Alkitab Mobile SABDA
[VER] : [SIMALUNGUN]     [PL]  [PB] 
 <<  Kejadian 49 >> 

Pasu-pasu ni si Jakob hubani Anakni

1Dob ai idilo si Jakob ma anakni ai, nini ma, “Martumpu ma hanima, ase hupatugah bennima aha na masa bennima magira.

2Martumpu ma hanima anjaha tangar ma, alo anak ni si Jakob! Tangar hanima ma si Israel, bapanima.

3Alo Ruben, ho do bunga tubuhku, gogohku pakon parmulaan ni kuasangku, sisurungan bani hamuliaon sisurungan bani hagogohon,

4anjaha na marjullak-jullak songon bah; seng be ho sisurungan, ai inaiki ho do podoman ni bapamu; ibutaki ho do ai, ipanangkih ho do podomanku.

5Na martinodohon do si Simeon pakon si Levi; sinjata hakorason do podang ni sidea.

6Sai ulang ma saor tonduyhu bani parriahan ni sidea, sai ulang ma marsada uhurhu pakon partumpuan ni sidea; ai ibagas ringis ni sidea ibunuhi do halak, anjaha ibagas hajungkaton ni sidea itagili do lombu.

7Bursik ma ringis ni sidea, ai parah do ai, ampa gila ni sidea, ai bajan do ai. Bagi-bagihononku do sidea itongah-tongah ni ginompar ni si Jakob, anjaha eraponku do sidea itongah-tongah ni Israel.

8Alo Juda, sipujion ni saninamu do ho; odoh bani tangkuhuk ni munsuhmu do magira tanganmu; marsombah hu bam do anak ni bapamu.

9Anak ni singa do Juda; domma manaek ho, anakku, marhitei panorohon. Manggompang, modom-modom do ia songon singa tunggal, songon singa boru-boru; ise ma na pag mamuhoisi?

10Seng na meret tungkot harajaon humbani si Juda, barang tampuk ni pamarentahan hun holangkolang ni naheini, paima roh si Silo, anjaha Ia do siirikkonon ni sagala bangsa.

11Tambatonni ma halodeni hu bona ni hayu anggur pakon anak ni halodeni boru-boru hubona ni hayu anggur na pinilih; taptaponni ma hiouni bani anggur anjaha bajuni bani gotah ni hayu anggur.

12Gerger ma matani halani anggur, saksak ma iponni halani dadih.

13Marianan i topi ni laut do si Sebulon, i labuhan ni kapal, sabalog pakon Sidon.

14Halode simapir holi-holi do si Isasar, na manggompang i holangkolang ni harang;

15anggo iidah jenges do parsaranan ai anjaha lambut do tanoh ai, ipaunduk ma abarani laho mamorsan, gabe halak parrodi ma ia.

16Uhumon ni si Dan do bangsani songon sada marga ni Israel.

17Songon ulog i biding ni dalan na bolon do si Dan magira, sada ulog darih i biding ni dalan, na mamagut tambirik ni huda, gabe madabuh hu pudi na mangajaksi.

18Hatuahonmu in do na huhasiholhon ale Jahowa!

19Sosakon ni sipanosak do si Gad, tapi sosakonni do sidea use.

20Mantin do sipanganon ni si Asser; ia do siidangkon sipanganon hasoloan ni raja.

21Ursa boru-boru na maluah do si Naftali, siluarhon hata na jenges-jenges.

22Hayu na marbuah na poso do si Josep, hayu na marbuah na poso bani bah tubuh; dangkahni manlangkahi dingding.

23Ipasoru-soru parsior do ia, itembak anjaha iparburu-buru,

24tapi totap do siorni, anjaha gogoh do botohon ni tanganni, marhitei tangan ni puanglima ni si Jakob, marhitei goran ni Siparmahan, Batu gingging ni si Israel.

25Marhitei Naibata ni bapamu, na mangurupi ho, marhitei Naibata pargogoh na so tarimbang, na mamasu-masuhon bam pasu-pasu na hun langit na i atas, pasu-pasu na hun luhung na i toruh, pasu-pasu na hun bagod panusuan ampa parnaibataan.

26Surungan do pasu-pasu ni bapamu humbani pasu-pasu ni dolog na sadokah ni dokahni, humbani buntu-buntu na sadokah ni dokahni; sai sogop ma in hu ulu ni si Josep, hu sitabolan ni na tarpilih i tongah-tongah ni saninani.

27Gipul sipanoroh do si Benjamin, na mangankon sorohan sogod, anjaha na marbagi taban-taban bodari.

28Ai ma haganup marga ni Israel na sapuluh dua in; anjaha ai ma na ipatugah bapa ni sidea hubani sidea laho mamasu-masu sidea; ipasu-pasu ma sidea marhitei pasu-pasu na romban hubani ganup sidea.

Tonah ni si Jakob na Parpudi pakon Parmateini

29Dob ai martonah ma ia nini ma dompak sidea: Sipatumpuon hubani bangsangku do ahu; tanom hanima ma ahu i lambung ni ompungku, i liang na i juma ni si Epron, marga Het ai,

30i liang na i juma Makpela, tontang ni Mamre, na i tanoh Kanaan, na binoli ni si Abraham rap pakon juma humbani si Epron marga Het ai, gabe tanoman parsandirian.

31Hujai do itanom si Abraham pakon si Sarah, parinangonni ai; hujai do itanom sidea si Isak pakon si Rebekka, parinangonni ai, anjaha ijai do hutanom si Lea.

32Juma ai pakon liang na ibagas ai, na binoli do ai humbani halak Het.

33Jadi dob salpu si Jakob na martonah ai hubani anakni ai, itarik ma naheini hu atas podomanni; rotap ma hosahni, jadi ipatumpu ma ia hubani hasomanni sabangsa.


  Share Facebook  |  Share Twitter

 <<  Kejadian 49 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran