Dual PanelParugamaon bani Padan Na Basaia Martuduh-tuduh bani Parugamaon na i Padan Na Baru
1Adong do tongon age bani padan na parlobei ai aturan-aturan parugamaon ampa rumah panumbahan marbiak dunia.
2Ai ipauli do ianan lobei-lobei ai, ijai do parsuluhan ai ampa meja ampa ruti sigalangkonon ai, ai ma na margoran kamar na mapansing.
3I pudi ni hirei-hirei na paduahon ai do ianan na margoran kamar na tang sipansingan.
4Ijai do anjapanjap pardahupaan omas ampa poti parpadanan ai, na ilampis haganup bani omas, na marisi gusi omas, ianan ni manna ai, ampa tungkot ni si Aron na martunas ai, sonai homa batu panuratan ni padan ai.
5I atas ni poti parpadanan ai Herubin na marmulia, na manlinggomi tutup pardearan na i atas ni poti parpadanan ai, seng tarpajojor ai haganup nuan sada-sada.
6Dob ipauli sonai haganup, gabe masuk ma tongtong malim hu ianan lobei-lobei ai, laho mandalankon horja parsombahon ai.
7Tapi bani ianan na paduahon ai, pitah sintua ni malim do hansa, sahali satahun, anjaha seng tarbahen lang mamboan daroh, sigalangkononni halani ia sandiri ampa halani dousa haotoon ni bangsa in.
8Anjaha marhitei ai ipatuduhkon Tonduy Na Pansing do, paboa na so ungkab ope dalan hubani na mapansing ai, sadokah totap ope rumah panumbahan na parlobei ai.
9Na martuduh-tuduh hubani sisonari do ai, ai igalangkon do ijai sibere-bere ampa galangan na so tuk pasonangkon botul panggora ni uhur ni halak na marsombah ai.
10Pitah mangonai pasal paraturan-paraturan pardagingon do hansa ai, ai ma pasal sipanganon, siinumon ampa bagei ni pamurihion, na itotapkon paima roh panorang ni paraturan na sintong.
11Tapi roh do Kristus, Sintua ni Malim ni arta na sihol roh in. Anjaha sahali do imasuki ianan na mapansing ai, dob ibontas ianan panumbahan sibanggalan anjaha sidearan ai, ai ma na so pinauli ni tangan, na so humbani panompaon on;
12seng marhitei daroh ni hambing tunggal pakon anak ni lombu, tapi marhitei daroh-Ni sandiri do, gabe dapot haluahon sadokah ni dokahni.
13Gari daroh ni hambing tunggal ampa lombu jonggi ampa abuan ni anak ni lombu, na pinispiskon bani na mabutak mangkorhon hapansingon ni parangkulaon do;
14ai lang lobihan ma daroh ni Kristus in paborsihkon panggora ni uhurta humbani horja hamatean, laho mangidangi Naibata Sipargoluh in? Ai igalangkon do diri-Ni seng martikas bani Naibata, marhitei Tonduy na manongtong in.
15Anjaha in do halani, ase gabe Siholang Ia bani padan na baru, ai ma, ase ijalo na tardilo in na binagahkon ai, in ma siteanon na so ra mubah in, dob lobei matei Ia, laho pasaloseihon panlanggaron na tarjadi bani padan na parlobei ai.
16Ai anggo adong padan (testament), maningon torang do lobei matei sibahen testament ai, ase sah ai.
17Ai dob matei pe halak ai, ase totap testament ai, seng margogoh ai sadokah manggoluh ope na mambahensi.
18Ai padan na parlobei ai pe, marhitei daroh do isahkon.
19Ai dob ihatahon si Musa hubani ganup bangsa ai sagala parentah domu hubani titah ai, ibuat ma daroh ni anak ni lombu ampa hambing tunggal marhasoman bah, wol na gerger ampa hisop, anjaha ipispisi ma marhitei ai buku ai ampa haganup bangsa ai,
20lanjar ihatahon, “On do daroh ni parpadanan, na niaturhon ni Naibata bani nasiam.”
21Sonai homa lampolampo panumbahan ai ampa haganup parugas na mapansing ai ipispisi do bani daroh ai.
22Anjaha hira haganup do iuras marhitei daroh domu hubani titah in; anjaha seng adong hasasapan ni dousa, anggo seng madurus daroh.
23Ase maningon sonai ma iuras tiruan ni na hun nagori atas ai, tapi na i nagori atas ai, marhitei galangan na surungan hunjai.
24Ai seng masuk Kristus hubagas na mapansing na pinauli ni tangan, gambaran ni na sintong ai, tapi hu nagori atas sandiri do, laho patuduhkon diri-Ni nuan i lobei ni Naibata mangkopkop hita,
25anjaha seng homa laho manggalangkon diri-Ni gati, songon sintua ni malim ai, na mammasuki ianan na mapansing ai siap tahun marhitei daroh ni na legan.
26Ambit sonai, maningon gati do Ia marsitaronon olat ni partombei ni dunia on, tapi sahali tumang do talar Ia bani ujung ni panorang, laho parontihon dousa in, marhitei galangan diri-Ni.
27Songon na dob itotapkon bani jolma, matei sahali dob ai uhum ai,
28sonai do age Kristus, dob hona galangkon sahali, laho mamorsan dousa ni jolma na mabuei in, paduahalihon talar ma Ia, sedo halani dousa, tapi laho mamboan haluahon do bani na paima-imahon-Si.