Dual PanelSusian Naboru
1Salpu ai ibontas Jesus ma sagala huta-huta ampa dusun laho marambilan, mamaritahon Harajaon ni Naibata. Na sapuluh dua ai do hasoman-Ni,
2sonai homa deba naboru, na dob pinamalum-Ni humbani tonduy na jahat ampa naborit, ai ma si Maria, na margoran si Magdalena, na tinadingkon ni pitu setan,
3ampa si Johanna, parinangon ni si Kusa, sijolom anakkunsi ni si Herodes, ampa si Susanna ampa buei halak na legan, na mangurupi sidea marhitei na dong bani.
Limbaga Pasal Panabur ampa Artini
4Ase dob martumpu buei jolma anjaha marrohan hu Bani halak humbani huta-huta ai, nini ma marhitei limbaga,
5“Laho ma sada halak panabur manaburhon bonih. Jadi sanggah na manabur ai ia, adong ma deba na madabuh hu dalan, gabe tardogei ma anjaha ipaguti manuk-manuk na i awang-awang.
6Na deba madabuh bani batu, tapi dob tubuh, melus ma, halani lang marbah.
7Na deba madabuh hu tongah-tongah ni parhupi-hupian; rap tubuh ma hupi-hupi ai pakon ai, gabe ipisat ma.
8Ia na legan ai madabuh ma bani tanoh na madear, anjaha dob tubuh iparbuahkon ma saratus lompit.” Dob ihatahon sonai, idilohon ma, “Barang ise na marpinggol, na marpambogei, itangihon ma!”
9Jadi dob isungkun susian ai, atap aha do arti ni limbaga ai,
10gabe nini ma, “Ibere do bennima habotohon pasal rusia ni Harajaon ni Naibata, tapi bani halak na legan pitah marhitei limbaga do, ase ulang ididah age pe ikawahkon, anjaha seng iarusi age pe ibogei.
11Anjaha on do arti ni limbaga ai: Ia bonih ai, ai ma hata ni Naibata.
12Anggo na bani dalan ai, ai ma na mambogei ai; dob ai roh ma sibolis, ibuat ma hata ai hun bagas uhur ni sidea, ase ulang porsaya anjaha maluah sidea.
13Ia na bani batu ai, ai ma na marmalas ni uhur manjalo hata ai dob ibogei; tapi seng marurat ai, sangombas do sidea hansa porsaya, anjaha bani panorang parlajouan marbalik ma sidea.
14Tapi anggo na madabuh hubani parhupi-hupian ai, ai ma na mambogei ai; tapi tarpisat do hata ai ibagas goluh ni sidea halani holsoh, habayakon ampa hisap-hisap ni goluh on, gabe seng saud matoras buahni.
15Tapi anggo na bani tanoh na madear ai, ai ma na manimpan hata na binogeini ai ibagas uhur na bonar anjaha na madear, gabe saud ma marbuah ibagas sabar ni uhur.
16Seng dong halak na mannahiti palita, dob ai irongkobkon tumba hujai, barang inahkon ai hu toruh ni podoman; hu parpalitaan do ibahen, ase ididah sagala na roh palita ai.
17Ai seng dong na ponop, na so talar use; anjaha seng dong rusia na so tarbotoh use anjaha talar.
18Halani ai, pangkei ma hanima, sonaha pambogeinima! Ai bani na marnadong, bereon ope bani, tapi na so marnadong, buaton ope humbani na adong ai bani, ninuhurni.”
Sindohor ni Jesus na Sintong
19Dob ai roh ma inang-Ni pakon anggi-Ni marayak-Si, tapi seng tarbahen sidea das hu lobei-Ni halani buei ni jolma.
20Jadi adong ma na patugahkon hu Bani, “Jongjong do i darat an inang ampa anggi-Mu; sihol idahon ni sidea do Ham.”
21Tapi nini Jesus ma mambalosi sidea, “Ia inang-Ku ampa angging-Ku, ai ma na mambogei ampa na mangkorjahon hata ni Naibata.”
Ipaminop Jesus Tao
22Bani na sadari masuk ma Ia hu parau rap pakon susian-Ni, lanjar nini ma hubani sidea, “Dipari hita ma tao on!” Dob ai laho ma sidea.
23Sanggah na marparau ai sidea, tarpodom ma Ia. Roh ma ampilaos hu tao ai, gabe masuk ma bah hubagas parau ai, jadi tarsosak ma sidea.
24Ijumpahkon sidea ma Ia, nini sidea ma mamuhoi-Si, “Guru, Guru, magou ma hita.” Jadi dob puho Ia, hona hata ma logou ampa bah na margilumbang ai ibahen, gabe soh ma anjaha minop.
25Tapi nini ma dompak sidea, “Ija do haporsayaonnima?” Mabiar do anggo sidea anjaha longang, anjaha nini sidea ma samah sidea, “Ise do nani Halak on? Logou ampa bah pe iparentah do, anjaha itangihon do Ia!”
Ipamalum Sada Halak na Setanon i Gerasa
26Jadi marlayar ma sidea hu nagori Gerasa, na padipar-dipar pakon Galilea.
27Sanggah na mandarat ai Ia, pajumpah ma Ia pakon sada halak parhuta ai, na setanon do ia; anjaha domma dokah seng ra be ia marhiou anjaha seng be i rumah marianan, tapi i tanoman mando.
28Dob ididah Jesus, mandoruhi ma ia lanjar manrogop i lobei-Ni, anjaha nini ma marsora na gogoh, “Mangaha Ham roh bangku, Jesus, Anak ni Naibata Sitimbulan in, huelek-elek ma Ham, ulang arsik Ham ahu!”
29Ai ihatahon Jesus do luar setan ai humbani jolma ai. Domma gati isoroh setan ai ia, gabe igari anjaha ibayangkon ma ia, laho manjagaisi, tapi irutuskon do gari ai anjaha ialai setan ai ma ia hu halimisan.
30Jadi isungkun Jesus ma ia, “Ise do goranmu?” Gabe ibalosi ma, “Legiun.” Ai buei do setan-setan siar bani.
31Lanjar ielek-elek sidea ma Ia, ase ulang ipaksa sidea tuad hu nagori toruh.
32Tapi adong do ijai, bani raboyon ai, babuy sahulanan bolon manggagati; jadi ipindo ma, ase ilopas sidea masuk hujai, gabe ibalosi ma.
33Jadi luar ma setansetan ai humbani jolma ai, anjaha imasuki sidea ma babuy ai, gabe mardabuhan ma babuy na sahulanan ai hun raboyon ai hubagas tao ai, lanjar marmogapan.
34Dob ididah parmahan ai na masa ai, maporus ma sidea, ibaritahon sidea ma ai i huta ai ampa i ladang.
35Jadi marrohan ma halak ai, laho mangidah na masa ai. Das ma sidea bani Jesus anjaha jumpah sidea ma halak, na dob tinadingkon ni setansetan ai, marhiou anjaha torang maruhur, hundul i lambung nahei ni Jesus, gabe mabiar ma sidea.
36Jadi ipatugah halak na mangidah ai ma bani sidea, sonaha parmalum ni na siniaran ni setansetan ai.
37Jadi ielek-elek haganup pangisi ni nagori inggot ni Gerasa ai ma Ia, ase surut Ia humbani sidea, ai mabiar tumang do sidea. Jadi masuk ma Ia hu parau ai, lanjar mulak ma.
38Ia halak, na tinadingkon ni setansetan ondi, ipangindo do Bani, atap boi do ia mangkasomani-Si. Tapi isuruh ma ia mulak, nini ma,
39“Mulak ma ho hu rumahmu, baritahon ma haganup na binahen ni Naibata hu bam!” Jadi laho ma ia, ibaritahon ma bani haganup huta ai, haganup na binahen ni Jesus hu bani.
Ipagoluh Jesus Boru ni si Jairus; Ipamalum homa Sada Naboru na Boritan
40Ase dob mulak Jesus, ialo-alo halak na mabuei ai ma Ia, ai haganup do sidea paima-imahon-Si.
41Jadi roh ma sada halak, na margoran si Jairus; sintua ni parguruan do ia. Manrogop ma ia i lobei ni nahei ni Jesus mangindohon, ase roh Ia hu rumahni,
42ai laho matei do boru sasadani, na marumur sapuluh dua tahun. Sanggah na laho hujai Ia, iasak-asak halak na mabuei do Ia.
43Jadi adong ma sada naboru, na dob sapuluh dua tahun sai marnunut roh pantang ni hiouni, anjaha seng dong na boi pamalumkonsi.
44Roh ma ia hun pudi-Ni, anjaha ijamah ma rambu ni hiou-Ni, gabe mintor soh ma daroh ai.
45Jadi nini Jesus ma, “Ise do na manjamah Ahu?” Dob haganup mangkatahon lang, nini si Petrus ampa hasomanni ai ma, “Guru, na mabuei in do maronjat-onjat manosak Ham!”
46Tapi nini Jesus ma, “Adong do na manjamah Ahu, ai Huahap do luar gogoh hun Bangku.”
47Ase dob ididah naboru ai, na so tarponopkon hape pambahenan ai, roh ma ia hitir-hitir, ipajojor ma i lobei ni haganup na mabuei ai aha halani, ase ijamah Ia, ampa parmalumni bani na satongkin ai.
48Jadi nini ma hu bani, “Haporsayaonmu do na pamalum ham inang, mulak ma ham ibagas damei!”
49Mangkatahon ai ope Ia, adong ma na roh hun rumah ni sintua ni parguruan ai, na mangkatahon, “Domma matei borumu, ulang pala be lojai ham Guru in!”
50Mambogei ai Jesus, ibalosi ma ia, “Ulang ham mabiar, porsaya ma lah, sai manggoluh do ia.”
51Dob das Ia hu rumah ai, seng ilopas barang ise pe masuk sobali si Petrus, si Johannes ampa si Jakobus, ambah ni ai bapa ampa inang ni dakdanak ai.
52Doruh-doruh do haganup manangisi na matei ai, tapi nini Jesus ma, “Ulang nasiam tangis! Ai seng matei ia, na modom do!”
53Jadi ipartatawai sidea ma Ia, halani ibotoh sidea, na dob matei do ia.
54Tapi itangkap ma tanganni, idilohon ma, “Puho ma ho, boru!”
55Gabe mulak ma tonduyni, jadi mintor puho ma, anjaha ihatahon Jesus ma bereon ia mangan.
56Longang do namatorasni ai; tapi ihatahon ma bani sidea, ase ulang ipatugah-tugah na masa ai.