob ai nini si Bileam ma hubani si Balak, “Pajongjong ma bangku ijon pitu anjapanjap anjaha pasirsir pitu lombu pakon pitu biribiri tunggal.”
30Jadi ibahen si Balak ma romban hubani hata ni si Bileam, gabe igalangkon ma sada lombu pakon sada biribiri tunggal bani ganup anjapanjap ai.