Alkitab Mobile SABDA
[VER] : [SIMALUNGUN]     [PL]  [PB] 
 <<  Filipi 1 >> 

Tabi bani Kuria ampa Pambobaini

1Hun bani si Paulus ampa si Timoteus, juakjuak ni Kristus Jesus, bani haganup halak na pansing ibagas Kristus Jesus, na marianan i Pilippi, rapkon sintua ampa siparugas,

2“Idop ni uhur ma bani nasiam ampa damei humbani Naibata Bapanta ampa humbani Tuhan Jesus Kristus.” Hata Tarima Kasih ampa Tonggo Mangkopkop Kuria

3Mangkatahon tarima kasih do ahubani Naibatangku siap huingat nasiam.

4Tongtong ibagas ganup tonggongku pasal nasiam ganup, ibagas malas ni uhur do ahu na martonggo ai,

5mardingat saor nasiam bani Ambilan Na Madear in humbani mungkahni ronsi nuan.

6Anjaha tenger do uhurhu, Ia na dob mamungkah horja na madear ibagas nasiam, dobkonon-Ni do in das ronsi ari ni Kristus Jesus.

7Patut do sonin uhurhu pasal nasiam haganup, halani ibagas uhurhu do nasiam, ai parrupei do nasiam ganup bani idop ni uhur na hu bangku, sanggah na tartutup ai ahu age sanggah na mampartahankon ampa na pajonamkon Ambilan Na Madear ai.

8Ai Naibata do saksingku pasal banggal ni siholhubani nasiam haganup marhitei holong ni atei ni Kristus Jesus.

9Anjaha on do hutonggohon, ase lambin marbanggal holong ni uhur nasiam marisi habotohon ampa pangarusion na gok,

10gabe boi nasiam mananda na ija siporlunan, ase pitah nasiam, anjaha seng dong sihataon bani ari ni Kristus,

11gok bani buah-buah hapintoron na roh marhitei Jesus Kristus, bahen hasangapon ampa puji-pujian bani Naibata.

Mangkorhon Pasu-pasu do Age Tartutup Apostel

12Ipangindo uhurhu do, nasiam sanina, ase ibotoh nasiam, paboa lambin manumpak bani hamajuon ni Ambilan Na Madear do na masa bangku,

13pala do tarbotoh bani ganup pangisi ni tangsi ai ampa bani haganup na legan ai, paboa halani Kristus do na targari ai ahu,

14gabe roh tengerni do uhur ni buenan sanina ai bani Tuhan in, anjaha roh boranini mangkatahon hata ni Naibata seng mabiar-biar.

15Deba dong homa manaksihon Kristus humbani uhur subil ampa paringoran, tapi deba nari humbani bujur ni uhur do.

16Hun bani jinuljul ni holong ma anggo on, halani ibotoh sidea, halani na mampartahankon Ambilan Na Madear do, ase tartutup ahu.

17Tapi na legan ai nani mangambilankon Kristus humbani uhur na maringor, seng humbani uhur na pitah, ase tambah ninuhur ni sidea sitaronon bangku na targari on.

18Ase sonaha do? Atap na sonaha pe pardalan ni ai, marsipahulah-hulah atap maruhur na sintong, asal ma tarambilan Kristus; pasal ai malas do uhurhu.

19Tongon, malas do uhurhu, ai hubotoh gabe marujung bani hatuahon do on bangku halani tonggo nasiam ampa halani pangurupi ni Tonduy ni Jesus Kristus.

20Ai in do na huhasiholhon anjaha mangarap ahu seng anjai tarmela ahu ibagas atap aha pe, tapi marhasoman hinsah ni uhur, songon nasaindokah age sonari, maningon marsangap Kristus marhitei angkulangku, marhitei goluhku barang parmateihu.

21Ai Kristus do hagoluhan bangku, anjaha untung do hamatean.

22Tapi anggo marbuah do horjangku hinorhon ni goluh ni daging on, gabe lang hubotoh barang aha do sipilihonku.

23Haduasi do manosak ahu: Masihol do uhurhu misir, ase rap pakon Kristus, ai daoh do dearan ai,

24tapi porlunan do marianan ibagas daging halani nasiam.

25Anjaha marhatengeran hujai, hubotoh do, paboa manggoluh ope ahu anjaha marianan pakon nasiam haganup, laho pamajuhon ampa pahinsah haporsayaon nasiam,

26ase lambin tambah pamuji nasiam bani Kristus Jesus marhitei ahu, rohkonsi ahu use bani nasiam.

Sipaingat ase Totap Marhaporsayaon

27Hansa, marparlahou ma nasiam domu hubani Ambilan Na Madear ni Kristus, ase barang sanggah na roh ai ahu, huidah bani nasiam, barang age sanggah padaoh-daoh, hubogei bani nasiam, totap nasiam jongjong ibagas hasadaon ni tonduy, marsada ni uhur, marporang mangkopkop haporsayaon bani Ambilan Na Madear in.

28Anjaha ulang ma ra nasiam pabiar-biaran ni imbang pasal atap aha pe, ai ma tanda ni hamagouan bani sidea, tapi bani nasiam tanda ni haluahon do, anjaha humbani Naibata do in.

29Ai domma ibere bani nasiam, seng pitah porsaya bani Kristus, tapi dihut do marsitaronon halani-Si.

30Maruntol do nasiam nuan, songon na nididah nasiam ijia bangku, anjaha na binogei nasiam nuan bangku.


  Share Facebook  |  Share Twitter

 <<  Filipi 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel