Dual PanelJesus i Lobei ni si Latus
1Siangkonsi ari, manriah ma haganup sintua ni malim pakon pangintuai-pangintuai ni bangsa ai pasal Jesus, laho pamatehon-Si.
2Isangkut ma Ia anjaha iboan, laho mangondoskon-Si bani si Latus, panggomgomi ai.
Matei Mandolos si Judas
3Dob ididah si Judas, na mantahihon-Si ai, na hona uhum do hape Ia, manosal ma ia, ipaulak ma sitolu puluh pirak ondi bani sintua ni malim ampa pangintuai-pangintuai,
4nini ma, “Domma mardousa ahu, daroh ni Halak na so marsalah do hutahihon!” Tapi nini sidea ma, “Seng urusannami ai! Ho ma na pabotoh-botoh ai!”
5Jadi isampakkon ma pirak ai hubagas rumah panumbahan ai, dob ai laho ma ia mandoloskon dirini.
6Tapi ibuat sintua ni malim ma duit ai, nini ma, “Seng bulih pamasukon in hubagas parartaan ni rumah panumbahan, ai boli ni daroh do in!”
7Dob manriah sidea, ibolihon sidea ma ai bani tanoh ni sipauli hudon bahen tanoman ni halak dagang.
8Halani ai do, ase igoran ianan ai tanoh daroh ronsi sadari on.
9Gabe jumpah ma hata ni Nabi Jeremias, na mangkatahon, “Ibuat sidea ma duit pirak na tolu puluh ai, ai ma boli na dob tinontuhon i tongah-tongah ni anak ni Israel,
10anjaha ibere sidea ma ai mamboli tanoh ni sipauli hudon, songon na hinatahon ni Tuhan in bangku.”
Iuhumi si Latus Jesus
11Jongjong do Jesus i lobei ni panggomgomi ai, anjaha isungkun panggomgomi ai ma Ia, nini ma, “Atene, Ham do raja ni halak Jahudi?” Jadi nini Jesus ma, “Songon na hinatahonmu ai ma tongon.”
12Anjaha sanggah na mangadu-adu ai sintua ni malim ampa pangintuai ni bangsa ai dompak-Si, seng dong marbalos Ia.
13Jadi nini si Latus ma hu Bani, “Ai seng itangar Ham buei ni na sinaksihon ni sidea ai dompak Ham?”
14Tapi sangkababah hata pe lang ibalosi ia, pala longang tumang panggomgomi ai.
15Tapi somal do ipaluah panggomgomi ai bani pesta ai sada halak na tartutup, atap ise na tinodoh ni halak na mabuei ai.
16Jadi adong ma ijia sada halak na tartutup na tarbarita hajahatonni, na margoran si Barabas.
17Jadi sanggah tumpu sidea, nini si Latus ma dompak sidea, “Ise do iparsinta nasiam paluahonku, si Barabas do, atap Jesus, na margoran Kristus?”
18Ai ibotoh do, halani subil ni uhur ni sidea do, ase iondoskon sidea Ia.
19Anjaha sanggah na hundul ai si Latus bani kursi paruhuman ai, martonah ma parinangonni hu bani, nini, “Ulang das ikahua ham Halak na pintor in, ai susah tumang do huahap na borngin ibagas nipingku marhalanihon-Si.”
20Tapi sai iojur-ojur sintua ni malim ampa pangintuai ni bangsa ai do halak na mabuei ai, ase ipangindo sidea paluahon si Barabas, tapi bunuhon anggo Jesus.
21Nini panggomgomi ai ma mambalosi sidea, “Ise humbani sidea na dua on iparsinta nasiam paluahonku?” Jadi nini sidea ma, “Si Barabas!”
22Nini si Latus ma hubani sidea, “Jadi, aha ma sibahenonku bani Jesus, na ginoran Kristus?”
23Haganup do sidea mangkatahon, “Parsilangkon ma Ia!”
24Jadi dob ididah si Latus, na so siat be hatani, lambin tambah tene georni, ia pe ibuat ma bah pamurihi tanganni i lobei ni halak na mabuei ai, anjaha nini ma, “Seng marsalah ahu pasal daroh ni Halak on! nasiam ma na pabotoh-botoh in!”
25Nini haganup halak na mabuei ai ma mambalosi, “Marsapata bennami ampa bani dakdanaknami pe daroh-Ni ai.”
26Dob ai ipaluah ma si Barabas, tapi anggo Jesus, dob ilonsingi, iondoskon ma bani sidea, ase iparsilangkon.
Hona Pahiri Jesus anjaha Iparsilangkon
27Jadi iboan tentara ni panggomgomi ai ma Jesus hu rumah paruhuman, anjaha ipatumpu sidea ma ganup pasukan ai hu Bani.
28Itanggali sidea ma hiou-Ni, anjaha isorungkon ma Bani baju sigerger.
29Idandan sidea ma duri bahen sortali-Ni, itampeihon ma ai bani ulu-Ni, ibere ma tolong bani tangan siamun-Ni, dob ai marsombah ma sidea hu lobei-Ni, laho pahirihirihon-Si, nini sidea ma, “Tabi ma Bamu, ale Raja ni Jahudi!”
30Lanjar itijuri sidea ma Ia, ibuat ma tolong ai humbani tangan-Ni anjaha ilonsingkon bani ulu-Ni.
31Jadi siapkonsi ipahiri sidea Ia, itanggali sidea ma baju-baju sigerger ai hun Bani, isorungkon sidea ma use baju-Ni hinan bani, dob ai iboan ma Ia, ase iparsilangkon.
