Alkitab Mobile SABDA
[VER] : [SIMALUNGUN]     [PL]  [PB] 
 <<  Matius 4 >> 

Tuhan Jesus Ibagas Parlajouan

1Dob ai ibobai Tonduy in ma Jesus hu halimisan, ase ilajou sibolis Ia.

2Jadi dob marpuasa Ia ompat puluh ari ompat puluh borngin, loheian ma Ia.

3Jadi ijumpahkon sipanlajou ai ma Ia, anjaha nini ma, “Anggo Anak ni Naibata do Ham, hatahon ma, ase gabe ruti batu on!”

4Jadi nini ma mambalosi, tarsurat do, “Sedo ruti hansa hagoluhan bani jolma, tapi haganup hata ni Naibata, na luar humbani pamangan-Ni.”

5Dob ai iarahkon sibolis ai ma Ia hu huta na mapansing ai, ipajongjong ma Ia bani anjung-anjung ni rumah panumbahan ai,

6anjaha nini ma hu Bani, “Anggo Anak ni Naibata do Ham, lumpatkon Ham ma hu toruh, ai tarsurat do, ʻSuruhon-Ni do malekat-Ni manatang-natang Ho, ase ulang antuk nahei-Mu bani batu!ʼ”

7Jadi nini Jesus ma hu bani, tapi tarsurat do homa, “Seng bulih lajouonmu Tuhan Naibatamu!”

8Dob ai iulakkon sibolis ai ma mamboan-Si hubani pakpak ni dolog na gijang tumang, anjaha ipatuduhkon ma hu Bani haganup harajaon na i dunia on ampa hasangaponni.

9Jadi nini ma hu Bani, “Haganupan in hubere pe Bamu, asal ma ra Ham marsombah hu bangku.”

10Jadi nini Jesus ma hu bani, “Laho ma ho bolis! Ai tarsurat do, ʻTuhan Naibatamu do sisombahonmu, sahalak-Si do sibalosanmu!” ʼ

11Dob ai itadingkon sibolis ai ma Ia, jadi roh ma malekat-malekat marugas Bani.

Tuhan Jesus Mulai Marambilan i Galilea

12Dob ibogei Jesus na dob tartutup si Johannes, laho ma Ia hu Galilea.

13Lanjar itadingkon ma huta Nasaret, gabe laho ma Ia marianan hu huta Kapernaum, na i topi ni tao ai, i nagori Sebulon ampa Naptali,

14ase jumpah na hinatahon ni Nabi Jesayas, na mangkatahon,

15ʻNagori Sebulon ampa Naptali, na i topi ni tao ai, i dipar ni Bah Jordan, nagori Galilea, ianan ni sipajuh begu-begu,

16bangsa na marianan ibagas na golap mangidah Panondang Na Bolon, anjaha poltak do Panondang bani na marianan bani linggoman ni hamatean.ʼ

17Jadi olat ni ai mamungkah ma Jesus marambilan, anjaha nini ma, “Paubah nasiam ma uhur nasiam, ai domma dohor Harajaon nagori atas in!”

Ipilih Tuhan Jesus Susian-Ni na Parlobei

18Jadi, sanggah na mardalani Jesus i topi ni Tao Galilea, ididah ma ijai dua halak na marsanina, na manampakkon jala ni sidea hu tao ai, ai pardengke do sidea, ai ma si Simon, na ginoran Petrus, ampa saninani si Andreas.

19Jadi nini ma dompak sidea, “Eta, ihutkon nasiam ma Ahu, Hubahen pe nasiam gabe sijala jolma!”

20Jadi mintor itadingkon sidea ma jala ni sidea, laho mangihutkon-Si.

21Dob laho Ia hunjai, ididah ma use dua halak na marsanina, ai ma si Jakobus, anak ni si Sebedeus, ampa si Johannes saninani ai, hundul ibagas parau rap pakon si Sebedeus, bapa ni sidea ai, pauli-ulihon jala ni sidea. Jadi idilo ma sidea.

22Jadi mintor itadingkon sidea ma parau ai pakon bapa ni sidea, laho mangirikkon-Si.

Horja ni Tuhan Jesus i Galilea

23Jadi isiar Jesus ma ganup Nagori Galilea, laho mangajari bani parguruan ni sidea, anjaha mangambilankon Ambilan Na Madear pasal harajaon ai, lanjar pamalumkon sagala naborit ampa na niarou ni halak na ijai ai.

24Jadi tarambilan ma Ia das hu sab Tanoh Siria, iboan halak ma hu lobei-Ni sagala na boritan ampa na marsitaronon, na siniaran ni setan, na ubagon ampa na oyangon, gabe ipamalum ma sidea haganup.

25Jadi buei halak na mangirikkon-Si, ai ma hun Nagori Galilea, hun Dekapolis (Sapuluh huta), hun Jerusalem, hun Judea ampa hun nagori na i dipar ni Bah Jordan.


  Share Facebook  |  Share Twitter

 <<  Matius 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel