Dual PanelHamuliaon ni Rumah Panumbahan na Bayu
1Padua-tahunkon dob bangkit raja si Darius, bani ari dua puluh sada bulan pitu, roh ma hata ni Jahowa marhitei si Haggai, nabi ai, sonon,
2“Hatahon ma bani si Serubabel, anak ni si Sealtiel, panrajai ni Juda ampa hubani si Josua, anak ni si Josadak, sintua ni malim ai, ampa hubani haganup simasima ni bangsa ai,
3ʻAdong ope i tongah-tongahnima na manggoluh, mangidah rumah on ibagas hamuliaonni na parlobei ai? Sonaha ididah hanima sonari? Ai seng songon na lang do in bani pangidahnima?ʼ
4Tapi tenger ma uhurmu, ale Serubabel,” nini Jahowa; “tenger ma homa uhurmu, ale Sintua ni Malim Josua, anak ni si Josadak; tenger ma homa uhurmu, ale bangsa na i tanoh in,” nini Jahowa, “nunut marhorja, ai Ahu do hasomannima,” nini Jahowa Zebaot;
5“romban hubani bagah-bagah, na Huhatahon bannima sanggah na luar hanima hun Masir, ʻMarianan do tonduy-Hu i tongah-tongahnima, ulang mabiar!ʼ
6Ai sonon do hata ni Jahowa Zebaot, ʻSahali nari, seng sadiha dokahni be, duguron-Ku ma langit pakon tanoh pakon laut ampa darat;
7duguron-Ku ma ganup bangsa sipajuh begu-begu, gabe roh ma na maharga ni ganup bangsa sipajuh begu-begu, gabe gokan-Ku ma rumah on bani hamuliaon,ʼ nini Jahowa Zebaot.
8ʻAhu do simada pirak anjaha Ahu do simada omas,ʼ nini Jahowa Zebaot.
9ʻJadi bueinan ma hamuliaon ni Rumah Panumbahan na parpudi on, ase na parlobei ondi,ʼ nini Jahowa Zebaot; ʻanjaha bani ianan on bereon-Ku do hatuahon,ʼ nini Jahowa Zebaot.”
Bagah-bagah Pasal Pasu-pasu
10Paduapuluhompat-arihon, bani bulan siah, padua-tahunkon dob manrajai si Darius, roh ma hata ni Jahowa marhitei si Haggai, nabi ai sonon:
11Sonon do hata ni Jahowa Zebaot, “Sungkun ma malim naha nini titah pasal on,
12ʻAnggo porini iboan sada halak gulei na mapansing ibagas suhi-suhi ni hiouni, anjaha igiut marhitei hiouni ai ruti atap lowoh atap anggur atap minak atap sipanganon na ija pe, gabe pansing do ai?ʼ” Balosan ni malim ai ma, “Lang.”
13Dob ai nini si Haggai ma, “Anggo adong sada halak na mabutak, halani dais bani sada bangkei, manggiut sada humbani nongkan ai, naha, gabe butak do ai?” Balosan ni malim ai ma, “Gabe butak ma ai tongon.”
14Dob ai nini si Haggai ma, “Sonai ma halak on, bangsa on i lobei-Hu,” nini Jahowa, ʻlanjar sonai do homa ganup jadi-jadian ni tangan ni sidea, anjaha atap aha pe ginalangkon ni sidea ijai, butak do ai.
15Ai pe, paruhurhon hanima ma olat ni ari on hu atas! Sanggah lape iatur batu bani rumah ni Jahowa,
16sonaha do na masa bannima? Anggo roh halak bani luhutan pardua puluh sumpitan, hape pitah sapuluh do; anggo roh halak bani parnahan ni anggur, laho manahui lima puluh gusi hunjai, hape pitah dua puluh gusi hansa.
17Domma Hulibas hanima marhitei antinganou, hameluson ampa sira-sira, laho mansedahon ganup na hinorjahon ni tangannima, hape lanjar do seng mulak hanima hu Bangku,ʼ nini Jahowa.
18ʻParuhurhon hanima ma olat ni ari on hu atas, olat ni ari dua puluh ompat, bulan siah on, olat ni ari dob ipasuk onjolan ni rumah ni Jahowa: ʻParuhurhon hanima ma!
19Atap moru do bonih ibagas sopou, atap seng marbuah hayu anggur pakon hayu ara pakon dalima ampa hayu jetun. Olat ni ari on pasu-pasuon-Ku ma.ʼ”
Bagah-bagah bani si Serubabel
20Dob ai roh ma hata ni Jahowa paduahalihon hubani si Haggai bani ari dua puluh ompat bani bulan ai, sonon,
21“Hatahon ma bani si Serubabel, panrajai ni Juda, sonon, ʻSihol do duguron-Ku langit pakon tanoh on,
22sihol do tunggalingkonon-Ku paratas ni harajaon, anjaha siapkonon-Ku hagogohon ni bangsa sipajuh begu-begu, tunggalingkonon-Ku gareta ampa jolma na mangajak ai, gabe mardabuhan ma huda ampa jolma na mangajak ai, ganup marhitei podang ni hasomanni.
23Bani ari ai,” nini Jahowa Zebaot, “buaton-Ku ma ho, ale Serubabel, anak ni si Sealtiel, juakjuak-Kin,” nini Jahowa, “anjaha bahenon-Ku ma ho gabe tintin tokan, ai domma Hupilih ho,” nini Jahowa Zebaot.