Dual PanelLumba-lumba bani Pambobai ni Bangsa ai
1Dob ai ningku ma, “Tangihon ma, nasiam kopala-kopala ni Israel, ampa nasiam sigomgom ginompar ni Israel! Ai lang talup do botohon nasiam uhum?
2Nasiam na magigi bani na madear, na marosuh bani na masambor, na manlikliki hulingkuling ni angkula ni sidea, anjaha na mambuati sibuk-sibuk ni sidea humbani holi-holini,
3na mamangani sibuk-sibuk ni bangsangku, na manlikliki hulingkuling ampa na manropuki holi-holi ni sidea, na manggatgati sidea songon gulei ibagas hudon, songon toktokni ibagas balanga.
4Dob ai dilo-dilo ma sidea bani Jahowa, tapi seng anjai balosan-Ni sidea lingodkonon-Ni ma bohi-Ni dompak sidea bani panorang ai, halani na jahat ai pambahenan ni sidea.
Lumba-lumba dompak Nabi-nabi
5Sonon do hata ni Jahowa dompak nabi, na pakahouhon bangsangku, na mandilo-dilohon “damei”, anggo dong sihilhilon ni ipon ni sidea, tapi na maningtingkon porang dompak halak na so mannahkon atap aha bani pamanganni?
6Halani ai roh ma borngin bannima, na so marpanonggoran, ampa hagolapan na so marpanjahaion. Sundut ma mata ni ari bani nabi-nabi on, anjaha gabe halotiron ma arian bani sidea.
7Mela ma halak na marpanonggoran, anjaha bador ma halak sipanjahai; haganup sidea manrungkub gumisni, ai seng dong roh balos humbani Naibata.
8Tapi anggo ahu gok do bangku kuasa. Tonduy ni Jahowa, uhum ampa hagogohon, laho patugahkon panlanggaronni hubani Jakob ampa dousani hubani Israel.
Hagedukon ni Pambobai i Jerusalem
9Tangihon ma on, nasiam kopala-kopala ni ginompar ni Jakob ampa nasiam pambobai ni ginompar ni Israel, na mangkagigihon uhum, tapi na papeolhon sagala na pintor,
10na paulihon Sion marhitei daroh ampa huta Jerusalem marhitei hagedukon.
11Manjalo sisip do kopala ni sidea mandabuh uhum, malim ni sidea manjalo upah mamodahi, anjaha nabi ni sidea manjalo pirak do manjahai, lanjar mangunsagah ope sidea marhitei Jahowa, nini, “Ai lang Jahowa do i tongah-tongahta? Seng tumaram sogop banta hamagouan!”
12Ai pe, halani nasiam maningon tinggalaon do Sion songon juma, Jerusalem maningon gabe gugunan batu, anjaha dolog onjolan ni rumah panumbahan ai gabe harangan.