Alkitab Mobile SABDA
[VER] : [SIMALUNGUN]     [PL]  [PB] 
 <<  Mazmur 72 >> 

Tonggo Mangkopkop Raja

1Humbani si Salomo. Ham Naibata, sai bere Ham ma panguhumion-Mu bani raja, pakon hapintoron-Mu bani anak ni raja,

2ase ibotoh manguhum bangsa-Mu ibagas hapintoron, ampa halak na madoyuk domu hubani uhum.

3Sai mamboan hadameion ma sagala dolog bani bangsa in, anjaha buntu-buntu mamboan hapintoron.

4Sai ipintori ma halak na madoyuk i tongah-tongah ni bangsa in. Sai ipaluah ma sagala halak na masombuh, anjaha iropuki sipangodoh-odoh.

5Sai songon mata ni ari ma dokah ni umurni, anjaha songon bulan ma ia layur marsundut-sundut.

6Songon udan na madabuh bani poyon-poyon ma ia, songon udan neinei na mangarbahi tanoh.

7Sai martumbor ma hapintoron bani panorangni, anjaha gok hadameion, ronsi seng dong be bulan.

8Manggomgomi ma ia hun laut das hu laut, humbani Bah Eprat das hu tampakan ni tanoh on.

9Marsombah ma hubani imbang-imbangni, anjaha sagala munsuhni mandilat tanoh.

10Raja ni Tarsis pakon sagala pulou mamboan sibere-bere bani, raja Seba pakon Etiopia mambere sohei.

11Manrogop ma sagala raja manombahsi, anjaha ganup bangsa mangidangisi.

12Tongon, sai paluahonni do halak na masombuh, na mangindo pangurupion ni halak na madoyuk ampa halak na so dong pangurupi bani.

13Maidop do uhurni bani halak na malumat pakon na musil, anjaha paluahonni do tonduy ni halak na masombuh.

14Paluahonni do hosah ni sidea humbani panokohon pakon pangkilangon, harga tumang do daroh ni sidea bani panonggorni.

15Sai manggoluh ma ia, anjaha ibere ma hubani omas na hun Seba; anjaha sitonggoonkon do ia tongtong, ganup panorang sipasu-pasuon do ia.

16Sai junah ma omei i tanoh in, das bani pakpak ni dolog; martumbor ma buahni songon Libanon, anjaha manggargar ma buyurni songon poyon na i talun.

17Sai totap ma goranni lanjar, sadokah dong mata ni ari sai tarbarita ma goranni; sai dapotan pasu-pasu ma marhiteihonsi sagala bangsa, anjaha parhatuahon ni sidea ma ia. Napuji ma Jahowa Naibata ni Israel,

18sahalak-Si do sibahen halongangan.

19Anjaha na puji ma goran-Ni na marmulia in sadokah ni dokahni, gok hamuliaon-Ni ma sab tanoh on. Amen, alo Amen.

20Marpunsa ma tonggo ni si Daud, anak ni si Isai.


  Share Facebook  |  Share Twitter

 <<  Mazmur 72 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran