Alkitab Mobile SABDA
[VER] : [SIMALUNGUN]     [PL]  [PB] 
 <<  Daniel 8 >> 

Pangungkabon Pasal Biribiri Tunggal, Hambing Tunggal ampa Tandukni ai

1Patolu-tahunkon dob raja si Beltsasar, taridah ma bangku, si Daniel, sada pangungkabon ipudi ni pangungkabon na parlobei ondi.

2Jadi huidah ma ibagas pangungkabon ai (Ia ahu, sanggah na huidah ai, i huta pamatang Susan do, na i nagori Elam, i topi ni Bah Ulai),

3mangkawah ma ahu, tonggor ma, huidah ma sada biribiri tunggal jongjong i topi ni bah ai, dua do tandukni; gijang do haduasi tanduk ai, tapi gijangan do na sada marimbang na sada nari, anjaha parpudi do sigijangan ai tubuh.

4Huidah do biribiri tunggal ai mandugu dompak hasundutan, dompak utara pakon dangsina; seng dong binatang na tahan jongjong i lobeini, anjaha seng dong na boi paluahkon humbani kuasani; uhur-uhurni do ibahen, anjaha ipabanggal do dirini.

5Sanggah na hupardiatei ai, tonggor ma, roh ma sada hambing tunggal hun hasundutan mamontas sab tanoh on, seng pala dais naheini hu tanoh; adong do tanduk na matunggung i holangkolang ni mata ni hambing tunggal ai.

6Das ma ia bani biribiri tunggal sidua tanduk ai, na huidah jongjong i topi ni bah ai, jadi idorab ma ai marbois gogoh.

7Huidah ma ia roh mandohori biribiri tunggal ai, marah do ia hu bani, gabe itanduk ma biribiri tunggal ai anjaha iropukkon tandukni na dua ai; seng margogoh biribiri tunggal ai mangimbangsi; itompaskon ma ia hu tanoh, anjaha ilotloti; anjaha sada pe lang na boi paluahkon biribiri tunggal ai humbani kuasani.

8Jadi lambin timbul ma hambing tunggal ai, tapi dob markuasa tumang ia, ponggol ma tandukni na banggal ai, anjaha gantih ni ai tubuh ma use ompat tanduk na matunggung dompak deisa na ompat ai.

9Jadi humbani sada tanduk ondi tubuh do sada tanduk na etek, na podas tumang marbanggal dompak dangsina, dompak hapoltakan ampa dompak tanoh na majenges ai.

10Lambin timbul do ai, pala do das hu bala na i langit, deba humbani bala ai ampa bintang-bintang ai isampakkon do hu tanoh, anjaha idogei-dogei ma sidea.

11Ipatimbul do dirini, pala das hu bani Kopala ni bala ai; ibuat do hun Bani galangan ari-ari ai, anjaha iparreong do ianan-Ni na mapansing ai.

12Gantih ni galangan ari-ari ai igalangkon do galangan hagigian; isampakkon do hasintongan hu tanoh, anjaha manjadi do sagala horja ni tanduk ai.

13Dob ai hubogei ma marsahap sada halak na pansing, anjaha nini sada halak na pansing na legan ma dompak na dob marsahap ai, “Sadiha dokah on do pangungkabon pasal galangan ari-ari ai, pasal panlanggaron na parsedahon ai, ampa dokah ni ianan na mapansing ai iondoskon gabe silotlotan?”

14Jadi nini ma mambalosi, “Ai ma dua ribu tolu ratus ari; dob salpu pe ai ase mulak suang ianan na mapansing ai.”

15Sanggah ahu, si Daniel, mangidah pangungkabon ai anjaha sihol uhurhu mangarusi ai, tonggor ma, jongjong ma i lobeihu sada songon dalahi rupani.

16Anjaha hubogei ma sora ni jolma hun dipar ni Bah Ulai ai, na dilo-dilo mangkatahon, “Ale Gabriel, pajojor ma arti ni pangungkabon ai bani halak in!”

17Jadi roh ma ia jongjong hu lambungku; sanggah na roh ia tarhirjat ma ahu lanjar manrogop hu tanoh. Tapi nini ma dompak ahu, “Botoh ma, ale anak ni jolma, ia pangungkabon ai pasal ari parpudi do ai.”

18Sanggah na marsahap ai ia hu bangku, tompas ma ahu anjaha tarhatos, bohingku dompak tanoh; tapi ijamah ma ahu lanjar ipajongjong.

19Nini ma, “Tonggor ma, hupatoguh ma bam, aha na sihol masa bani panorang pangujungi ni ringis ai, ai martuduh-tuduh dompak ari parpudi do pangungkabon ai.

20Ia biribiri tunggal, na nididahmai, sidua tanduk ai, ai ma raja-raja ni Madai pakon Persia.

21Anjaha hambing tunggal ai, ai ma harajaon Gorik, anjaha tanduk na banggal ai, na i holangkolang ni matani na dua ai, ai ma raja na parlobei.

22Ia tanduk na maponggol ai, tubuh do use ompat tanduk manggantih ai, ai ma ompat harajaon na sihol tubuh, humbani bangsa ai, tapi seng songon gogoh ni na parlobei ai.

23Tapi marayak ujung ni panrajaion ni sidea ai, anggo tarlobih ma hajahaton ni sidea ai, timbul ma sada raja, parbohi na koras, na pandei marakal-akal.

24Timbul tumang do gogohni, tapi sedo humbani gogohni sandiri, anjaha jangin tumang do pansedaini; monang do ia bani sagala pambahenanni, iboiskon do jolma siparkuasa ampa halak na mapansing ai.

25Marhitei akal-akal manjadi do pangoto-otoion na niranggihonni ai, marsura-sura habanggalon do ia ibagas uhurni. Buei do halak parsedaonni na so pamotohan; jongjong do ia manlawan Raja ni sagala raja, tapi maropuk do ia, seng pala marhitei tangan ni jolma.

26Ia pangungkabon bodari sogod ai, na dob tinarsingatan ai, sintong do ai; ponopkon ma pangungkabon ai, ai marhahonaan bani ari magira do ai.”

27Ia ahu, si Daniel, mandatei anjaha boritan do ahu piga-piga ari. Dob ai jongjong ma ahu laho mangkorjahon horja ni raja ai. Tapi songgotan do ahu pasal pangungkabon ai, anjaha seng dong na boi patorangkon.


  Share Facebook  |  Share Twitter

 <<  Daniel 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel