Dual PanelSi Abimelek Irajahon
1Laho ma si Abimelek, anak ni si Jerubbaal, hu Sikon hu bani botou ni inangni, anjaha nini ma dompak sidea pakon dompak ganup marga, ginompar ni na hampit inangni:
2Hatahon nasiam ma hubani ganup parhuta Sikem, “Na ija ma sidearan bani nasiam, pitu puluh halak anak ni si Jerubbaal, marrajai nasiam, atap sahalak marrajai? Anjaha ingat nasiam homa, holi-holi anjaha daroh nasiam do ahu.”
3Jadi ipatugah botou ni inangni ai ma ganup hata ai hubani parhuta Sikem, gabe muyun ma uhur ni sidea mangihutkon si Abimelek, ai nini sidea do, “Angginta do ia.”
4Dob ai ibere sidea ma pitu puluh duit pirak hun rumah panumbahan ni Baal-Berit, jadi iupahi si Abimelek ma halak na hampung anjaha na jungkat maruhur mangirikkonsi.
5Laho ma ia hu rumah ni bapani i Ofra, ibunuh ma sanina-saninani ai, anak ni si Jerubbaal, pitu puluh halak bueini, i atas ni sada batu; tapi anggo si Jotam, anak sianggian ni si Jerubbaal tading do, halani marponop ia.
6Dob ai martumpu ma ganup par Sikem pakon ganup par Bet-Milo, anjaha laho ma sidea pabangkitkon si Abimelek gabe raja, i lambung ni baringin, na bani batu pardingatan na i Sikem.
Limbaga ni si Jotam
7Dob tarbogei barita ai hubani si Jotam, laho ma ia jongjong hu pakpak ni Dolog Garisim, anjaha ipagogoh ma sorani dilo-dilo, nini ma dompak sidea, “Tangihon nasiam ma ahu alo parhuta Sikem, ase itangihon Naibata nasiam.”
8Laho ma sahali hayu pabangkit raja bani sidea, nini sidea ma dompak hayu jetun, “Ham ma rajanami!”
9Tapi nini hayu jetun ai ma mambalosi, “Mintor tadingkononku ma minak na bangku, na mambahen ahu tarpuji bani Naibata pakon jolma, ase laho ahu mayap-ayap i atas ni sagala hayu?”
10Dob ai nini hayu ai ma dompak hayu ara, “Roh ma ham, rajai ham, rajai ham ma hanami!
11Nini hayu ara ai ma mambalosi sidea, ʻMintor tadingkononku ma tobu-tobungku pakon buahku na madear, ase laho ahu mayap-ayap i atas ni sagala hayu?ʼ
12Dob ai nini sagala hayu ai ma dompak hayu anggur, ʻRoh ma ham, rajai ham ma hanami!ʼ
13Nini hayu anggur ai ma mambalosi sidea, ʻMintor tadingkononku ma buah anggurhu, na pamalaskon uhur ni Naibata pakon jolma, ase laho ahu mayap-ayap i atas ni sagala hayu?ʼ
14Dob ai nini sagala hayu ai ma dompak tatada, ʻRoh ma ham, rajai ham ma hanami!ʼ
15Nini tatada ai ma mambalosi sagala hayu ai, ʻAnggo tongon-tongon do nasiam sihol pabangkit ahu gabe raja nasiam, roh ma nasiam marlinggom i toruh ni linggomku, tapi anggo lang, luar ma apuy hun tatada laho mangankon hayu ares na i Libanon.ʼ
16On pe, anggo ibagas hasintongan pakon putih ni uhur do nasiam pabangkit si Abimelek jadi raja, anjaha anggo na madear do na binahen nasiam hubani si Jerubbaal pakon hubani ginomparni, anjaha ibahen nasiam sonai hubani tembal ni pambahenan ni tanganni,
17ai lang bapangku do marporang mangkopkop nasiam, anjaha iparnalang hosahni laho paluahkon nasiam hun tangan ni halak Midian;
18hape manlawan do nasiam sadari on dompak ginompar ni bapangku, anjaha ibunuh nasiam do anakni pitu puluh halak bueini i atas ni sada batu, anjaha ipabangkit nasiam do si Abimelek, anak ni jabolon naboru ni bapa, gabe raja ni parhuta Sikem, halani sanina nasiam ia.
