Alkitab Mobile SABDA
[VER] : [SIMALUNGUN]     [PL]  [PB] 
 <<  Matius 7 >> 

Pasal na Manguhum-uhumi Hasoman

1“Ulang hanima manguhum-uhumi, ase ulang hona uhum hanima,

2ai panguhumonnima do uhumkononkon bennima, anjaha parsuhatannima do suhatkononkon bennima.

3Mase ma patorih-torihonnima silbak-silbak na bani mata ni saninamu, hape na satiang na ibagas matamu seng ididah ho?

4Sonaha ma boi hatahononmu bani saninamu, Dia, hupadarat ma lobei silbak-silbak na bani matamin, hape adong na satiang bani matamu?

5Ee sipakulah-kulah! Parlobei ma padarat tiang na bani matamu, dob ai pe, ase uhurhon sonaha pangumpatmu bani silbak-silbak na bani mata ni saninamu.

6Ulang ma bere hanima arta na mapansing bani baliang, anjaha ulang ma amburhon mutiaramu i lobei ni babuy, ase ulang idogei-dogei ai, dob ai marhusor ia laho mandorab ho.”

Pasal na Mangindo

7“Pindo hanima ma, sai na bereon-Ni do bannima, pindahi hanima ma, sai na jumpahan do hanima, hartuki hanima ma, sai na bukaon-Ni do bannima.

8Ai sai na manjalo do na mangindo, jumpahan na mangindahi, anjaha ungkabon bani na mangkartuki.

9Ai ise ma hun bannima jolma, na mambere batu bani anakni, anggo ipangindo indahan,

10atap anggo ipangindo dengke, gabe ibere bani ulog?

11Gari hanima parjahat mambotoh mambere na madear bani anaknima, samintolah Bapanima na inagori atas ai ma lang mambotoh mambere arta na madear bani na mangindo hun Bani?

12Sagala na pinindo ni uhurnima, sibahenon ni halak bannima, ai ma bahen hanima bani sidea, ai in do hata ni titah ampa nabi-nabi.”

Pasal na Masuk Hubagas Harajaon ni Naibata

13“Masuki hanima ma horbangan na sompit in, ai tahar do horbangan anjaha bolag do dalan hu hamagouan, anjaha buei do halak na masuk hujai.

14Tapi sompit do horbangan anjaha etek do dalan na dompak hagoluhan, anjaha otik do halak na jumpahan ai.”

Pasal Nabi Parladung

15“Jaga ma hanima dompak nabi parladung, ai roh do sidea bannima marrupahon biribiri, tapi uhurni ibagas begu panoroh do.

16Hun bani buahni do tandaonnima sidea. Ai boi do buaton buah ni anggur humbani rimbang atap jambu humbani latong?

17Ai marbuahkon na madear do sagala hayu na madear, tapi sambor do buah ni hayu na masambor.

18Seng boi hayu na madear marbuahkon na masambor; sonai homa hayu na masambor seng tarbahen marbuahkon na madear.

19Sirobohon do sagala hayu na so marbuah na madear, anjaha iambukkon hubagas apuy.

20Ase humbani buahni do tandaonnima sidea.”

Pasal na Mandalankon Hata in

21“Seng haganup halak na mangkatahon Bangku ʻTuhan, Tuhan!ʼ masuk hu Harajaon nagori atas ai, pitah na mandalankon harosuh ni Bapang-Ku na i nagori atas ai do.

22Bani ari ai buei do halak na mangkatahon Bangku, ʻHam Tuhan, Tuhan, ai lang manjahai do hanami marhitei goran-Mu? Ai lang iusir hanami do setan-setan marhitei goran-Mu? Ai lang ibahen hanami do buei tanda halongangan marhitei goran-Mu?ʼ

23Jadi hatahonon-Ku ma bani sidea, seng ongga Hutandai hanima, misir ma hanima hun lambung-Ku, hanima sihorjahon na ulang.

24Ase na mambogei hatang-Kin anjaha ihorjahon, sipausihon ma in bani halak na maruhur, na pajongjong rumahni bani batu gingging.

25Roh pe udan manalosou, marbanggal bah, anjaha doras logou mandorab rumah ai, seng marumbak, ai batu gingging do onjolanni.

26Tapi na mambogei hatang-Kin, hape seng ihorjahon, usih ma ia bani halak na oto, na pajongjong rumahni bani horsik.

27Dob ai roh ma udan manalosou, marbanggal bah, anjaha logou pe doras mandorab rumah ai, gabe marumbak ma rumah ai anjaha mareong.”

28Jadi dob siap ihatahon Jesus hata ai, longang tumang ma halak na mabuei ai mambogei podahni ai.

29Ai marhidorat do pangajarion-Ni bani sidea, sedo songon pamodahi ni sibotoh surat.


  Share Facebook  |  Share Twitter

 <<  Matius 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel