Dual PanelSi Ester i Lobei ni Raja
1Patolu-arihon marpakeian harajaon ma si Ester, anjaha jongjong ma ia i alaman parbagas tontang rumah ni raja ai, anjaha raja ai hundul do bani hotak harajaonni ibagas rumahni, tontang ni horbangan ni rumah ni raja ai.
2Dob ididah raja ai si Ester, puangbolon ai, jongjong i alaman, rosuh ma uhur ni raja ai mangidah si Ester, jadi isurdukkon raja ai ma hubani si Ester tungkot harajaon omas na ibagas tanganni ai. Dob ai ipadohor si Ester ma, lanjar ijamah ma ujung ni tungkot harajaon ai.
3Nini raja ai ma dompaksi, “Aha do na porlu bam Puang-bolon Ester, anjaha aha do sura-suramu? Das ronsi satongah ni harajaonku sai bereonku do bam.”
4Dob ai nini si Ester ma, “Anggo dear ninuhur ni raja in, roh ma raja in rap pakon si Haman sadari on mangan sipanganon na dob hupasirsir.”
5Nini raja ai ma, “Alop hanima ma podas si Haman, ase ipadas hanami sura-sura ni si Ester.” Ase laho ma raja ai rap pakon si Haman, hu pesta na pinasirsir ni si Ester.
6Nini raja ai ma dompak si Ester dob sombuh ia minum anggur, “Aha do na pinangindo ni uhurmu, sai bereon do ai bam, anjaha aha sura-suramu ronsi satongah ni harajaon in, sai pasaudon do.”
7Dob ai nini si Ester ma mambalosi, “Pangindoanku ampa sura-surangku on do:
8Anggo maidop do uhur ni raja in bangku, anjaha dear uhur ni raja in mambere pangindoanku ampa pasaudkon sura-surangku, roh ma raja in ampa si Haman hu pesta na sihol pasirsironku anjaha patar ma bahenonku ai romban hubani pangkatahon ni raja in.”
9Dob ai luar ma hunjai si Haman bani ari na sasada ai marolob-olob anjaha marmalas ni uhur. Tapi dob ididah si Haman si Mordahai i horbangan ni rumah ni raja ai, seng jongjong atap mabiar ia mangidahsi, gabe manringis tumang ma si Haman mangidah si Mordahai ai.
10Tapi iodohkon si Haman do lobei pusu-pusuni, lanjar mulak hu rumah; dob ai isuruh ma na mangalopi huan-kuanni ampa si Seres, parinangonni ai.
11Jadi ipajojor si Haman ma bani sidea banggal ni habayakonni, buei ni anakni, ampa pambahen ni raja ai pasangapkonsi ampa na dob pinagijangni ai ia gijangan humbani kopala-kopala ampa juakjuak ni raja ai.
12Ambahni ai nini si Haman do, “Seng dong age sahalak ihatahon Puangbolon Ester roh hu pesta na pinasirsirni ai sobali ahu; age patar sahalak ahu do idilo mangan rap pakon raja ai.
13Tapi haganupan ai seng boi pasombuh uhurhu, sadokah huidah ope si Mordahai, halak Jahudi ai, hundul i horbangan ni rumah ni raja ai.”
14Dob ai nini si Seres, parinangonni ai, ampa huan-kuanni ai ma dompaksi, “Mahua napasuk ma sada tiang lima puluh asta gijangni, anjaha patarni ai napatugah ma hubani raja ai, ase igantungkon si Mordahai hujai; dob ai boi ma ham marmalas ni uhur rap pakon raja ai, laho hu pesta ai.” Rosuh ma uhur ni si Haman mambogei hata ai, jadi isuruh ma na mamasuk tiang ai.