Dual PanelIpasu-pasu si Jakob si Manase pakon si Efraim
1Dob salpu na masa on, adong ma na patugahkon hubani si Josep, “Boritan do bapanta!” Jadi iarahkon ma anakni na dua ai, si Manase pakon si Efraim.
2Adong ma na patugahkon hubani si Jakob, “Roh do anakmu si Josep bamu,” gabe iparpala-palai ma hundul i podomanni.
3Nini si Jakob ma dompak si Josep, “Domma ipatalar Naibata Pargogoh na so tarimbang in diri-Ni hu bangku i huta Lus, i tanoh Kanaan, anjaha ipasu-pasu do ahu.
4Nini do hu bangku, ʻTonggor ma, Hutumpak pe ho marginompar anjaha Hupabuei pe ho, Hubahen pe ho gabe hulanan ni bangsa-bangsa anjaha Hubere pe tanoh on hubani ginomparmu gabe rupei ni sidea sadokah ni dokahni.ʼ
5On pe, haduasi anakmin, na tubuh bam i tanoh Masir, sanggah lape roh ahu marayak ho hu tanoh Masir on, ahu do simadasi; ahu do simada si Efraim pakon si Manase usih songon si Ruben pakon si Simeon.
6Tapi ginompar na dob tubuh bam dob sidea, ho ma simadasi; goran ni abang ni sidea in ma panggoranonkon ni sidea bani parbagianan ni sidea.
7Ai sanggah na roh ahu hun Padang Aram, matei do si Rahel i tanoh Kanaan, i tongah dalan dohorhon huta Eprata, lanjar ijai do ia hutanom, bani dalan laho hu Eprata, ai ma Betlehem.”
8Sanggah iidah si Israel anak ni si Josep ai, nini ma, “Ise do on?”
9Nini si Josep ma dompak bapani ai, “Pahompumu do sidea, na binere ni Naibata hu bangku ijon.” Dob ai nini ma, “Togu ma sidea hu lambungkon, ase hupasu-pasu sidea.”
10Ia mata ni si Israel domma rambon halani tuani, lang be torang ia marpangidah. Jadi ipadohor si Josep ma sidea hubani bapani, gabe isummah ma sidea anjaha idahop.
11Nini si Israel ma dompak si Josep, “Domma huidah bohimu, lang pangarapan ni uhurhu, anjaha tonggor ma, dihut do ginomparmu ipataridahkon Naibata hu bangku.”
12Dob ai itogu si Josep ma sidea hun abinganni, jadi manrogop ma ia hu tanoh i lobeini.
13Dob ai ijolom si Josep ma sidea haduasi, si Efraim i siamunni tontang sambilou ni si Israel, anjaha si Manase i sambilouni, tontang siamun ni si Israel, jadi ipadohor ma sidea hu bani.
14Tapi ipagostong si Israel ma tangan siamunni anjaha inahkon bani ulu ni si Efraim, age pe ia sianggian, anjaha sambilouni bani ulu ni si Manase, ase marsilang do tanganni, age pe si Manase sikahanan.
15Dob ai ipasu-pasu si Israel ma si Josep, nini ma, “Naibata, na hinabiaran ni ompung, si Abraham pakon si Isak, Naibata na marmahan ahu sadokah ahu adong ronsi nuan,
16Malekat na paluah ahu humbani sagala parmaraan, Ia ma na mamasu-masu dakdanak na dua on; sai tarambilan ma goranku ampa goran ni ompung si Abraham pakon si Isak marhitei sidea; sai manggargar anjaha lambin bueini ma sidea i tanoh on.”
17Tapi dob iidah si Josep, na tinampeihon ni bapani ai tangan siamunni ai hubani ulu ni si Efraim, sogam ma uhurni mangidahsi, gabe ijolom ma tangan ni bapani ai paosorhon humbani ulu ni si Efraim hubani ulu ni si Manase.
18Nini si Josep ma dompak bapani, “Lang sonin bapa, ai on do sikahanan, tampeihon ham ma tanganmu siamun hubani uluni.”
19Tapi manjua do bapani ai, nini ma, “Hubotoh do, anakku, hubotoh do; ia pe gabe sada bangsa do, anjaha banggal do age ia; age pe sonai, sai na banggalan do anggini magira ase ia, anjaha ginomparni gabe hulanan ni bangsa-bangsa.”
20Jadi ipasu-pasu ma sidea bani na sadari ai, nini ma, “Ibagas gorannima do mamasu-masu halak Israel, marhitei na mangkatahon: Ibahen Naibata ma ho songon si Efraim pakon si Manase! Ase parlobei ma si Efraim ipasu-pasu humbani si Manase.”
21Dob ai nini si Israel ma dompak si Josep, “Tonggor ma, na laho matei mando ahu, tapi Naibata do mangkasomani hanima, anjaha bobahonon-Ni do hanima mulak hu tanoh ni ompungnima.
22Anjaha domma hubere sada raboyon, hasurunganmu humbani saninamu, na hubuat humbani halak Amori marhitei podang pakon panahku.”