Puji-pujian ampa Ojur-ojur Pambalosion bani Naibata
1Bani pambobai kor. Marhasoman Gitit. Humbani si Asap. (81-2) Olobkon ma Naibata, hagogohonta in, marsurak ma bani Naibata ni si Jakob.
2(81-3) Mandoding ma, pahata tambur, giut ma husapi na laingan ampa arbap.
3(81-4) Sompul ma tanduk bani poltak ni bulan, bani bulan tula, ari pestanta in.
4(81-5) Ai aturan do in bani Israel, parentah ni Naibata bani si Jakob.
5(81-6) Sada paraturan do in ibahen bani si Josep, sanggah na bingkat Ia mandorab Masir. Hubogei do sora na so hutanda hinan:
6(81-7) Hubuat do siporsanon humbani abaramu, anjaha maluah do tanganmu humbani karanjang.
7(81-8) Dilo-dilo do ho sanggah hasosakan gabe Hupaluah; marbalos do Ahu bam humbani hombun na marlonggur; Hulajou do ho ilambung ni Bah Meriba. Sela.
8(81-9) Tangar ma, ale bangsang-Ku, sihol do paingaton-Ku ho; ale Israel, sai ra ma ho manangihon!
9(81-10) Lang malo dong naibata na legan i tongah-tongahmu, ulang sombah naibata ni bangsa na legan.
10(81-11) Ahu do Jahowa Naibatamu, na patangkog ho hun Masir; patanggak ma pamanganmu ase Hugoki!
11(81-12) Tapi seng itangihon bangsang-Ku sorang-Ku, anjaha seng ibalosi Israel Ahu.
12(81-13) Jadi Hupaturut ma ia bani hengkeng ni uhurni, gabe iihut-ihut ma rosuh ni uhurni.
13(81-14) Ambit Ahu itangihon bangsang-Ku, anjaha Israel mardalan bani dalan-Ku:
14(81-15) Podas ma patundukon-Ku munsuhni, anjaha dompakkonon-Ku tangan-Ku bani imbangni.
15(81-16) Halak na mandomdomisi maningon marsombah do hu bani, anjaha panorangni ronsi sadokah ni dokahni.
16(81-17) Bahenon-Ku do sidea mangan gandum sijengesan, anjaha pabosuron-Ku sidea bani manisan na hun dolog batu.