Dual PanelTonggo ase Ipatotap Jahowa Bagah-bagah-Ni bani si Daud
1Doding podah humbani si Etan, halak Esrahi. (89-2) Sai dodingkononku do idop ni uhur ni Jahowa sadokah ni dokahni, pabotohkononku do hasintongan-Mu marhitei pamanganku, marsundut-sundut.
2(89-3) Ai nimu do, “Totap do idop ni uhur-Hu sadokah ni dokahni, anjaha songon jonam ni langit do hasintongan-Ku.”
3(89-4) Domma Hubahen padan bani na pinilih-Ku, domma Hubijahon bani juakjuak-Ku si Daud.
4(89-5) Patotapon-Ku do ginomparmu sadokah ni dokahni, anjaha hotakmu pajongjongon-Ku marsundut-sundut. Sela.
5(89-6) Jadi pujion ni langit ma halongangan-Mu, Ham Jahowa, sonai hasintongan-Mu bani tumpuan ni halak na ma pansing.
6(89-7) Ai ise ma i langit na doskon Jahowa, ise ma parnagori atas na songon Jahowa?
7(89-8) Sihabiaran do Naibata i tongah-tongah ni malekat na ma pansing, anjaha jombut bani sagala ma manlioti-Si.
8(89-9) Ham Jahowa, Naibata Zebaot, ise ma na songon Ham? Markuasa do Ham, ale Jahowa, anjaha hasintongan-Mu manginggoti Ham.
9(89-10) Ham do na manggomgom gunsang ni laut, anggo naik gilumbangni Ham do na paminopkon.
10(89-11) Ham do na manropuki Rahab songon halak na tinampul, ipaerap Ham do munsuh-Mu marhitei tangan-Mu na gogoh in.
11(89-12) Gok Bamu do nagori atas, gok Bamu do homa tanoh on; dunia on pakon sagala isini, Ham do na pajonamkon.
12(89-13) Utara pakon dangsina Ham do na manompasi; Tabor pakon Hermon marolob-olob halani goran-Mu.
13(89-14) Marbotokon na gogoh do Ham, gogoh do tangan-Mu anjaha timbul siamun-Mu.
14(89-15) hapintoron pakon uhum do onjolan ni hotak-Mu, idop ni uhur pakon hasintongan do jongjong i lobei-Mu.
15(89-16) Martuah ma bangsa na mambotoh marolob-olob, na mardalan ibagas sondang ni bohi-Mu, Ham Jahowa.
16(89-17) Marhitei goran-Mu do marolob-olob sidea ganup ari, anjaha marhitei hapintoron-Mu timbul sidea.
17(89-18) Ai Ham do hamuliaon ni gogoh ni sidea. anjaha marhitei rosuh-Mu gijang tanduknami.
18(89-19) Ai Jahowa do simada gantarnami, humbani na pansing ni Israel do rajanami.
19(89-20) Na ijia marsahap do Ham marhitei panonggoran hubani hinaholongan-Mu, Nimu, “Domma Huondoskon sortali bani sada puanglima, domma Hupabangkit sada na pinilih humbani bangsa in.”
20(89-21) Domma jumpah Ahu juakjuak-Ku si Daud, domma Huminaki ia marihitei minak-Ku na ma pansing;
21(89-22) tungkolon ni tangan-Ku do ia, tongon, pargogohan ni botokon-Ku do ia.
22(89-23) Seng anjai dorabon ni munsuh ia, anjaha seng anjai odoh-odohon ni parjahat ia.
23(89-24) Tapi rosakan-Ku do munsuhni i lobei ni, anjaha raseihonon-Ku do na mandomdomisi.
24(89-25) Hasintongan ampa idop ni uhur-Hu do mangkasomanisi, anjaha marhitei goran-Ku pagijangon do tandukni.
25(89-26) Bahenon-Ku do tanganni manguasai laut, tanganni siamun manguasai bah mardalan.
26(89-27) Dilohononni do hu Bangku, “Bapangku do Ham, Naibatangku ampa batu gingging ni hatuahonku!”
27(89-28) Tongon, bahenon-Ku do ia anak sikahanan, timbulan humbani raja-raja na i tanoh on.
28(89-29) Ronsi sadokah ni dokahni do patotapon-Ku idop ni uhur-Hu bani, anjaha totap do padan-Ku bani.
29(89-30) Patongtongon-Ku do ginomparni ronsi sadokah ni dokahni, anjaha hotakni sadokah dong langit.
30(89-31) Anggo itadingkon anak-anakni titah-Ku, anjaha seng marpangabak sidea bani aturan-Ku,
31(89-32) anggo ibutaki sidea tanoh-Ku, anjaha parentah-Ku seng idalankon,
32(89-33) jadi luluhonon-Ku do panlanggaron ni sidea ai marhitei lonsing-lonsing, ampa hajahaton ni sidea ai marhitei libas-libas,
33(89-34) tapi anggo idop ni uhur-Hu seng anjai osoron-Ku hun bani, anjaha hasintongan-Ku seng anjai oseion-Ku.
34(89-35) Seng elukkonon-Ku padan-Ku, anjaha na luar humbani pamangan-Ku seng anjai ubahon-Ku.
35(89-36) Domma ongga marbulawan ahu marhitei hapansingon-Ku, seng anjai marladung Ahu bani si Daud.
36(89-37) Totap do sadokah ni dokahni ginomparni, anjaha songon mata ni ari hotakni i lobei-Hu;
37(89-38) manongtong do ia songon bulan, jonam sadokah dong langit. Sela.
38(89-39) Hape sonari itulak anjaha iambukkon Ham do, manringis do Ham dompak na mininakan-Mu.
39(89-40) Iparnalang Ham do padan na dompak juakjuak-Mu, hiri do das hu tanoh ibahen Ham sortalini.
40(89-41) Iruntas Ham do sagala tembokni, marumbak ibahen Ham batar-batarni.
41(89-42) Isamun halak pamontas do ia, gabe siapason bani bangsa simbalogni.
42(89-43) Ipagijang Ham do tangan siamun ni imbangni, marmalas ni uhur do ganup munsuhni ibahen Ham.
43(89-44) Marbalik do ibahen Ham mata ni podangni, seng tahan ia jongjong bani parmunsuhan.
44(89-45) Iilohkon Ham do sinalsalni, anjaha hotakni itunggalingkon Ham hu tanoh.
45(89-46) Ipapondok Ham do ari-ari ni haposoonni, anjaha irungkub Ham ia bani habadoron. Sela.
46(89-47) Sadiha dokah nari, Ham Jahowa, ponopkonon-Mu lalab diri-Mu, anjaha gajag lalab songon apuy ringis-Mu?
47(89-48) Ingat Ham ma, tongkin ni in goluh on, sonaha podasni salpu jolma tinompa-Mu in?
48(89-49) Ija ma dong jolma manggoluh na so idahonni hamatean, anjaha na boi paluahkon tonduyni hun tangan ni nagori toruh? Sela.
49(89-50) Ija do nuan, Tuhan, hinalayak-Mu ondi, na dob binijahon-Mu bani si Daud marhitei hasintongan-Mu?
50(89-51) Ingat Ham ma, Tuhan, habadoron ni juakjuak-Mu; hupausung-usung do bani tontonku apas-apas ni bangsa-bangsa,
51(89-52) ai ma niapaskon ni sidea, Ham Jahowa; ipahiri sidea do bokas ni na mininakan-Mu.
52(89-53) Napuji ma Jahowa sadokah ni dokahni! Amen! nai ma amen!