Alkitab Mobile SABDA
[VER] : [SIMALUNGUN]     [PL]  [PB] 
 <<  Kidung Agung 8 >> 

1Porini botouhu ham, na minum humbani bagod ni inang. Anggo jumpah ahu ham i darat, summahonku do ham, anjaha ise pe lang na mangkata.

2Arahkononku ma ham anjaha boanonku hu rumah ni inang, hubagas kamar ni na mantubuhkon ahu. Bereonku ma ham minum anggur na irarui, bah ni buah dalima.

3Sai tangan sambilouni ma mangkalang ulungku, tangan siamunni manrohop ahu.

4Hupabija ma nasiam, ale boru Jerusalem, ase ulang iganggu atap ipuhoi nasiam na marsihaholongan ronsi sombuh uhurni.

5Ai ise do ai tangkog hun halimisan, mangunsandei bani haholonganni? I toruh ni hayu untei manis do hupuhoi ho. Ijai do inangta mangarou ham, ijai do ia mangarou mantubuhkon ham.

6Bahen ma ahu gabe tintin pansap bani tontonmu, gabe tintin pansap bani tanganmu! Gogoh do holong ai songon hamatean, golgol songon nagori toruh do oji ni uhur ai. Gajag do ai songon gara ni apuy, jimbur-jimburni songon jimbur humbani Jahowa.

7Seng tarintopi bah banggal holong, barang tarayubkon bah mabaor ia. Porini pe ibere halak ganup arta na adong i rumahni mambuat holong ai, hona apasan do ia ijai.

8Adong do sada botounami na etek-etek, seng dong ope adopni. Aha do bahenonnami bani botounami, anggo roh hata ni halak bani?

9Ambit tembok ia, pajongjongonnami do i atasni tayub pirak, anjaha ambit labah ia, runggaonnami do ia bani papan hayu ares.

10Tembok do ahu anjaha songon menara do adopku. Dapot panonggorni do ahu, songon halak na jumpahan tuah.

11Adong do bani si Salomo sada pohon anggur i Baal-Hamon, iondoskon do pohon anggur ai bani halak si parjaga; ganup maningon mambere saribu sekel pirak boli ni buahni ai.

12Ia pohon anggurhu, ahu tumang do simadasi; bamu ma, ale Salomo, sisaribu sekel pirak ai, anjaha dua ratus bani si parjaga buahni ai.

13Ham ale na marianan bani pohon ai, manangi-nangi do huan-kuanku bani soramu; pabogeihon ma soramu bangku.

14Papodas ma, ale haholonganku; usih bani balua ma ham, bani ursa na maposo i atas ni dolog rium-riuman.


  Share Facebook  |  Share Twitter

 <<  Kidung Agung 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2023
Alkitab.SABDA.org

Android.SABDA.org
SABDA.mobi
Bantuan
Dual Panel Dual Panel

Laporan Masalah/Saran