19Anggo ibagas hasintongan pakon putih ni uhur do pambahenan nasiam sadari on hubani si Jerubbaal pakon hu bani ginomparni, marmalas ni uhur ma nasiam mangidah si Abimelek, anjaha marmalas ni uhur ma age ia bani nasiam.
20Tapi anggo lang, sai roh ma apuy humbani si Abimelek laho mangankon parhuta Sikem sonai homa par Bet-Milo, anjaha sai roh ma apuy hun parhuta Sikem sonai homa hun par Bet-Milo laho mangankon si Abimelek.”
21Dob ai lintun ma si Jotam, maporus hu Beer, anjaha tading ijai ma ia, halani biarni hubani si Abimelek sanina ai.
Parmatei ni si Abimelek
22Jadi dob iparentah si Abimelek halak Israel tolu tahun dokahni,
23gabe ipapuho Naibata ma uhur na jahat i tongah-tongah ni si Abimelek pakon parhuta Sikem, gabe martahi-tahi ma parhuta Sikem dompak si Abimelek.
24laho mambalaskon hubani si Abimelek hajahaton, na binahenni hubani sipitu puluh halak anak ni si Jerubbaal pakon marsapatahon daroh ni sidea hubani si Abimelek, sanina ni sidea ai, na dob mambunuh sidea, pakon hubani parhuta Sikem na mangurupisi mambunuh sanina-saninani ai.
25Ai domma isuruh parhuta Sikem halak na manggompangisi i atas ni dolog, anjaha irampok sidea sagala na montas humbani sidea i dalan ai. Dong ma halak na patugahkon ai hubani si Abimelek.
26Sanggah sonai, roh ma si Gaal anak ni si Ebed pakon sanina-saninani pindah hu huta Sikem. Porsaya do parhuta Sikem bani.
27Laho ma sidea hu juma, laho mamutik buah ni hayu anggur ni sidea, iporohi ma, marpesta ma sidea, masuk ma sidea hu rumah ni naibata ni sidea, mangan minum ma sidea anjaha iburai sidea ma si Abimelek.
28Jadi nini si Gaal, anak ni si Ebed ai ma, “Ise do si Abimelek, anjaha ise do hita par Sikem, ase jabolonni hita? Ai lang anak ni si Jerubbaal pakon si Zebul, wakilni pe pambalosi do hubani halak Hemor, bapa ni si Sikem? Mase ma gabe jabolonni hita?
29Ambit ibagas kuasangku ma namin halak na ibagas huta on, maningon usironku do si Abimelek.” Tapi anggo dompak si Abimelek sonon do nini, “Pabuei ma balamu, anjaha luar ma ham!”
30Dob ibogei si Zebul, pangulu ni huta ai hata ni si Gaal, anak ni si Ebed ai, manggila ma ia.
31Isuruh ma suruhanni hubani si Abimelek i Aruma mangkatahon, “Tonggor ma, domma roh si Gaal, anak ni si Ebed, pakon saninani hu huta Sikem, anjaha iojur-ojur sidea do parhuta in manlawan ham.
32On pe, bingkat ma ham borngin, ham pakon halak na rap pakon ham, anjaha monggop ma nasiam i ladang.
33Patar, girah sogod, sanggah parpoltak ni mata ni ari, girah ma ham puho anjaha dorab ham ma huta ai; jadi anggo luar ma ia pakon halak na rap pakonsi mangimbang ham, gabe boi ma bahenonmu bani sidea songon na isura uhurmu.”
34Halani ai bingkat ma si Abimelek borngin rap pakon halak na rap pakonsi, jadi monggop ma sidea gabe ompat hulanan laho mangimbang huta Sikem.
35Dob ai luar ma si Gaal, anak ni si Ebed, anjaha jongjong i lobei ni horbangan ni huta ai; jadi luar ma si Abimelek rap pakon halak hasomanni ai hun paronggopan.
