Dual PanelJesus i Lobei ni si Latus ampa si Herodes
1Dob ai misir ma sidea haganup na marrunggu ai, iboan sidea ma Ia hu lobei ni si Latus.
2Iaduhon sidea ma Ia, nini ma, “Na dapot hanami do on pakahouhon bangsanami, anjaha ipandang do bereon balasting bani kesar, anjaha ihatahon, Kristus, Raja do Ia.”
3Jadi nini si Latus ma manungkun-Si, “Raja ni Jahudi do Ham tongon?” Jadi nini ma mambalosisi, “Songon na hinatahonmu ai ma!”
4Jadi nini si Latus ma dompak sintua ni malim ampa halak na mabuei ai, “Seng dong dapot ahu salah ni Halak on.”
5Tapi lambin igogohi sidea do mangkatahon, “Geor do ibahen bangsa in marhitei pangajarion-Ni i sab tanoh Judea, mamungkah hun Galilea das hujon.”
6Manangar ai si Latus, isungkun ma atap halak Galilea do Ia.
7Anjaha dob ibotoh, na humbani gomgoman ni si Herodes do Ia, isuruh ma Ia hu lobei ni si Herodes, ai tudu i Jerusalem do ia ijia.
8Dob ididah si Herodes Jesus, malas ma uhurni, ai domma dokah hinan sihol idahonni Ia, dob itangar barita-Ni, anjaha iarap uhurni do, idahonni sada tanda sibahenon-Ni.
9Buei do isungkun hu Bani, tapi seng ibalosi Jesus ia.
10Ijai do sintua ni malim ampa sibotoh surat, anjaha gogoh do pangaduhon ni sidea Bani.
11Ia si Herodes ampa tentarani, ipahiri anjaha iapasi do Ia, dob ai isuruh ma Ia mulak hubani si Latus marpakeian na harga.
12Mulai bani ari ai marhuan ma si Herodes ampa si Latus, i lobei ni ai marsidomdoman do sidea.
Jesus Iuhum Marutang Hosah
13Dob ai idilo si Latus ma martumpu sintua ni malim, pangintuai-pangintuai ampa halak na mabuei ai, gabe nini ma dompak sidea,
14“Iboan nasiam do bangku Halak on, sipabalik bangsa, nini nasiam. I lobei nasiam do hupareksa Ia, tapi seng dong jumpah ahu salah bani Halak on, domu hubani pangaduan nasiam ai.
15Si Herodes pe sonai do, isuruh do Ia mulak bennami, ase seng dong pambahenan-Ni, na patut mambahen marutang hosah Ia.
16Halani ai nalonsingi ma Ia, ase napaluah.”
17Ai aturan do ai, paluahonni sada halak bani sidea sanggah pesta ai.
18Tapi sasora do sidea haganup mandilohon, “Bunuh Ia! Si Barrabas ma paluah bannami!”
19Ia si Barrabas on tartutup do halani pambarontakan ampa pambunuhon na masa i kota ai.
20Jadi iulaki si Latus ma marsahapkon sidea, ai sihol paluahonni do Jesus.
21Tapi sai dilo-dilo ma sidea, “Parsilangkon ma Ia, parsilangkon ma!”
22Dob ai ihatahon ma patoluhalihon bani sidea, “Ai aha do na jahat ibahen? Seng dong jumpah ahu Bani na boi mambahen marutang hosah Ia. Halani ai nalonsingi ma Ia, ase napaluah.”
23Tapi ipagogoh sidea bei ma sorani mangindohon hu bani, ase iparsilangkon Ia, gabe saud ma surak-surak ni sidea ai.
24Jadi iputuskon si Latus ma pasaudkon pangindoan ni sidea ai.
25Ipaluah ma halak na pinindo ni sidea ai, na tinutup ai halani manggeori ampa mambunuh, tapi Jesus ipadas ma bani rosuh-rosuh ni sidea.
Jesus Iboan hu Dolog Golgata
26Sanggah na mamboan-Si ai sidea, itangkap sidea ma sada halak, na margoran si Simon, na hun Kirene, na roh hun jumani; hu bani ma ipaporsankon sidea silang ai, laho mamboan ai paihut-ihut Jesus.
27Buei do halak humbani bangsa ai ampa puang-puang na mangirikkon-Si, na marhoru anjaha na tangis-tangis marhalani-Si.
28Jadi idompakkon Jesus ma sidea, nini ma, “Nasiam Boru Jerusalem, ulang ma Ahu tangisi nasiam, tapi diri nasiam ma tangisi nasiam ampa anak nasiam!
