Dual PanelParmulak ni Uhur ni Jahowa Mangidah Bangsa-Ni na Mangundukkon Dousani
1Anjaha anggo domma sogop bamu magira haganup hata on, pasu-pasu barang papa, na hunahkon i lobeimu, hape ipaulak ham use uhurmu hubagas i tongah-tongah ni ganup bangsa sipajuh begu-begu, pambuangan ni Jahowa Naibatamu bamu,
2anjaha mulak ham pakon anakmu hubani Jahowa Naibatamu, anjaha itangihon ham sora-Ni, romban hubani na hutonahkon in bamu sadari on, humbani ganup uhurmu pakon humbani ganup tonduymu,
3jadi marpangulaki ma uhur ni Jahowa mangidah habuanganmu, anjaha idop ma uhur-Ni mangidah ham, anjaha patumpuon-Ni ma ham humbani ganup bangsa, pangerapan ni Jahowa Naibatamu bamu.
4Porini pe mallok ham hu ujung ni langit, sai patumpuon ni Jahowa Naibatamu do ham hunjai, anjaha alopon-Ni do ham hunjai,
5anjaha boanon ni Jahowa Naibatamu ma ham mulak hu tanoh na dob tinean ni ompungmu hinan, ase teanonmu ai use, anjaha tumpakon-Ni ma ham, mardoharan anjaha bueinan humbani ompungmu.
6Dob ai sunaton ni Jahowa Naibatamu ma uhurmu pakon uhur ni ginomparmu laho mangkaholongi Jahowa Naibatamu humbani sagala uhurmu pakon sagala tonduymu, ase manggoluh ham.
7Tapi honahonon ni Jahowa Naibatamu ma haganup papa-papa on hubani munsuhmu pakon imbangmu, sagala na mangayak-ayak ham.
8Dob ai mulak ma use ham anjaha tangihononmu ma sora ni Jahowa, anjaha horjahononmu ma ganup tonah-Ni, sagala na hutonahkon in bamu sadari on.
9Jadi marlobih-lobih ma ham tumpakon ni Jahowa Naibatamu bani haganup horja ni tanganmu, bani boras ni boltokmu, bani panggargar ni pinahanmu pakon bani gogoh ni tanohmu; ai mangulaki ma marmalas ni uhur Jahowa manumpakkon na madear hu bamu, usih songon malas ni uhur-Ni na ijia mangidah ompungmu,
10anggo itangihon ham sora ni Jahowa Naibatamu, laho manramotkon titah-Ni pakon aturan-Ni, sagala na tarsurat ibagas buku titah on, anggo mulak uhurmu hubani Jahowa Naibatamu humbani sagala uhurmu pakon sagala tonduymu.
Dohor do Hata ai
11Ai titah, na hutonahkon on bamu sadari on seng mapayahtu in bamu anjaha seng madaohtu.
12Seng i nagori atas in, mambahen pala hatahononmu, ʻIse ma gantihnami naik hu nagori atas laho mangalop in bennami, ase ibogei hanami in anjaha ihorjahon hanami in?ʼ
13Anjaha seng idipar ni laut hata in, mambahen maningon pala hatahononmu, ʻIse ma gantihnami mandipar laut laho mangalop in bennami, ase ibogei hanami in anjaha ihorjahon hanami in?ʼ
14Ai dohor tumang do hata in bamu; ibagas pamanganmu anjaha ibagas uhurmu do in ase boi horjahononmu in.
Pamilihon na Manontuhon
15Tonggor ma, domma hupatuduhkon bamu sadari on hagoluhan pakon hatuahon, hamatean pakon hamagouan,
16marhitei na huhatahon ham sadari on mangkaholongi Jahowa Naibatamu, marhitei na marparlahou ham ibagas dalan-Ni anjaha iramotkon ham titah-Ni, aturan-Ni pakon uhum-Ni, ase manggoluh ham anjaha lambin bueini, anjaha pasu-pasuon ni Jahowa Naibatamu ham i tanoh siparayakonmu nuan bahen parbagiananmu.
17Tapi anggo marbalik uhurmu, anjaha seng ra ham manangihon, tapi ra ham ajar-ajaranni marsombah hubani naibata na legan anjaha mambalosi ai,
18na pabotohkon hinan ma bani nasiam sadari on, maningon magou tumang ma nasiam; seng anjai dokah nasiam manggoluh i tanoh siparayakonmu marhitei na mandipari Bah Jordan laho mambuat ai bahen parbagianan.
19Diloonku ma sadari on langit pakon tanoh gabe saksingku dompak nasiam, paboa na dob hupatuduhkon bamu hagoluhan pakon hamatean, pasu-pasu pakon papa-papa; halani ai pilih ma hagoluhan, ase manggoluh ham pakon ginomparmu,
20marhitei na mangkaholongi Jahowa Naibatamu, manangihon sorani, anjaha marsijoloman hu bani; ai hagoluhan do ai bamu anjaha haganjangon ni umur, manggoluh i tanoh na dob binulawankon ni Jahowa hubani ompungmu, hubani si Abraham, si Isak pakon si Jakob, laho mamberehon ai bani sidea.