Dual PanelUsih do Efraim bani Pargoluhon ni Ompung ni si Jakob
1(12-2) Logou do iparmahan Efraim, anjaha logou hapoltakan do iayak-ayak ari-ari; ipabuei sidea do ladung ampa odoh-odoh. Mambahen parpadanan do sidea pakon Assur, anjaha iboan do minak hu Masir.
2(12-3) Anjaha adong do paringoran ni Jahowa pakon Juda; marlulu do Ia dompak Jakob romban hubani dalanni, anjaha balaskonon-Ni do bani domu hubani pambahenanni.
3(12-4) Bani partapaan ope domma ioto-otoi abangni, anjaha sanggah bani hagogohonni margulgul do ia pakon Naibata.
4(12-5) Margumpul do ia pakon malekat anjaha monang do, tangis do ia mangelek-elek idop ni uhurni. I Betel pajumpah do Naibata pakonsi, anjaha ijai iparsahapkon do ia.
5(12-6) Jahowa, Naibata Zebaot, Jahowa do goran-Ni.
6(12-7) Ai pe, mulak ma ho bani Naibatamu, dalankon ma idop ni uhur ampa uhum, anjaha tongtong martenger ni uhur bani Naibatamu.
7(12-8) Songon partiga-tiga halak Kanaan ijolom Efraim do kilo palsu ibagas tanganni, marosuh do ia manipu.
8(12-9) Nini, ʻTongon, bayak do ahu, dapotan pansarian do ahu. Bani haganup pansariankai seng dong jumpah bangku salah, ai ma dousa.ʼ
9(12-10) Ahu do Jahowa Naibatamu hun tanoh Masir nari, bahenon-Ku do use ho marianan bani lampolampo, songon sanggah panorang na i halimisan.
10(12-11) Marsahap do Ahu bani nabi, Ahu do pabuei pangungkabon, anjaha marhitei nabi-nabi marsahap do Ahu marhasoman limbaga.
11(12-12) Masa do hajahaton i Gilead, gabe bois do sidea; manggalang do sidea bani lombu jonggi i Gilgal, gabe songon timbunan batu ma homa anjapanjap ni sidea i juma na tininggalaan.
12(12-13) Hu tanoh Aram do maporus si Jakob, marhorja do si Israel ijai halani boru, marmahan biribiri do ia laho mambuat parinangon bani.
13(12-14) Marhitei sada nabi iboan Jahowa do Israel mandarat hun Masir, anjaha iparmahan do sidea marhitei sada nabi.
14(12-15) Sipuhoi ringis do pambahenan ni Efraim, halani ai marsapata hubani do bahenon ni Jahowa utang darohni ai, anjaha balaskononni bani hasamboron na hinorjahonni ai.”