Dual PanelGolpa-golpa Pasal Hapintoron Sandiri
1Tangihon ma alo Israel! Diparanmu ma sadari on Jordan laho masuk anjaha patundukkon bangsa, na bolonan anjaha gogohan hun bamu, pakon huta na bolon, na marbatar-batar ronsi langit,
2sada bangsa na bolon anjaha na gijang, ai ma halak Enak, na dob tinandamu anjaha binogeimu baritani sonon: Ise ma na manahan jongjong i lobei ni halak Enak?
3Botoh ma sadari on, Jahowa Naibatamu sandiri do na mardalan i lobeimu, songon apuy na mangankon; Ia do maniapkon sidea anjaha Ia do na patundukkon sidea i lobeimu; jadi pabalionmu ma sidea, anjaha podas ma agouonmu sidea, songon na binagahkon ni Jahowa hinan bamu.
4Ia dob ionjar Jahowa, Naibatamu sidea hun lobeimu, ulang ma hatahon ibagas uhurmu, “Halani hapintoronku do ase iarahkon Jahowa ahu masuk laho manean tanoh on; hape namin halani hajahaton ni bangsa sipajuh begu-begu ai do mambahen ionjar Jahowa sidea hun lobeimu.”
5Sedo halani hapintoronmu barang binahen ni bujur ni uhurmu, mambahen masuk ham laho manean tanoh ni sidea; tapi halani hajahaton ni bangsa sipajuh begu-begu ai do, ase ionjar Jahowa Naibatamu sidea hun lobeimu, anjaha laho patotapkon hata na dob binulawankon ni Jahowa hubani ompungmu, hubani si Abraham, si Isak pakon si Jakob.
6Halani ai botoh ham ma, sedo halani hapintoronmu ase ibere Jahowa Naibatamu bamu tanoh na dear on bahen parbagiananmu ai bangsa na hengkeng maruhur do ham.
7Ingat ma anjaha ulang ma halupahon, na pinarohmu in ringis ni Jahowa Naibatamu i halimisan, olat ni ari dob luar ham hun tanoh Masir, das hubani na roh nasiam hu ianan on, sai manggeori do nasiam.
8I Dolog Horeb ope domma iparoh nasiam ringis ni Jahowa, sonin ma ringis ni Jahowa bani nasiam, pala sihol agouon-Ni nasiam.
9Sanggah na naik ai ahu hu atas dolog ai, laho manjalo panuratan batu na dua ai, panuratan parpadanan na binahen ni Jahowa hubani nasiam, tading do ahu ompat puluh borngin i dolog ai, seng mangan ruti barang minum bah ahu.
10Jadi ibere Jahowa ma bangku na dua panuratan batu ai, na sinuratkon marhitei jari-jari ni Naibata; anjaha i atasni do tarsurat sagala hata, na dob hinatahon ni Jahowa hubani nasiam i atas dolog hun tongah-tongah ni apuy sanggah bani ari partumpuan ai,
11Dob salpu na ompat puluh ari ompat puluh borngin ai, ibere Jahowa ma hu bangku na dua panuratan batu ai, ai ma panuratan parpadanan ai.
12Dob ai nini Jahowa ma hu bangku, “Jongjong ma ho, podas ma ho tuad hunjon, ai domma maruhur magou bangsamu, na dob niarahkonmu luar hun Masir. Podas ni in sidea manlembang hun dalan na dob Hutonahkon in bani sidea; domma ibahen sidea bani sidea sada gana-gana na tinuang.”
13Ambah ni ai ihatahon Jahowa ma hu bangku, “Domma Huidah parlahou ni bangsa on, anjaha tonggor ma, bangsa na hengkeng maruhur do on.
14Palopas ma Ahu, ase Husiapkon sidea, ase sasap goran ni sidea hun toruh ni langit; anjaha Hubahen pe ho gabe sada bangsa, gogohan anjaha bolonan humbani bangsa on.”
15Jadi marhusor ma ahu anjaha tuad hun dolog ai, na gajag ibagas apuy, anjaha na dua panuratan parpadanan ai ibagas haduasi tanganku.
16Jadi hutorih ma, anjaha tonggor ma, domma mardousa nasiam dompak Jahowa Naibata nasiam, ibahen nasiam do bani nasiam sada lombu; podasni in tongon nasiam manlembang hun dalan na tinonahkon ni Jahowa hubani nasiam.
17Jadi hutangkap ma na dua panuratan batu ai, hugijigkon ma ai hun tanganku na dua on, anjaha hubolahi i lobei nasiam.
18Dob ai manrogop ma ahu i lobei ni Jahowa, songon na parlobei ai, ompat puluh ari ompat puluh borngin dokahni, lang mangan ruti barang minum bah ahu, halani ganup dousa nasiam, na binahen nasiam ai, marhitei na mambahen na masambor i lobei ni Jahowa laho paroh ringis-Ni.
19Ai mabiar do ahu mangidah ringis pakon gila na niringiskon ni Jahowa hubani nasiam, gabe sihol agouhonon-Ni nasiam. Tapi itangihon Jahowa do ahu age sahali ai.
20Mangidah si Aron pe manringis tumang do Jahowa, sihol agouon-Ni do ia, tapi ahu do martonggo ijia mangapiti si Aron.
21Jadi hubuat ma barang na mambahen nasiam mardousa ai, ai ma anak ni lombu na binahen nasiam ai, anjaha hututung ma ai ibagas apuy lanjar hubolahi ma ai, anjaha hududa lumat das ronsi songon orbuk, dob ai hutirtirhon ma orbuk ai hu bah na roh hun dolog ai.
22Gajag use ringis ni Jahowa ibahen nasiam sanggah i Tabera, i Massa pakon i Kibrot-Hattaawa.
23Anjaha sanggah na sinuruh ni Jahowa nasiam hun Kades-Barnea, nini do, “Tangkog ma nasiam anjaha soluk nasiam ma tanoh ai, na dob Hubere hubani nasiam, hape ilawan nasiam do hata ni Jahowa, Naibata nasiam, anjaha lang porsaya nasiam Bani, anjaha lang itangihon nasiam sora-Ni.
24Sai manlawan do nasiam dompak Jahowa olat ni ari dob Hutanda nasiam.”
25Jadi manrogop ma ahu i lobei ni Jahowa ompat puluh ari ompat puluh borngin dokahni, sai manrogop do ahu, halani na dob hinatahon ni Jahowa sihol agouhonon-Ni nasiam.
26Dob ai martonggo ma ahu hubani Jahowa, “Ham alo Tuhan Jahowa, ulang ma agou bangsa-Mu pakon parbagianan-Mu, na dob tinobus-Mu marhitei hatimbulon-Mu, na dob niarahkon-Mu luar hun tanoh Masir marhitei tangan na gogoh.
27Ingat Ham pakon si Jakob, ulang ma Ham manatap dompak hahengkengon ni bangsa on, dompak hajahatonni pakon dousani,
28ase ulang ihatahon halak pangisi ni tanoh, hunja hanami iarahkon Ham. Halani na so boi do Jahowa mangarahkon sidea masuk hu tanoh na dob pinarbagah-Ni ai bani sidea, anjaha halani gigi ni uhur-Ni do mangidah sidea ase iarahkon sidea luar, laho mamunuh sidea i halimisan.
29Sidea do bangsa-Mu pakon parbagianan-Mu, na dob niarahkon-Mu luar marhitei hagogohon-Mu na banggal in pakon marhitei botohon-Mu na gostong in.”