Dual PanelTonggo Ibagas Paruntolon
1Bani pambobai koor. Bani si Jedutun. Psalm ni si Daud. (39-2) Nini uhurhu, “Jagaonku ma parlahouhu, ase ulang mardousa ahu marhitei dilahku; bahenonku do huntam bani pamanganku, sadokah jongjong halak parjahat i lobeihu.
2(39-3) Hupalongah do diringku, seng marsahap, sip do ahu age pasal na madear tapi lambin gunsang do pangahapanku;
3(39-4) lambin milas pusu-pusungku ibagas, lambin gara do huahap sanggah na marpingkir-pingkir ahu; jadi ningku ma marhitei dilahku,
4(39-5) ʻPatugah Ham ma, ale Jahowa, ajalhu bangku, pakon sibar-sibar ni ari-aringku, ase hubotoh na galek do ahu.ʼ
5(39-6) Tongon do, domma itotapkon Ham ari-aringku piga-piga totap tumang, dokah ni umurhu hira na lang do i lobei-Mu; doskon sangombus hosah do hansa jolma in, age pe totap jongjong. Sela.
6(39-7) Songon halinoh do hansa jolma in mardalani, iparsurai na so marguna; sai patumpuhon do ia, hape seng ibotoh, atap ise mambuat ai use.
7(39-8) Sonari aha do sipaimaonku, Ham Tuhan? Hu Bamu do ahu martenger ni uhur.
8(39-9) Paluah Ham ma ahu humbani ganup panlanggaronku, ulang ma paturut Ham ahu ipahiri-hiri halak na oto.
9(39-10) Longah mando ahu, seng hubuha pamanganku, ai Ham do siaturhon ai.
10(39-11) Padaoh Ham ma lonsing-lonsing humbangku, madamor do ahu ibahen pangodoh ni tangan-Mu.
11(39-12) Anggo iajar Ham jolma in marhitei pinsang-pinsang halani hasalahanni, gabe iparseda Ham do hinajengesni songon ginagat ni ngitngit; doskon sangombus hosah do hansa jolma in. Sela.
12(39-13) Sai tangihon Ham ma tonggongku, ale Jahowa, paeleng Ham ma pinggol-Mu bani doruh-doruhku, ulang ma sip Ham mangidah iluhku, ai partoloh do ahu i lambung-Mu, anjaha panginsolat songon na lobeihu ganup.
13(39-14) Padaoh Ham ma pangkawah-Mu humbangku, ase suang ahu marmalas ni uhur, paima misir ahu, anjaha lang dong be.”