Dual PanelIpatandahon si Josep Saninani ampa Bapani hubani Parao
1Dob ai laho ma si Josep patugahkon hubani Parao, nini ma, “Domma roh bapa pakon saninangku, biribiri pakon lombu ni sidea ampa haganup na dong bani sidea hun tanoh Kanaan; domma das sidea i tanoh Gosen.”
2Iarahkon si Josep do lima halak humbani saninani ai mangadap Parao.
3Isungkun Parao ma sanina ni si Josep ai, “Aha do horjanima?” Nini sidea ma mambalosi, “Parmahan biribiri do jabolonmu on, sonai hanami age ompungnami.”
4Ambah ni ai nini sidea ma dompak Parao, “Ase roh pe hanami, na sihol manginsolat do hanami i tanoh on, ai lang adong be sampalan ni biribiri ni jabolonmu on, halani parah ni lohei i tanoh Kanaan. Onpe, sai lopas ham ma jabolonmu on marianan i tanoh Gosen.”
5Jadi nini Parao ma hubani si Josep, “Domma roh hape bapa ampa saninamu marayak ho.
6I lobeimu do tanoh Masir; bani tanoh sidearan in ma pajonam bapa pakon saninamu; i tanoh Gosen ma sidea marianan. Anggo dong ibotoh ho halak na pantas humbani sidea, pabangkit ma sidea gabe kopala ni siramotkon pinahanku ganupan.”
7Iarahkon si Josep ma homa si Jakob, bapani ai, mangadap Parao, jadi ipasu-pasu si Jakob ma Parao.
8Nini Parao ma manungkun si Jakob, “Piga tahun ma dokahmu manggoluh?”
9Nini si Jakob ma dompak Parao, “Saratus tolu puluh tahun ma dokah ni panginsolatonku. Otik anjaha borat do tahun ni goluhku, anjaha lang iayak buei ni tahun ni goluh ni ompung bani panginsolatan ni sidea.”
10Ipasu-pasu si Jakob ma Parao, dob ai luar ma ia hun lobei ni Parao.
11Dob ai ipatotap si Josep ma ianan ni bapani pakon saninani ai, ibere ma tanoh parbagianan ni sidea i tanoh Masir, bani ianan sidearan i nagori Ramses, songon na tinonahkon ni Parao.
12Iparmudu si Josep ma bapani, saninani pakon isi ni rumah ni bapani ai, marguru hubani buei ni anak ni sidea.
Harentaon na Binahen ni si Josep Sanggah Lohei ai
13Tapi seng dong sipanganon i sab tanoh ai, ai parah tumang do lohei ai, gabe galek ma partanoh Masir pakon partanoh Kanaan ibahen lohei ai.
14Ase ipatumpu si Josep ma ganup duit na dapot i tanoh Masir pakon i tanoh Kanaan, ai ma boli ni gandum na binoli ni sidea; dob ai itaruhkon si Josep ma duit ai hu rumah ni Parao.
15Jadi dob bois duit hun tanoh Masir pakon hun tanoh Kanaan, marrohan ma ganup partanoh Masir mangadap si Josep, nini ma, “Bere ham ma sipanganon bennami! Mase ma matei hanami i lobeimu, halani na dob bois duitnami?”
16Nini si Josep ma, “Boan nasiam ma pinahan nasiam hujon, ase hubere hubani nasiam gandum gantih ni pinahan nasiam ai, anggo na dob bois ma duit nasiam.”
17Jadi ipamboan sidea ma pinahan ni sidea hubani si Josep, gabe ibere ma hubani sidea sipanganon gantih ni huda, biribiri, lombu pakon halode. Iparmudu ma sidea ibagas na satahun ai, gantih ni haganup pinahan ni sidea ai.
18Dob salpu na satahun ai, roh ma sidea hubani padua-tahunkon, nini ma dompaksi, “Lang tarporsou hanami hu bamu ale tuannami, na dob bois duitnami; pinahannami pe domma ondos hubani tuannami ganupan; seng adong be na tading, na boi ondoskononnami hubani tuannami sobali badan pakon tanohnami.
19Mase ma maningon matei hanami i lobeimu, sonai hanami age tanohnami? Boli ham ma hanami pakon tanohnami gantih ni sipanganon, ase gabe jabolon ni Parao hanami pakon tanohnami. Bere ham ma bonih, ase manggoluh hanami, ulang matei, anjaha ulang tarulang tanoh in.”
20Jadi iboli si Josep ma ganup tanoh Masir bani Parao, ai ijuali halak Masir do jumani bei, halani parah ni lohei ai, gabe Parao ma simada tanoh ai.
21Ia bangsa ai, iparodihon ma sidea i tanoh Masir humbani ujung na sada hubani ujung na sada nari.
22Pitah juma ni malim do na so binolini; ai adong do parbagianan bani malim humbani Parao, anjaha humbani parbagianan na binere ni Parao ai do sidea manggoluh; ai ma halani ase lang ijual sidea tanohni.
23Nini si Josep ma dompak bangsa ai, “Domma huboli nasiam pakon tanoh nasiam sadari on bani Parao; on ma bonih bani nasiam, suani nasiam ma tanoh in.
24Tapi humbani gogohni bere nasiam ma saparlima hubani Parao, anjaha na ompat bagian nari, bahen bonih ni juma nasiam ma, bahen panganon nasiam pakon isi ni rumah nasiam, ampa bahen panganon ni anak nasiam.”
25Nini sidea ma, “Ham do na pagoluhkon hanami; anggo na idop do uhur ni tuannami bennami, sai jabolon ni Parao ma hanami.”
26Jadi sada aturan ma ai pasal tanoh ibahen si Josep i tanoh Masir das hubani sadari on, saparlima ni gogohni bani Parao; pitah tanoh ni malim tumang do na so Parao simadasi.
Tonah ni si Jakob ase hu Tanoh Kanaan ia Itanom
27Ase marianan i tanoh Masir ma Israel, i tanoh Gosen, anjaha totap ma sidea ijai; marginompari anjaha roh bueini ma sidea.
28Anjaha manggoluh ope sapuluh pitu tahun nari si Jakob i tanoh Masir, ase saratus ompat puluh pitu tahun ma umur ni si Jakob.
29Bani na laho jumpah ajal ni si Israel, idilo ma anakni si Josep, nini ma dompaksi, “Anggo na idop do uhurmu bangku, tampeihon ma tanganmu i toruh ni popatkon, paboa na ra do ho mambahen idop ni uhur pakon habujuron hu bangku. Ulang ma tanom ahu i tanoh Masir,
30ai sihol do rap modom ahu pakon ompung. Halani ai maningon boanonmu do ahu hun tanoh Masir on, anjaha tanomonmu ahu i panimbunan ni sidea.”
31Nini si Jakob ma, “Bulawankon ma hu bangku! Jadi ibulawankon ma hu bani.” Dob ai manombah ma si Israel dompak luluan ni podomanni.