Dual PanelHamuliaon na Marianan i Atas ni Herubim ai
1Jadi mangkawah ma ahu, anjaha tonggor ma, bani langit na i babou ni herubim ai, adong do songon batu intan sapir, tompani songon paratas, i atas ni ai.
2Dob ai nini ma dompak dalahi na marhiou silopak ai, “Masuk ma ho hu holangkolang ni galapang ai, na i toruh ni herubim ai, goki ma tanganmu bani narnar na gara ai, na i holangkolang ni herubim ai, anjaha sampakkon ma ai hu atas ni huta ai.” Jadi masuk ma ia huidah.
3Jongjong do herubim ai hampit siamun ni Rumah Panumbahan ai, sanggah na masuk dalahi ai, anjaha igoki hombun do alaman parbagas ai.
4Naik ma hamuliaon ni Jahowa humbani herubim ai hubani onjolan ni labah ni Rumah Panumbahan ai; jadi igoki hombun ma rumah ai, anjaha gok sinalsal ni hasangapon ni Jahowa ma alaman ai.
5Anjaha tarbogei do sora ni habong ni herubim ai das hu alaman pardarat ai usih songon sora ni Naibata pargogoh na so tarimbang, sanggah marsahap Ia.
6Sanggah na pinarentahkonni ai dalahi na marhiou silopak ai, “Buat ma apuy hun holangkolang ni galapang, hun tongah-tongah ni herubim ai!” Gabe masuk ma ia anjaha jongjong i lambung ni galapang ai.
7Jadi idurdurhon sada herub ma tanganni hun tongah-tongah ni herubim ai dompak apuy na i holangkolang ni herubim ai, anjaha ibuat ma deba hunjai, lanjar ibere hubagas tangan ni dalahi na marhiou silopak ai; ijalo ma ai anjaha luar ma ia.
8Anjaha taridah do bani herubim ai songon rupa ni tangan ni jolma, i toruh ni habong ni sidea bei.
9Dob ai mangkawah ma ahu anjaha tonggor ma, adong do ompat galapang i lambung ni herubim ai, sada galapang i lambung ni ganup herub; ia rupa ni galapang ai, songon batu intan Tarsis na marlinang-linang do.
10Dos do rupa ni na ompat ai, tapi popouni songon na i tongah-tongah ni galapang na sada do na sada nari idahon.
11Anggo bingkat sidea, laho do sidea dompak lobeini bei, seng marhusor sanggah na laho ai; huja galapang parlobei ai laho, hujai do irik laho na legan ai, seng marhusor sanggah na laho ai.
12Haganup badan ni herubim ai, gurungni, tangan ni sidea, habong ni sidea ampa galapang ai, gok mata do inggot, haompatsi galapang ai.
13Ia galapang ai, halisungsung do goranni ai hubogei.
14Anjaha ompat do bohi ni ganup ai: bohi na parlobei bohi ni herub, na paduahon bohi ni jolma, na patoluhon bohi ni singa anjaha na paompatkon bohi ni manuk-manuk nanggordaha.
15Anjaha naik ma herubim ai, ai ma pargoluh na dob huidah i lambung ni Bah Kebar.
16Anggo mardalan herubim ai, mardalan ma galapang ai i lambung ni sidea; anjaha anggo ipaherbang herubim ai habongni laho naik hun tanoh, seng mosor galapang ai hun lambung ni sidea.
17Anggo maronti sidea, maronti ma ai, anggo naik sidea, naik ma ai rap pakon sidea; ai ibagas galapang ai do tonduy ni pargoluh ai.
18Dob ai luar ma hamuliaon ni Jahowa hun onjolan ni labah ni Rumah Panumbahan ai, anjaha sogop ma hu atas ni herubim ai.
19Ipaherbang herubim ai ma habongni, anjaha naik ma sidea hun tanoh on huidah bani pardarat ni sidea ai; rap pakon sidea do galapang ai; anjaha maronti ma sidea bani horbangan parhapoltakan ni rumah ni Jahowa, anjaha hamuliaon ni Naibata ni Israel do ibabou ni sidea.
20Ai ma pargoluh na huidah i toruh ni Naibata ni Israel, i topi ni Bah Kebar; anjaha hutanda ma herubim do sidea hape.
21Ompat bei do bohini anjaha ompat bei do habongni, anjaha i toruh ni habong ni sidea adong do tangan songon tangan ni jolma.
22Ia rupa ni bohi ni sidea, usih do bani rupa ni bohi na huidah i topi ni Bah Kebar; ganup do sidea laho pintor hu lobei.