Dual PanelNipi ni Juakjuak ni Raja Parao Sidua Halak na Tartutup ai
1Seng sadiha dokah dob ai, marsalah ma sitahu anggur ni raja Masir ampa simasak rutini dompak tuan ni sidea, raja Masir ai.
2Jadi manringis tumang ma Parao hubani pagawai istanani sidua halak ai, hubani kopala ni sitahu anggur pakon hubani kopala ni simasak ruti ai.
3Ipatahankon ma sidea i rumah ni kopala pangawal ni raja, ibagas tutupan, ianan ni si Josep tartutup.
4Ipajagahon kopala pangawal ni raja ai ma sidea hubani si Josep, ase iidangi sidea; sonai ma piga-piga dokah tartahan sidea.
5Bani na saborngin marnipi ma sidea haduasi, sitahu anggur pakon simasak ruti ni raja Masir na tartutup ai, ganup sidea marnipi anjaha mararti bei do nipi ni sidea ai.
6Sanggah na iparayak si Josep sidea sogod, iidah ma marhoru sidea.
7Isungkun si Josep ma pegawai istana ai, na rap pakonsi tartutup i rumah ni tuanni ai, nini ma, “Mase songon na marhoru nasiam sadari on?”
8Nini sidea ma dompaksi: Marnipi do hanami, tapi seng dong na boi manorhaisi. Jadi nini si Josep ma dompak sidea: Ai lang humbani Naibata do panorhaion? Patugah ma bangku nipi nasiam ai!
Nipi ni Sitahu Anggur
9Dob ai ibaritahon kopala ni sitahu anggur ai ma nipini ai hubani si Josep, nini ma dompaksi: Huidah do ibagas nipingku sada hayu anggur i lobeihu.
10Adong do tolu ranting ni hayu anggur ai, ai pe martunasi hayu ai, mintor mangerbang ma bungani, gok buah na matoras ma tandanni.
11Itanganku do panginuman ni Parao, hubuati ma buah ai anjaha huporohi hubagas panginuman ni Parao, dob ai hubere ma panginuman ai hu tangan ni Parao.
12Nini si Josep ma dompaksi: On do arti ni ai: na tolu ranting ai, tolu ari do ai;
13ibagas na tolu ari on angkaton ni Parao ma ulumu, pasuangonni ma ham hubani jabatanmu, anjaha bereonmu ma use panginuman ai hu tangan ni Parao songon na somal, sanggah sitahu anggurni ham.
14Tapi ingat ham ma ahu, anggo domma sonang holi ham, anjaha idop ma uhurmu hu bangku, tarsingatkon ham ma ahu hubani Parao, ase ipadarat ahu hun rumah on.
15Ai tarpangus do ahu hun tanoh ni halak Heber, anjaha ijon pe, seng dong atap aha na hubahen, mambahen inahkon sidea ahu hu liang ni tutupan on.
16Dob iidah kopala ni simasak ruti ai, dear do panorhaini ai, nini ma dompak si Josep: Ahu pe marnipi do; adong do hujujung tolu raga na martindih-tindih, na marisi ruti i atas ulungku.
17Anjaha raga pardatas ai marisi bagei-bagei sipanganon ni Parao, na pinauli ni tukang ruti. Dob ai roh ma manuk-manuk mamangani ai humbani raga na i atas ulungku.
18Jadi nini si Josep ma mambalosi: On do artini ai; na tolu raga ai, tolu ari do ai.
19Ibagas na tolu ari on, angkaton ni Parao ma ulumu humbamu, gantungkononni ma ham bani hayu, gabe panganon ni manuk-manuk ma dagingmu.
Sintong ni Panorhaion ai
20Bani ari patoluhon, ai ma ari partubuh ni Parao, ibahen ma pesta bani ganup juakjuakni. Jadi iangkat ma ulu ni kopala ni sitahu anggur pakon ulu ni simasak ruti ai i tongah-tongah ni juakjuakni.
21Jadi ipasuang ma kopala ni sitahu anggur ai hu jabatanni hinan, laho mambere panginuman ai use hu tangan ni Parao.
22Tapi anggo kopala ni sipauli ruti ai, igantung do, songon panorhai ni si Josep bani sidea.
23Tapi seng idingat kopala ni sitahu anggur ai si Josep, ihalupahon do ia.