32Sanggah na luar sidea, jumpah sidea ma sada halak Kirene, na margoran si Simon, ia ma ipaksa sidea mamorsan hayu parsilang-Ni ai.
33Jadi dob das sidea bani sada ianan, na margoran Golgata (artini: Partangkurakan),
34ibere sidea ma Ia minum anggur na marsaor pogu, dob idai, seng ra be Ia minum ai.
35Dob iparsilangkon sidea Ia, ibagi-bagi sidea ma hiou-Ni marhitei na manjomput na sinurat,
36lanjar hundul ma sidea ijai manjaga-Si.
37Ilongkotkon sidea do surat hu atas ni ulu-Ni, na patugahkon salah-Ni. Hatani, “On do Jesus, Raja ni Jahudi!”
38Rap pakon-Si iparsilangkon sidea do dua halak panrampok, sada hampit siamun-Ni, na sada nari hampit sambilou-Ni.
39Anjaha halak na mamontas hunjai pahiri-hirihon-Si, anjaha iupir-upirhon uluni, nini,
40“E Ho, na sihol parsedahon rumah panumbahan in, anjaha na sihol pajongjongkonsi ibagas tolu ari! Paluah ma diri-Mu, anggo na tongon do Ho Anak ni Naibata! Turun ma Ho hun hayu parsilang in!”
41Usih hujai do parpahiri ni sintua ni malim, sibotoh surat ampa pangintuai ni bangsa ai, nini sidea,
42“Na legan ipaluah, tapi diri-Ni sandiri seng tarpaluah-Si. Raja ni Israel do Ia, ai pe turun ma Ia hun hayu parsilang in, ase porsaya hanami Bani.
43Martenger ni uhur do Ia bani Naibata: Ia ma na paluahkon-Si sonari, anggo na tongon do Naibata marosuh Bani, ai nini do: Anak ni Naibata do Ahu!”
44Lanjar sonai do parpahiri ni panrampok ai, na rap iparsilangkon pakon-Si.
Parmatei ni Jesus
45Tapi humbani tongah ari ronsi pukul tolu, golap do sab tanoh in.
46Anjaha hira-hira pukul tolu marsora na gogoh ma Jesus, nini ma, “Eli, Eli, lama sabakhtani?” Artini, “Ale Naibatang-Ku, Naibatang-Ku, mase ma itadingkon Ham Ahu?”
47Mambogei ai, nini deba halak na jongjong ijai ai ma, “Na mandilo si Elias do Ia ai!”
48Jadi mintor marlintun ma sahalak humbani sidea mangalop limut, isornobkon ma ai bani na migar, anjaha ilongkotkon bani tolong laho painumkon-Si.
49Tapi na legan mangkatahon, “Paturut lobei, ase naidah, atap na roh do si Elias paluahkon-Si.”
50Iulaki Jesus ma use marsora na gogoh, dob ai iondoskon ma Tonduy-Ni.
51Anjaha tonggor ma, marigat ma tirei na i rumah panumbahan ai hun datas hu toruh, bolah dua, anjaha tanoh on dugur, batu gingging mangkabolah,
52tanoman mangkabuha, anjaha puho ma buei halak na mapansing, na dob matei,
53luar do sidea hun tanoman, dob na puho ai Ia, anjaha laho hu huta na mapansing ai pataridahkon dirini bani buei halak.
54Ase dob ididah kopala ni tentara ai, ampa sidea sijagai Jesus lalou ampa haganup na masa ai, mabiar tumang ma sidea, nini ma, “Tongon do Anak ni Naibata Ia!”
55Adong do ijai buei naboru, na jongjong manatap-natap humbani na daoh, ai ma na dob mangirikkon Jesus hun Galilea, laho marugas Bani.
56Sidea ai, ai ma si Maria Magdalena, si Maria inang ni si Jakobus ampa si Josep, ampa inang ni anak ni si Sebedeus.
Partanom ni Jesus
57Jadi dob bod ari, roh ma sada halak na bayak, na margoran si Josep, na hun huta Arimatia, na dob gabe susian ni Jesus.
58Laho ma ia hubani si Latus mangindo bangkei ni Jesus, gabe isuruh si Latus ma na padaskon ai bani.
59Jadi ijalo si Josep ma bangkei-Ni, ibaluti ma bani hiou linnen na borsih;
60itibalhon ma ai hubagas tanomanni sandiri, na baru ope, na ipatuhilhonsi bani dolog batu, anjaha dob igulang batu banggal bani babah ni tanoman ai misir ma ia.
61Ia si Maria Magdalena ampa si Maria na sada nari, hundul-hundul do ijai, tontang ni tanoman ai.
Ijagai Tanoman ni Jesus
62Patarni ai, ai ma ari, dob salpu ari parugasan ai, martumpu ma sintua ni malim ampa Parisei hu lobei ni si Latus, nini sidea ma,
63“Ham tuan, idingat hanami do, ongga do ihatahon sipangoto-otoi ondi sanggah goluh-Ni, ʻNa puho do Ahu bani ari patoluhon!ʼ
64Ai pe, suruh ham ma, ase ijaga tanoman ai das hubani ari patoluhon, ase ulang roh susian-Ni ai manangko-Si, gabe ihatahon hubani halak na mabuei in, na dob puho Ia humbani na matei, gabe samboran use holi sipaoto-oto na parpudi on humbani na parlobei ondi.”
65Jadi nini si Latus ma dompak sidea, “Adong ma parjaga ai! Laho ma nasiam, jagai nasiam ma ai pangkei-pangkei!”
66Dob ai laho ma sidea, ramot ma ibahen tanoman ai marhitei na manlak ai ampa na mambahen parjaga hujai.