Dual PanelTahun Sabat
1Bani ujung ni ganup pitu-pitu tahun maningon bahenonmu do haluahon.
2Anjaha on do rumang ni haluahon ai: Ganup halak parutangan na mambere pinjaman hubani hasomanni, maningon saloseihononni ai humbani; seng bulih tungguonni utang ni hasomanni barang saninani, ai domma itingtingkon halak tahun haluahon bani Jahowa.
3Anggo humbani halak dagang bulih do tungguonmu; tapi barang aha idoumu bani saninamu, maningon saloseihonon ni tanganmu do ai.
4Tapi ulang ma adong halak na musil i tongah-tongah nasiam, ai sabonar pasu-pasuon ni Jahowa do ham i tanoh na binere ni Jahowa Naibatamu bamu, bahen parbagianan siteanonmu,
5pitah, asal ma itangihon ham sora ni Jahowa Naibatamu, anjaha ihaporluhon ham mangkorjahon haganup tonah on, sagala na hutonahkon bamu sadari on.
6Ai pasu-pasuon ni Jahowa Naibatamu do ham, songon na dob pinarbagah-Ni hinan bamu, jadi painjamkon ma ham bani buei bangsa sipajuh begu-begu, tapi seng manginjam anggo ham; anjaha gomgomanmu ma buei bangsa sipajuh begu-begu, tapi seng rajaanni anggo ham.
7Anggo dong i tongah-tongahmu sahalak na musil humbani saninamu, ibagas hutamu, i tanoh sibereon ni Jahowa Naibatamu bamu, seng bulih pamapironmu uhurmu anjaha tutuponmu tanganmu dompak hasomanmu na musil ai,
8tapi maningon bukaonmu do tanganmu bani, anjaha unjah ham papinjamkon bani marguru hubani sadiha na hurang bani.
9Jaga ham ma dirimu, ase ulang tubuh pingkiran na jahat ibagas uhurmu, mangkatahon, “Domma dohor tahun papituhon, tahun haluahon, gabe sogam panonggormu bani hasomanmu na musil ai, anjaha aha pe lang ibere ham ibagas ai.”
10Maningon unjah ham mambere bani, ulang gok gila uhurmu sanggah ma mamberehon ai ham bani; ai halani ai pasu-pasuon ni Jahowa Naibatamu ma ham bani haganup horjamu pakon bani haganup na jinamah ni tanganmu.
11Ai seng tumaram maronti adong halak na musil i tanoh in; halani ai do ase hutonahkon bamu sonon, “Maningon ringgas do ham mambuha tanganmu hubani saninamu, hubani halak na masombuh pakon halak na musil i tanohmu.”
Parluah ni Jabolon
12Anggo tarjual bamu hasomanmu, halak Heber, dalahi atap naboru, maningon onom tahun dokahni ia mangkorja bamu, tapi papitu-tahunkon maningon paluahonmu ia.
13Anjaha anggo ipaluah ham ia hun lambungmu, seng bulih paluahonmu ia marambung tangan;
14maningon unjah pamberemu bani humbani biribirimu, humbani pardogeianmu, humbani pangilangan anggurmu; songon na dob pinasu-pasu ni Jahowa Naibatamu ham, maningon sonai bereonmu bani.
15Maningon ingatonmu do jabolon do ham na ijia i tanoh Masir, gabe itobus Jahowa Naibatamu ham; halani ai do ase hutonahkon hata on bamu sadari on.
16Tapi anggo ihatahon bamu, Seng sihol ahu laho humbamu, halani holong ni uhurni mangidah ham pakon mangidah parrumahmu, ai sonang do ia i lambungmu,
17jadi buat ma sada partusuk, anjaha tusuk ma pinggolni bani labah, jadi gabe jabolonmu ma ia lalab. Anjaha jabolonmu naboru pe sonai do bahenonmu.
18Ulang ma borat uhurmu, halani paluahonmu ma ia hun lambungmu, ai dua lompit humbani gaji ni sipangan gaji, hinorjahonni bamu na onom tahun ai. Jadi pasu-pasuon ni Jahowa Naibatamu ma ham bani ganup na hinorjahonmu.”
Parpapansing bani Bunga Tubuh ni Pinahan
19Sagala bunga tubuh tunggal, humbani lombu pakon biribirimu maningon papansingonmu do ai bani Jahowa Naibatamu; seng bulih pahorjahononmu bunga tubuh ni lombumu, anjaha seng bulih rasiponmu ambulu ni bunga tubuh ni biribirimu.
20Maningon panganonmu do juhutni ganup tahun i lobei ni Jahowa, Naibatamu, bani ianan na pinilih ni Jahowa, ham pakon parrumahmu.
21Tapi anggo dong do tikasni, mengkat barang pitung, barang tikas aha pe na bajan, seng bulih galangkononmu ai bani Jahowa Naibatamu.
22Maningon panganonmu do ai ibagas hutamu; halak na butak barang halak na pansing bulih do panganonni ai, songon na mangankon balua barang ursa.
23Pitah darohni do na so bulih panganonmu; maningon useihononmu do ai hu tanoh, songon bah.