Dual PanelParseda ni Harajaon Israel ampa Parnaibataon na Legan
1Hayu anggur na tabun do Israel, na mambere buahni. Lambin tambah buahni, lambin ipabuei sidea do anjapanjap; lambin dearni tanohni, lambin ipauli sidea do tuguni.
2Seng bulat uhur ni sidea, sonari manginsonoh ma ai bani sidea. Parsedaon ni Jahowa ma anjapanjap ni sidea, anjaha parreongon-Ni tuguni.
3Tongon, ihatahon sidea do sonari, “Seng marraja hita, halani lang ihabiari hita Jahowa; ia sah raja, aha ma na boi bahenonni banta?”
4Isahapkon sidea do hata lumei, marhitei bulawan sipakulahkulah ibahen sidea parpadanan; gabe martumbor ma uhum songon suan-suanan na manrasun bani juma na tininggala.
5Gobir do pangisi ni Samaria bani gana-gana lombu na i Bet-Awen. Tongon marhoru do bangsani halani ai, anjaha doruh-doruh do malim-malimni, halani hasangaponni na minsah hunjai.
6Tongon, anak ni lombu ai pe tarboan do hu Assur bahen parsombahon bani raja bolon ai. Maningon bador do Efraim anjaha maila Israel halani hapandeionni ai.
7Maningon magou do Samaria, rajani ai mayub songon pangotaman i atas ni bah.
8Maningon bois do buntu-buntu panombahan na i Awen, pardousaon bani Israel. Suga-suga pakon duri-duri do tubuh bani anjapanjap ni sidea. Hatahonon ni sidea ma bani dolog-dolog, “Rungkub hanami!” Anjaha bani buntu-buntu, “Robrobi hanami!”
9“Humbani panorang na i Gibea nari, sai mardousai do ho, ale Israel. ijai do sidea jongjong manlawan Ahu. Ai lang hona porang do sidea i Gibea?
10Sai roh do Ahu manjumpahkon anak na jahat ai laho mangajar sidea. Martumpu do roh bangsa-bangsa laho mandorab sidea, anggo ajaron ma sidea halani hajahaton ni sidea sidua lompit ai.
11Lombu poso na niajar do Efraim, na marosuh mardogei, anjaha Hunahkon do pasangan bani borgokni na jenges ai, anjaha Hupasang ma Efraim; maningon maninggala do Israel anjaha manisir ia Jakob.”
12Tidahkon ma bannima hapintoron, pariamai ma dear layak! pungkah ma juma na baru, ai panorangni ma mangindahi Jahowa, ase roh Ia anjaha ibere bannima hapintoron.
13Tapi hajahaton do itinggalahon hanima, gabe hamagouan isabi hanima, anjaha buah ni ladungnima ipangan hanima. Halani martenger ni uhur ho bani dalanmu, bani hinabuei ni puanglimamu,
14jadi masa ma hageoron ni parporangan i tongah-tongah ni bangsamu, anjaha haganup benteng-bentengmu maseda do songon si Salman na parseda Bet-Arbel bani panorang porang; marsorak do parinangon rap pakon anakni.
15Sonai ma bahenon bannima, ale ginompar ni Israel, halani banggal ni hajahatonnima. Girah sogod bois ma raja ni Israel.