Alkitab Mobile SABDA
[VER] : [SIMALUNGUN]     [PL]  [PB] 
 <<  Roma 10 >> 

Hamagouan ni Bangsa Israel:; Haondosan ni Ambilan Na Madear do Sidea, Hape Sai Ipindahi do Hapintoron na hun Bani Titah

1Ale hasoman, ipindo uhurhu do anjaha hutonggohon do sidea bani Naibata, andohar maluah.

2Ai husaksihon ma pasal sidea, paboa na pongkut uhur ni sidea dompak Naibata, tapi seng maruhur.

3Ai seng itanda sidea hapintoron ni Naibata anjaha ipindahi sidea do, pajongjongkon hapintoron ni sidea sandiri, seng unduk sidea bani hapintoron ni Naibata.

4Ai Kristus do ujung ni titah in, laho mamintori sagala na porsaya.

5Ai isuratkon si Musa do, paboa jolma na mangkorjahon hapintoron, na maronjolan bani titah, ai do na manggoluh marhitei ai.

6Tapi hapintoron na humbani haporsayaon mangkatahon sonon: Ulang ma hatahon ibagas uhurmu: Ise ma na manaik hu nagori atas, ai ma, mangalop Kristus hunjai?

7Atap: Ise ma tuad hu nagori toruh, ai ma, mangarahkon Kristus humbani na matei?

8Tapi sonon do ihatahon, “Dohor do bamu hata in, ibagas pamanganmu anjaha ibagas uhurmu.” Ai ma hata haporsayaon, na niambilankonnami.

9Ai maluah ma ham, anggo isaksihon ham marhitei pamanganmu Tuhan Jesus, anjaha ihaporsayai ham ibagas uhurmu, na dob ipuhoi Naibata Ia humbani na matei.

10Ai marhitei uhur do halak porsaya laho hu hapintoron, anjaha marhitei pamangan manaksihon laho hu haluahon.

11Ai ihatahon surat in do, “Sagala na porsaya Bani, seng pabadoron.”

12Ai seng dong ubahni halak Jahudi age halak Gorik, ai sada do Tuhan ni haganup, na manlayak-layakkon habayakon-Ni bani haganup na mandilo-Si.

13Ai sagala na mandilo goran ni Tuhan in, sai paluahon do.

14Tapi sonaha ma pardilo ni sidea bani na so hinaporsayaon ni sidea? Tapi sonaha ma pangkaporsayai ni sidea bani na seng ongga ibogei sidea? Sonaha ma pambogei ni sidea, anggo seng dong na mangambilankon?

15Sonaha ma marambilan sidea, anggo lang adong na marsuruh? Songon na tarsurat in: “Jenges ni in langkah ni siambilankon na madear.”

Israel na So Porsaya

16Tapi seng haganup na mambalosi Ambilan Na Madear in, ai nini si Jesayas do: “Ham Tuhan, ise ma na porsaya bani ambilannami?”

17Ai humbani na manangar ambilan do roh ni haporsayaon, anjaha ambilan ai roh humbani hata ni Kristus.

18Tapi on ma hatahononku: “Ai na so ibogei sidea do nani?” Domma namin! “Na dob das do sora ni sidea hu sab tanoh on, anjaha ronsi ujung ni dunia on do barita ni sidea.”

19Tapi ningku use, “Seng nani ibotoh Israel ai?” Parlobei si Musa do na mangkatahon, “Bahenonku ma hanima marsimburu mangidah na so bangsa in, anjaha papuhoonku ma ringisnima dompak bangsa na so maruhur.”

20Pag do si Jesayas mangkatahon, “Na so mangindahi Ahu, ai do jumpahan, anjaha talar do Ahu bani na so sungkun-sungkun Bangku.”

21Tapi bani Israel ihatahon do, “Layur-layur ari do hupaherbang tanganku bani bangsa na so mambalosi anjaha na manlawan.”


  Share Facebook  |  Share Twitter

 <<  Roma 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran