Dual PanelIbuat si Boas si Rut Gabe Parinangonni
1Dob ai laho ma si Boas hu horbangan ai anjaha hundul ma ia ijai; jadi tonggor ma, mamontas ma sipartobus, na hinatahon ni si Boas ai. Nini si Boas ma, “Roh ma ho lobei ambia, hundul hujon.” Jadi roh ma ia, lanjar hundul.
2Jadi iarahkon si Boas ma sapuluh halak humbani pangintuai ni huta ai, nini ma, “Hundul ma nasiam hujon.” Jadi hundul ma sidea.
3Jadi nini ma dompak sipartobus ai, “Sihol jualon ni si Naomi, na mulak hun tanoh Moab ai do, tanoh parbagianan ni si Elimelek, saninanta ondi.
4Jadi hupingkir, maningon patugahonku do hubam hata ai. Tobus ma ai i lobei ni halak parhuta on pakon i lobei ni pangintuai ni bangsanta. Anggo sihol tobusonmu ai, tobus ma; tapi anggo seng sihol tobusonmu, patugah ma bangku, ai seng dong be sobali ni ho, na patut manobus ai, dob ho ahu mando.” Jadi nini ma, “Ahu ma na manobus.”
5Dob ai nini si Boas ma, “Sadihari itobus ho tanoh ai humbani si Naomi, pagodangonmu ma homa si Rut, boru Moab ai, na mangkabaluhon na matei ondi, laho patotapkon goran ni na matei ondi bani tanoh parbagiananni.”
6Jadi nini sipartobus ai ma, “Anggo sonai do, seng tarbahen ahu manobus ai, ase ulang seda parbagiananku sandiri hubahen. Tobus ma bam, na patut sitobusankai, ai seng tarbahen ahu manobus ai.”
7Sonai do adat bani halak Israel sapari, anggo adong halak na manobus barang na palibeihonsi, ase totap hata ai, maningon tanggalon ni na salopah ma sipatuni, laho mamberehon ai bani hasomanni; ai ma adat mansahkon i Israel.
8Ase sanggah na hinatahon ni sipartobus ai hubani si Boas, “Tobus ma ai bam, anjaha tanggali ma sipatuni ai.”
9Dob ai nini si Boas ma dompak pangintuai pakon hubani halak simbuei ai, “Nasiam ma saksi sadari on, paboa na dob hutobus humbani tangan ni si Naomi haganup na tinadingkon ni si Elimelek ondi ronsi haganup na bani si Malon ampa si Kilion.
10Ambahni ai pagodangonku ma si Rut, boru Moab ai, parinangon ni si Malon ondi, laho patotapkon goran ni na matei ondi bani parbagiananni, ase ulang sasap goran ni na matei ondi hun tongah-tongah ni hasomanni pakon hun horbangan ni hutani; nasiam do saksi ni ai sadari on.”
11Dob ai nini halak simbuei na i horbangan ai ma pakon pangintuai-pangintuai ai, “Hanami ma tongon saksi. Sai ibahen Jahowa ma naboru on, na masuk hu rumahmu songon si Rahel pakon si Lea, sidea na dua, na pajongjongkon ginompar ni si Israel. Sai lambin markuasa ma ham i Eprata, anjaha tarambilan ma goranmu i Betlehem.
12Ginomparmu pe sai songon ginompar ni si Peres ma, na tinubuhkon ni si Tamar bani si Juda, marhitei ginompar na sihol layak-layakkonon ni Jahowa bamu humbani naboru na poso on.”
13Jadi ibuat si Boas ma si Rut bahen parinangonni. Jadi dob iparayak si Boas ia, boratan rumah ma ia itumpak Jahowa, anjaha itubuhkon ma sada anak.
14Dob ai nini naboru-naboru ai ma hubani si Naomi, “Pinuji ma Jahowa, na patuduhkon bamu sadari on sada sipartobus; sai tarambilan ma goran-Ni i Israel.
15Ia ma sipasabou uhurmu pakon na manarihon ham bani panorang hatuaonmu; ai parumaenmu, na marholong uhur in bamu, na harganan bamu humbani pitu anak, ia do na manubuhkonsi bamu.”
16Dob ai ibuat si Naomi ma na etek-etek ai, laho mangabingsi i abinganni, anjaha ia ma gabe parorotni.
17Dob ai roh ma naboru parlambung ni rumahni mambahen goranni, nini ma, “Domma tubuh sada anak bani si Naomi, gabe ibahen ma goranni si Obed, ai ma bapa ni si Isai, bapa ni si Daud.”
Na Lobei ni si Daud
18On ma ginompar ni si Peres: Si Peres manubuhkon si Hezron,
19si Hezron manubuhkon si Ram, na manubuhkon si Aminadab;
20si Aminadab manubuhkon si Nahason, na manubuhkon si Salma;
21si Salma manubuhkon si Boas, na manubuhkon si Obed;
22anjaha si Obed manubuhkon si Isai, na manubuhkon si Daud.