Dual PanelIlawan si Simson Halak Palistim
1Jadi bani labang-labang ni ari, sanggah musim ni pariama, iparayak si Simson ma use parinangonni ai, iboan do anak ni hambing sada, anjaha nini ma, “Sihol hu kamar do ahu marayak parinangonku.” Tapi seng ipalopas bapa ni naboru ai ia masuk.
2Nini bapani ai ma, “Huagan ma na dob magigi ho bani, jadi domma hupalaho ia hubani hasomanmu. Ai lang jengesan do anggini ai hun bani, ia ma bam gantihni.
3Dob ai nini si Simson ma dompak sidea, ʻAnggo sahali on, seng marsalah ahu dompak halak Palistim, anggo huparroh hamagouan hubani sidea.ʼ”
4Dob ai laho ma si Simson, itangkap ma tolu ratus sorigala, ibuat ma tunam, isangkut ma ihur bani ihur, anjaha inahkon ma tunam sada i holangkolang ni na dua sorigala ai.
5Dob ai inahiti ma tunam ai, anjaha ipaluah ma sorigala ai hu juma gandum ni halak Palistim, na so ipariamai ope, gabe matutung ma radean pakon gandum, na so ipariamai ope, sonai homa kobun anggur pakon kobun jetun.
6Nini halak Palistim ma, “Ise do na mambahen on? Nini halak ma mambalosi, ʻSi Simson do, hela ni halak Timna ai, ai ibuat do parinangon ni si Simson anjaha iberehon hubani hasomanni.ʼ Dob ai laho ma halak Palistim hujai anjaha itutung ma naboru ai pakon bapani.”
7Dob ai nini si Simson ma dompak sidea, “Anggo sonai ibahen nasiam, seng anjai maronti ope ahu, anggo seng hubalaskon ope ai bani nasiam.”
8Jadi ibogbogi, irosaki ma holi-holi ni sidea, parah pambogbogini ai. Dob ai laho ma ia anjaha marianan ibagas sada liang i Dolog batu Etam.
9Dob ai bingkat ma halak Palistim, marsaran ma sidea i Juda anjaha merap das hu Lehi.
10Nini halak Juda ma, “Mase ma tangkog nasiam dompak hanami? Nini sidea ma mambalosi, ʻLaho manangkut si Simson do ase tangkog hanami, anjaha mambahen hubani songon na binahenni hu bennami.ʼ”
11Dob ai tuad ma tolu ribu halak humbani halak Juda hu liang na i Dolog batu Etam, anjaha nini sidea ma dompak si Simson, “Ai lang ibotoh ho, na ginomgom ni halak Palistim do hita? Ai aha do na binahenmon bennami? Tapi nini ma mambalosi sidea, ʻSongon na binahen ni sidea hu bangku, sonai do hubahen bani sidea.ʼ
12Nini sidea ma hu bani, ʻAse roh pe hanami hujon na laho manangkut anjaha mangondoskon ho do hubagas tangan ni halak Palistim.ʼ Jadi nini si Simson ma mambalosi sidea, ʻMarbulawan ma nasiam bangku, paboa na so nasiam sandiri mandorab ahu.ʼ
13Dob ai nini sidea ma hu bani, ʻLang, pitah manangkut ho do hansa hanami, dob ai mangondoskon ho hubagas tangan ni sidea, tapi seng anjai bunuhonnami ho.ʼ Dob ai isangkut sidea ma ia marhitei dua tali na baru anjaha iboan ma ia hun dolog batu ai.”
14Dob das ia hu Lehi, anjaha marsurak-surak halak Palistim manjumpahkonsi, jadi sorap ma Tonduy ni Jahowa hu bani, anjaha tali na i pargolanganni ai gabe songon bonang na tinutung ma anjaha sagala panangkutni ai tanggal hun tanganni.
15Dob ai jumpahsi ma sada osang-osang ni halode na baru ope, idurdurhon ma tanganni laho manjomput ai, dob ai ipambogbogkon ma ai gabe matei ma saribu halak.
16Nini si Simson ma, “Marhitei osang-osang ni halode hubogbogi sidea bois, marhitei osang-osang ni halode saribu halak hubunuh.”
17Jadi dob ihatahon sonai, igijigkon ma osang-osang ai hun tanganni; halani ai igoran do ianan ai Ramat-Lehi.
18Tapi horahan tumang ma ia, gabe idilo ma Jahowa, nini ma, “Domma ibere Ham haluahon na banggal marhitei ahu jabolon-Mu on, mintor matei horahan ma ahu sonari anjaha madabuh hu tangan ni halak na so marsunat on?”
19Jadi ibolah Naibata ma dolog batu na i Lehi, gabe luar ma hunjai bah; jadi dob minum ia mulak ma hosahni anjaha margogoh ma ia. Halani ai igoran ma bah tubuh ai: “Bah tubuh ni halak na dilo-dilo,” na adong i Lehi ronsi sadari on.
20Jadi adong do dua puluh tahun si Simson manguhumi halak Israel bani panorang ni halak Palistim.