Alkitab Mobile SABDA
[VER] : [SIMALUNGUN]     [PL]  [PB] 
 <<  Pengkhotbah 3 >> 

Marpanorang anjaha Marmusim do Haganup

1Bani sagala na adong, adong bei do musimni, anjaha bani sagala na masa i toruh ni langit, adong bei do panorangni.

2Adong panorang tubuh, anjaha dong panorang matei; adong panorang manuan, anjaha adong panorang mangumpat na dob sinuan;

3adong panorang mangugahi, anjaha adong panorang manambari; adong panorang parsedahon, anjaha adong panorang paulihon;

4adong panorang na tangis, anjaha adong panorang tartawa; adong panorang mandoruhi, anjaha adong panorang manortor;

5adong panorang mangambukkon batu, anjaha dong do panorang patumpu batu; adong panorang marsisummahan, anjaha dong panorang lang marsisummahan halani padaoh-daoh;

6adong panorang mansari, anjaha dong panorang magouan; adong panorang manramotkon, anjaha adong panorang mangambukkon;

7adong panorang manrigati, anjaha dong panorang manjarumi; adong panorang sipsip, anjaha dong panorang marsahapi;

8adong panorang mangkaholongi, anjaha dong panorang mardomdom; adong panorang marmunsuh, anjaha dong panorang mardamei-damei.

9Aha ma untung bani siparhorja humbani na hinangalutkonni ai?

10Domma huidah hangaluton, na nitotapkon ni Naibata bani jolma manisia, ase loja sidea marhitei ai.

11Haganupan ipauli do jenges bani panorangni; sonai homa uhur pasal sisadokah ni dokahni ibere hubagas uhur ni sidea, tapi seng tardadap jolma in pambahenan, na binahen ni Naibata humbani mulani das bani ujungni.

12Halani ai domma dapot uhurhu, seng dong sidearan bani jolma in, humbani na marmalas ni uhur ampa na pasonangkon dirini sadokah ni goluhni,

13anjaha homa, ai boi pe jolma mangan pakon minum mangidah na madear ibagas sagala halojaonni, ai pe sibere-bere ni Naibata do.

14Hubotoh do, haganup na binahen ni Naibata, totap do ai ronsi sadokahni dokahni, seng dong be sitambahan hujai, seng dong be sioruan. Ibahen Naibata pe sonai, ase mabiar jolma in i lobei-Ni.

15Aha na masa sonari, na dob ongga masa do ai; anjaha aha na sihol masa, na dob ongga masa do ai, ai ipindahi Naibata do use na dob salpu ai.

Salpu do Homa Jolma Usih Songon Pinahan

16Huidah do homa i toruh ni langit: Bani ianan ni uhum, ijai do masa hajahaton; anjaha bani ianan ni hapintoron, ijai do masa hagedukon.

17Ningku ma ibagas uhurhu, “Halak parpintor ampa halak parjahat uhumon ni Naibata do; panorang ni haganup na dong ampa haganup horja domma itontuhon.”

18Ningku ma ibagas uhurhu pasal hadirion ni jolma manisia! Iuji Naibata do sidea, laho patandahon bani sidea, paboa doskon pinahan do sidea.

19Ai sada sitaronon do jolma ampa pinahan; matei do pinahan, jolma pe matei do. Haganup sidea sisoya-soya do, seng dong hasurungan ni jolma manisia humbani pinahan, ai sisoya-soya do haganup.

20Haganupan ai laho manuju bani sada ianan: Haganupan marharohan humbani orbuk do, lanjar haganupan ai mulak bani orbuk.

21Ise mambotoh, atap na naik hosah ni jolma hu atas, anjaha hosah ni pinahan turun hu toruh?

22Jadi huidah ma, seng dong sidearan bani jolma in humbani na marmalas ni uhur ia bani horjani, ai do rupeini. Ise ma na mamboan jolma hujai, ase ididah barang aha na masa dob matei ia?


  Share Facebook  |  Share Twitter

 <<  Pengkhotbah 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2023
Alkitab.SABDA.org

Android.SABDA.org
SABDA.mobi
Bantuan
Dual Panel Dual Panel

Laporan Masalah/Saran