29Ai na roh ma arini, hatahonon ni halak ma ijai, ʻMartuah ma na lambang, ampa parinangon na so ongga tubuhan tuah, ampa adop na so ongga painumkon!ʼ
30Ijai ma hatahonon ni halak bani dolog, ʻJobjobi ma hanami!ʼ ampa bani dolog-dolog, ʻRungkubi ma hanami!ʼ
31Ai anggo sonon pambahen ni sidea bani hayu na matah, bani hayu na masak, sonaha ma nani?”
32Adong ope iboan dua halak nari parjahat, sibunuhon rap pakon-Si.
Tarsilang Jesus
33Ase dob das sidea bani ianan na margoran Partangkurakan, iparsilangkon sidea ma Ia ijai rap pakon parjahat na dua ai, na sada hu siamun-Ni anjaha na sada nari hu sambilou-Ni.
34Jadi nini Jesus ma, “Ham Bapa, marpangulaki ma uhur-Mu, ai seng ibotoh sidea na binahenni ai!” Marjomput na sinurat do sidea marbagi hiou-Ni.
35Jongjong do ijai halak na mabuei ai manonggor, tapi manrehei do pambobai ni sidea, nini ma, “Na legan ipaluah, mahua diri-Ni ma ipaluah, anggo na tongon do Ia Kristus, na pinilih ni Naibata!”
36Tapi dihut do tentara ai mandoruni-Si, ipadohor sidea ma, laho mamberehon na migar Bani,
37lanjar nini sidea ma, “Anggo raja ni Jahudi do Ho, paluah ma diri-Mu!”
38Dong do homa tarsurat i babou-Ni: On do Raja ni Jahudi.
39Tapi sada humbani parjahat na gantung ai manrehei-Si, “Ai lang Kristus do Ho? Paluah ma diri-Mu ampa hanami!”
40Jadi marbalos ma hasomanni ai, nini ma mangkatasi, “Seng ihabiari ho hape Naibata, age pe rap hona uhum hita?
41Uhum na pintor do mangonai banta, ai ijalo hita do upah ni pambahenanta. Tapi anggo Ia, seng dong ihorjahon na so patut.”
42Lanjar nini ma, “Ham Jesus, ingat Ham ma Ahu, anggo das ma Ham bani Harajaon-Mu.”
43Jadi nini Jesus ma hu bani, “Sintong do hatang-Kon bam, sadari on rap pakon Ahu ma ho i Paradeiso!”
Parmatei ni Jesus
44Anjaha hira-hira pukul sapuluh dua, sogop ma na golap hu sab tanoh in das hu pukul tolu.
45Ai manggolapi do mata ni ari, anjaha marigat do tirei, na i rumah panumbahan ai, bolah dua.
46Dob ai marsora na gogoh ma Jesus, nini ma, “Ham Bapa! Hubagas tangan-Mu ma Huondoskon Tonduy-Hu.” Jadi dob ihatahon sonai, rotap ma hosah-Ni.
47Mangidah na masa ai kopala ni tentara ai, ipasangap ma Naibata, nini ma, “Tongon do, Halak na pintor do on!”
48Anjaha ganup halak na mabuei ai, na roh hujai, marsitompuk tontonni bei ma mangidah na masa ai, lanjar mulak ma.
49Tapi mandaoh-daoh do jongjong mangidah-Si sagala na manandai-Si, sonai naboru na mangirikkon-Si hun tanoh Galilea.
Tartanom Jesus
50Jadi adong ma sada halak na margoran si Josep, pagori ni rapot bolon, paruhur na bujur anjaha na pintor.
51Seng dear uhurni bani riah ampa pambahenan ni sidea ai. Hun Arimatea, na i tanoh Judea do ia, anjaha dihut do ia paima-imahon Harajaon ni Naibata.
52Laho ma ia bani si Latus mangindo bangkei ni Jesus.
53Ipaturun ma bangkei ai, ibaluti ma bani hiou putih, anjaha ipatibal ma hubagas tanoman na niliangkon bani batu, seng ongga ope tibal barang ise ijai.
54Ari parugasonkon do ijia, anjaha laho mulai ma Sabat.
55Tapi dihut do deba naboru-naboru, na roh rap pakonsi hun Galilea; ipardiatei sidea do tanoman ai ampa partibal ni bangkei ai.
56Dob ai mulak ma sidea, anjaha ipasirsir sidea ma rium-riuman ampa minak na misbou. Layur ari Sabat ai marsaran do sidea, domu hubani titah in.