36Dob ididah si Gaal halak ai, nini ma dompak si Zebul, “Tonggor ma, buei ni halak na tuad hun pakpak ni dolog ai. Nini si Zebul ma hu bani, ʻHalinoh ni dolog do na nididahmu ai songon jolma.ʼ
37Tapi nini si Gaal ma use, ʻTonggor ma, tuad do buei halak hun tongah-tongah ni tanoh in, anjaha sada hulanan hun dalan baringin ni partondung.ʼ
38Nini si Zebul ma mambalosi, ʻIja do babahmu na mangkatahon: Ise do si Abimelek ase gabe jabolonni hita? Ai lang on do halak na nidorunanmin? Luar ma ho sonari marporang pakon sidea.ʼ
39Kaluar ma si Gaal mambobahon parhuta Sikem laho marporang mangimbang si Abimelek.”
40Tapi iayak si Abimelek ma ia, gabe lintun ia hun lobeini, anjaha buei ma halak na rasei das hu labah ni horbangan ai.
41Dob ai mulak ma si Abimelek hu Aruma; tapi iusir si Zebul ma si Gaal pakon sanina-saninani ai, gabe seng dong be sidea marianan i Sikem.
42Patarni ai laho ma parhuta ai hu juma, anjaha adong ma na patugahkon ai hubani si Abimelek.
43Dob ai iarahkon ma rayatni, ibagi ma gabe tolu hulanan, jadi monggop ma sidea i ladang. Dob ididah luar parhuta ai hun huta ai, luar ma ia mandorab sidea anjaha ibunuhi ma sidea.
44Si Abimelek pakon hulanan na rap pakonsi mandorab anjaha mangkunduli labah ni horbangan ni huta ai, anjaha na dua hulanan na legan ai mandorab anjaha marraseihon sagala halak na i juma.
45Layur sadari ni ai marporang do si Abimelek mangimbang ai, itaban ma huta ai anjaha iraseihon halak na ibagas ai, dob ai iparseda ma huta ai anjaha isaburi garam hujai.
46Dob ibogei parmanara Sikem ai, masuk ma sidea hubagas liang i toruh ni rumah panumbahan El-Berit.
47Dong ma na patugahkon hubani si Abimelek, na dob martumpu parmanara Sikem ijai.
48Tangkog ma si Abimelek, ia pakon rayat na rap pakonsi hu Dolog Salmon; ibuat si Abimelek ma tangkei, itagili ma dangkah-dangkah ni hayu, iangkat anjaha inahkon ma ai hu abarani anjaha nini ma dompak rayatni na rap pakonsi, “Aha ididah nasiam hubahen, mintor bahen nasiam ma songon na hubahen ai.”
49Jadi ganup ma rayat ai managili dangkah-dangkah, anjaha iirikkon ma si Abimelek, inahkon sidea ma ai i atas ni liang ai; anjaha itutung sidea ma liang ai i babou ni ulu ni sidea, gabe matei ma homa parmanara Sikem hira-hira saribu halak dalahi pakon naboru.
50Dob ai laho ma si Abimelek hu Tebes; ihubu ma Tebes anjaha itaban.
51Adong ma sada manara na toguh i tongah-tongah ni huta ai, jadi maporus ma hujai sagala dalahi pakon naboru ampa ganup parhuta ai, itutup sidea ma labah, jadi laho ma sidea hu tayub ni manara ai.
52Jadi das ma si Abimelek hu manara ai, anjaha iporang ma sidea. Tapi sanggah na das ia hu labah ni manara ai laho manutung ai,
53jadi idabuhkon sada puang-puang ma hu atas ulu ni si Abimelek sada batu pandudaan, gabe marosak ma pakpak ni uluni.
54Dob ai mintor idilo si Abimelek ma garama siboban sinjatani anjaha nini ma hu bani, “Sintak ma podangmu anjaha bunuh ma ahu, ase ulang ihatahon halak pasal ahu, ʻNaboru do na mambunuhsi.ʼ Itikam juakjuakni ai ma ia, lanjar matei.”
55Dob ididah halak Israel na dob matei si Abimelek, laho ma sidea, ganup hubani iananni bei.
56Sonai ma pambalaskon ni Naibata bani hajahaton, na binahen ni si Abimelek hubani bapani, marhitei na mambunuh sipitu puluh halak saninani ai;
57sonai homa ganup hajahaton ni halak Sikem ipasuang Naibata hubani ulu ni sidea, gabe manginsonoh hubani sidea papa ni si Jotam, anak ni si Jerubbaal ai.