Dual PanelHona Uhum Bangsa Halani Hasalahan ni Sipambobai
1“Tangar ma on, ale malim! Parimbagaskon ma, ale halak Israel! Tangihon ma, ale sipanrajai! Ai mangonai bannima do uhum in, ai gabe siding do hanima i Mispa, gabe puhot na tinaon i Tabor,
2anjaha ipabagas hanima do godung hamagouan na i Sittim, halani ai uhumon-Ku do hanima.
3Hutanda do Efraim, anjaha Israel seng ponop hun Bangku; tongon, sonari marriah-riah do Efraim anjaha hona butakan Israel.
4Pambahenan ni sidea do mambahen lang boi be sidea mulak bani Naibata ni sidea. Ai tonduy parriah-riahon do ibagas uhur ni sidea, anjaha seng itandai sidea Jahowa.
5Gijang ni uhur ni Israel do saksi na mangimbangsi; maningon tompas do Efraim halani hajahatonni. Juda pe tompas do rap pakonsi.
6Roh do sidea mamboan biribiri ampa lombu ni sidea mangindahi Jahowa, tapi seng jumpah sidea Ia; domma surut Ia humbani sidea.
7Mangosei do sidea dompak Jahowa, tongon anak salong-salongan do tinubuhkon ni sidea; halani ai boiskonon ni pesta poltak ni bulan do sidea ampa juma ni sidea.
8Sompul ma tanduk i Gibea, tarompit ai i Rama. Pahata ma tingting i Bet-Awen, hirjati ma Benjamin!
9Gabe halimisan do Efraim bani panorang uhum ai; na sintong do na Hupabotohkon ai bani marga ni Israel.
10Gabe songon halak siosor parbalogan do kopala-kopala ni Juda; duruskonon-Ku do ringis-Ku bani sidea songon bah.
11Hona odoh-odoh do Efraim, maropuk bani paruhuman, halani marosuh ia mangihutkon gana-gana na lang ai.
12Halani ai gabe doskon ngitngit do Ahu bani Efraim, anjaha songon burbur na parsedahon bani ginompar ni Juda.
13Dob ididah Efraim naboritni anjaha ididah Juda ugahni, laho do Efraim hu Assur, isuruh do suruhanni bani raja bolon ai. Tapi seng tarbahensi pamalum hanima atap tartambarisi ugahnima.
14Ai gabe songon singa do Ahu bani Efraim janah songon anak ni singa bani ginompar ni Juda. Ahu, Ahu tongon manoroh, dob ai lintun hunjai. Ahu do na manaluhon, seng dong na boi paluahkon.
15Mulak ma Ahu use bani ianan-Ku, paima itanda sidea salahni gabe ipindahi sidea bohing-Ku, anjaha ibagas hasosakan ni sidea ai pindahan ni sidea ma Ahu.”