Alkitab Mobile SABDA
[VER] : [SIMALUNGUN]     [PL]  [PB] 
 <<  Keluaran 3 >> 

Pardilo ni Naibata bani si Musa

1Tapi si Musa do na marmahan biribiri ni si Jetro, tulangni ai, malim ni halak Midian. Bani na sahali ialai ma biribiri ai salpu halimisan ai, das ma ia hu Dolog ni Naibata, hu Horeb.

2Jadi taridah ma bani malekat ni Jahowa, ibagas gajag ni apuy, hun tongah-tongah ni naporon. Dob ai itorih ma, ididah ma apuy gajag ibagas naporon ai, tapi seng mosog naporon ai.

3Nini si Musa ma, “Laho ma ahu hujai mangidah halongangan bolon ai, mase ma tongon lang mosog naporon ai?”

4Tapi dob ididah Jahowa ia sihol roh mangidah, dilo-dilo ma Naibata hubani hun tongah-tongah ni naporon ai, nini ma, “Musa, Musa!” nini ma, “Ijon do ahu.”

5Dob ai nini ma, “Ulang dohori hujon; tanggali ma sipatumin humbani naheimin, ai tanoh na pansing do hajongjonganmon.”

6Nini ope, “Ahu do Naibata ni bapamu, Naibata ni si Abraham, Naibata ni si Isak pakon Naibata ni si Jakob.” Jadi irongkob si Musa ma bohini, halani biarni mangidah Naibata.

7Dob ai nini Jahowa ma, “Domma tangkas Huidah sahit ni panaronon ni bangsang-Ku na i tanoh Masir, anjaha domma Hutangar doruh-doruh ni sidea halani pambahen ni na mangarsik-arsik sidea; domma Hubotoh sitaronon ni sidea.

8Halani ai do ase tuad Ahu paluahkon sidea hun tangan ni halak Masir, anjaha paluarhon sidea hun tanoh on hu tanoh na madear anjaha na lumbang, hu tanoh habaoran ni dadih pakon manisan, hu tanoh ianan ni halak Kanaan, Het, Amori, Peresi, Hewi pakon Jebus.

9On pe, tonggor ma, domma das doruh-doruh ni halak Israel hu Bangku, anjaha domma Huidah homa pangarsikon ni halak Masir hubani sidea.

10On pe, laho ma ho, Husuruh ma ho marayak Parao, ase ipadarat ho bangsang-Ku, halak Israel hun tanoh Masir.”

11Tapi nini si Musa ma dompak Naibata, “Ise ma ahu, ase ahu laho marayak Parao, anjaha padaratkon halak Israel hun Masir?”

12Nini ma, “Huhasomani pe ho; on ma tandani bam paboa Ahu do na marsuruh ho; ia dob ipadarat ho bangsa ai hun tanoh Masir, pasangaponnima ma Naibata i atas dolog on.”

13Dob ai nini si Musa ma dompak Naibata, “Tonggor ma, anggo das ma ahu hubani halak Israel anjaha huhatahon dompak sidea, ?Naibata ni ompung nasiam do marsuruh ahu hubani nasiam,? gabe ihatahon sidea holi hu bangku, ?Ise ma goran-Ni? Aha ma balosku dompak sidea??”

14Nini Naibata ma dompak si Musa, “Ahu Adong na Ahu Adong.” Nini ope, “Sonon do hatahononmu hubani halak Israel, ?Ahu Adong do na marsuruh ahu hubani nasiam.?”

15Nini Naibata ope dompak si Musa, “Sonon do hatahononmu hubani halak Israel, ?Jahowa Naibata ni ompung nasiam, Naibata ni si Abraham, Naibata ni si Isak pakon Naibata ni si Jakob marsuruh ahu hubani nasiam.? Ai ma goran-Ku sadokah ni dokahni, anjaha sonai ma goran-Ku diloon marsundut-sundut.

16Laho ma ho, patumpu ma sagala partua-partua ni Israel, hatahon ma dompak sidea, Jahowa, Naibata ni ompung nasiam, na dob taridah bangku, Naibata ni si Abraham, si Isak pakon si Jakob do na mangkatahon, ?Domma itatap uhur-Hu nasiam sonai age na ibahen hubani nasiam i tanoh Masir.

17Domma Huhatahon sai padaraton-Ku do hanima humbani hamarsikon ni Masir hu tanoh ni halak Kanaan, Het, Amori, Peresi, Hewi pakon Jebus, hu tanoh habaoran ni dadih pakon manisan.

18Sai balosan ni sidea do soramu; laho ma ho pakon partua-partua ni Israel mangadap raja ni Masir, anjaha hatahon hanima ma dompaksi. Jahowa, Naibata ni halak Heber marjumpahkon hanami; on pe, lopas ham ma hanami laho hu halimisan tolu ari mardalan daohni, ase igalangi hanami Jahowa Naibatanami.

19Tapi domma Hubotoh hinan, seng anjai lopason ni raja ni Masir hanima laho, age marhitei tangan na gogoh.

20Tapi pagostongon-Ku ma tangan-Ku laho mambogbogi Masir marhitei buei halongangan, na sihol bahenon-Ku i tongah-tongah ni sidea; dob ai palopasonni ma hanima laho.

21Dapotan idop ni uhur pe bangsa on humbani halak Masir bahenon-Ku; ase anggo mandarat holi hanima, lang mandarat lumei tumang.

22Tapi pindoon ni ganup puang-puang ma humbani hombar rumahni pakon humbani tondokanni ugas pirak, ugas omas pakon hiou, sipakeihononnima ma ai hubani anak pakon borunima; sonai ma ayobonnima halak Masir.?”


  Share Facebook  |  Share Twitter

 <<  Keluaran 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran