Alkitab Mobile SABDA
[VER] : [SIMALUNGUN]     [PL]  [PB] 
 <<  Matius 6 >> 

Pasal na Marsibere-bere

1“Jaga ma hanima, ase ulang idalankon hanima hapintoronnima i lobei ni halak, ase ididah sidea! Anggo sonai, seng adong be upahnima humbani Bapanima na i nagori atas ai.

2Ai pe, anggo marsibere-bere ho, ulang pala tingtingkon, songon pambahen ni halak sipakulah-kulah i rumah parguruan atap i alaman, ase ipuji halak sidea. Na sintong do hatang-Kon bannima, domma ijalo sidea upah ni sidea.

3Ase anggo marsibere-bere ho, ulang ma pala ibotoh tanganmu sambilou na binere ni tanganmu siamun,

4ase ponop idop ni uhurmu; jadi Bapamu, sididah na ponop ai ma mambalas ai bamu.”

Pasal na Martonggo

5“Anjaha anggo martonggo hanima, ulang ma songon halak sipakulah-kulah, na mangkarosuhkon jongjong martonggo i rumah parguruan atap bani sirpang-sirpang, ase ididah halak sidea. Na sintong do hatang-Kon bannima, domma ijalo sidea upah ni sidea.

6Tapi anggo martonggo ho, hu kamar ma ho laho, tutup ma labah ai, anjaha martonggo ma ho bani Bapamu, na adong bani ianan na ponop ai, jadi Bapamu, sididah na ponop ai ma mambalas ai bam.

7Sanggah na martonggo ai ulang ma marganjang-ganjang sahapnima songon sipajuh begu-begu, na mangagan tangihonon ni Naibata sidea, halani buei ni sahap ni sidea.

8Ai pe, ulang ma songon sidea hanima! Ibotoh Bapanima do na porlu bennima, sanggah lape ipindo hanima ai hun bani.

9Ase sonon ma tonggonima, ʻHam Bapanami na i nagori atas. Sai napapansing ma Goran-Mu.

10Sai roh ma Harajaon-Mu. Sai saud ma harosuh ni uhur-Mu i nagori tongah on songon na i nagori atas.

11Bere Ham ma bannami sadari on hagoluhan ari-ari.

12Sasap Ham ma dousanami songon panasapnami bani dousa ni hasoman, na mardousa dompak hanami.

13Ulang ma bobai Ham hanami hu parlajouan, tapi paluah Ham ma hanami humbani pangagou. Ai Ham do simada Harajaon ampa hagogohon ampa hasangapon sadokah ni dokahni. Amen.ʼ

14Ai anggo isasap hanima salah ni halak dompak hanima, sasapon ni Bapanima na i nagori atas ai do age dousanima.

15Tapi anggo seng isasap hanima salah ni halak dompak hanima, seng sasapon ni Bapanima age salahnima.”

Pasal na Marpuasa

16“Anggo marpuasa hanima, ulang ma borjot bohinima songon pambahen ni halak sipakulah-kulah, ai ipasambor sidea do bohi ni sidea, ase ididah halak sidea na marpuasa. Na sintong do hatang-Kon bennima, domma ijalo sidea upah ni sidea.

17Tapi anggo marpuasa ho, minaki ma ulumu, anjaha suhapi bohimu,

18ase ulang tanda parpuasaanmai bani halak, tapi talar bani Bapamu na bani na ponop ai. Jadi Bapamu, sididah na ponop ai ma mambalaskon ai bamu.”

Pasal na Patumpu-tumpuhon Arta

19“Ulang ma patumpu-tumpu hanima arta bennima i tanoh on, bani ianan na targagat tasik ampa ngitngit, bani ianan na tarhurak anjaha tartangko panangko!

20Tapi patumpu-tumpu hanima ma arta bannima i nagori atas, bani ianan na so targagat tasik ampa ngitngit, bani ianan na so tarhurak anjaha tartangko panangko.

21Ai ija artamu, ijai do uhurmu.

22Palita ni angkula do mata. Anggo dear matamu, lihar ma ganup angkulamu.

23Tapi anggo sambor matamu, golap ma haganup angkulamu. Golap ni in tene, anggo golap ma panondang na ibagas ho.

24Seng tarbalosi sada halak dua tuan. Sai sogam do uhurni bani na sada, haholonganni na sada nari, hombaranni do na sada, anjaha mapas uhurni bani na sada nari. Seng tarbalosi nasiam Naibata rap pakon Mammon!

Ulang Holsohan

25Ai do ase Huhatahon bannima, ulang ma holsohan hanima pasal goluhnima pasari-sari sipanganon atap siinumon, sonai homa pasal angkulanima pasari-sari parhiouon. Ai lang harganan do hosah ase sipanganon, anjaha harganan angkula ase parhiouon?

26Tonggor hanima ma manuk-manuk na i awang-awang, na so martidah, na so manabi anjaha na so patumpuhon hu sopou; tong do iparmudu Bapanima na i nagori atas ai sidea. Ai lang buenan ope hasurungannima marimbang ai?

27Ise ma hanima na mangasup paganjang ari-arini age saasta gelah marhitei na holsohan?

28Mase ma holsohan hanima pasal parhiouon? Pardiatei hanima ma partubuh ni bunga silundat i talon in, na so pala marhorja barang manorha!

29Tapi Huhatahon ma bennima, gari Raja Salomo, sanggah hasangaponni ai, seng adong jenges ni hiouni songon sada bunga-bunga ai.

30Ase anggo sonai iparhioui Naibata poyon-poyon na i talun in, na adong sadari on, hape patar ipuruni, samintolah hanima ma lang parhiouonni? Ee hanima siotik haporsayaon!

31Ase ulang ma holsohan hanima mangkatahon, aha ma panganonnami, aha ma inumonnami, aha ma parhiouonnami?

32Ai sipajuh begu-begu do na mangkaporluhon sisonai ai. Ibotoh Bapanima na i nagori atas ai do na porlu ai bennima.

33Parlobei ma pindahi hanima Harajaon ni Naibata ampa hapintoron-Ni, dob ai tambahkonon-Ni do ganupan ai bannima.

34Ase ulang ma holsohan hanima pasal ari patar, ai sarihonon ni ari patar do na porlu ijai. Ganup ari sungkup bei do hasunsahanni.”


  Share Facebook  |  Share Twitter

 <<  Matius 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel