Dual PanelIuhum Naibata do Ganup Jolma domu hubani Pambahenanni; Iojur Jolma Paubahkon Uhurni
1Dob ai roh ma hata ni Jahowa hu bangku, mangkatahon,
2“Aha do halani ase isahap-sahapkon hanima umpama pasal tanoh Israel: Bapa mangankon buah ni anggur na migar, hape ipon ni anakni do ngiluan?
3Songon sintongni manggoluh Ahu,” nini Tuhan Jahowa, “seng bulih be sahapkononnima umpama on i Israel.
4Tonggor ma, Ahu do simada ganup tonduy ni jolma, tonduy ni bapa age tonduy ni anak, Ahu do simadasi; ise na mardousa, ia do na maningon matei.
5Anggo pintor sada halak, ihorjahon uhum ampa hapintoron,
6anggo seng ipangan na ginalangkon i atas dolog, seng mangkawah ia dompak gana-gana ni ginompar ni Israel, seng ra ia pabutak parinangon ni hasomanni, anjaha seng idohori sada naboru bani panorang mabutak ia,
7seng dong halak na iodoh-odoh, tapi ipaulak do bani siparutang gadeianni, seng ra ia manrampas, ibere do sipanganon bani na loheian, anjaha iparhioui halak na talanjang,
8seng paanakkon duit ia, seng ra mambuat untung na malobihtu, ipadaoh tanganni humbani hagedukon, sintong panguhumni bani halak na marsalisih,
9marparlahou ia ibagas titah-Ku, anjaha jimot ia mandalankon paraturan-Ku, ai ma halak parpintor, maningon manggoluh do ia tongon,” nini Tuhan Jahowa.
10“Tapi anggo adong tubuh anak ni siparjahat, siduruskon daroh atap sihorjahon na masambor,
11na so marparlahouhon parlahou ni bapani parpintor ai, tapi ipangan do na ginalangkon i atas dolog, ibutaki parinangon ni hasomanni,
12iodoh-odoh na masombuh ampa na madoyuk, idalankon panrampason, seng ipaulak gadeian bani, mangkawah matani dompak gana-gana, ihorjahon hagigi,
13ipaanakkon duitni anjaha malobihtu pambuatni bani untung, ai sipagoluhon do jolma sisonai ai? Seng bulih manggoluh ia, tapi halani ihorjahon haganup hagigi nongkan ai, maningon matei do ia, marsapata hubani do darohni.
14Porini tubuh anakni sada, anjaha ididah anak ai sagala dousa na hinorjahon ni bapani, gabe mabiar ia anjaha seng ihorjahon ai,
15seng ipangan na ginalangkon i atas dolog, seng ikawahkon gana-gana ni ginompar ni Israel, seng ibutaki jolma ni hasomanni,
16seng dong na iodoh-odoh, seng ijalo gadeian, seng idalankon panrampason, ibere sipanganon bani na loheian, iparhioui halak na talanjang,
17ipadaoh tanganni humbani hagedukon, seng ipaanakkon duitni atap ibuat untung na mabahattu, idalankon aturan-Ku anjaha ihorjahon do titah-Ku, seng anjai matei ia halani hajahaton ni bapani, sai na manggoluh do ia.
18Tapi ia bapani ai, sipangodoh-odoh anjaha siparrampas ai, sihorjahon na so patut i tongah-tongah ni bangsani, tonggor ma, maningon matei do ia halani hajahatonni.
19Hape ihatahon hanima, ʻAi mase ma lang mangonai hubani anak dousa ni bapani?ʼ Halani ihorjahon anak ai uhum ampa hapintoron, idalankon haganup titah-Ku, maningon manggoluh do ia.
20Ise sipardousa, ia do matei! Sedo anak mamorsan hajahaton ni bapani, anjaha sedo bapa mamorsan hajahaton ni anakni. hapintoron ni parpintor hu bani do sogop, anjaha hajahaton ni parjahat sogop hu bani do.
21Tapi anggo itundalhon parjahat ai haganup dousani, na hinorjahonni, anjaha idalankon haganup titah-Ku, anjaha ihorjahon uhum ampa hapintoron, maningon manggoluh do ia, seng matei.
22Haganup hajahatonni na hinorjahonni ai, seng hiraon be ai bani; manggoluh do ia halani hapintoron na hinorjahonni ai.
23Ai marosuh do uhur-Hu nani mangidah hamatean ni parjahat?” nini Tuhan Jahowa, “ai lang marosuh do uhur-Hu bani parmulak ni parjahat in humbani dalanni ase manggoluh ia?ʼ
24Tapi, anggo manlembang parpintor in humbani hapintoronni, idalankon hajahaton anjaha ihorjahon hasamboron, songon na hinorjahon ni parjahat ai, mintor manggoluh ma ia? Haganup hapintoronni na hinorjahonni ai seng hiraon be bani; halani panundalionni ai ampa dousani na hinorjahonni ai, halani ai do ia matei.
25Tapi hanima mangkatahon, ʻSeng sintong dalan ni Jahowa!ʼ Tangihon ma, ale ginompar ni Israel: Mintor lang ma sintong dalan-Ku? Ai lang dalannima do na so sintong?
26Anggo manlembang parpintor humbani hapintoronni anjaha ihorjahon hajahaton, maningon matei do ia halani ai, maningon matei do ia halani hajahaton na hinorjahonni ai.
27Tapi, anggo itundalhon parjahat hajahaton na hinorjahonni ai, anjaha ihorjahon uhum ampa hapintoron, na pagoluhkon tonduyni do ia ijai.
28Halani na dob mangahap ai ia, anjaha itundalhon hajahaton na hinorjahonni ai, maningon manggoluh do ia, lang matei.
29Tapi ihatahon ginompar ni Israel do, ʻSeng sintong dalan ni Jahowa!ʼ Mintor ma lang sintong dalan-Ku, ale ginompar ni Israel? Ai lang dalannima do na so sintong?
30Halani ai, ale ginompar ni Israel, uhumon-Ku do hanima ganup, romban hubani parlahounima,” nini Tuhan Jahowa. “Mulak ma, tundalhon ma haganup hajahatonnima, ase ulang hajahaton ai parohkon hamagouan bannima.
31Ambukkon hanima ma sagala hajahaton na hinorjahonnima ai dompak Ahu, anjaha parayak hanima ma uhur na baru pakon tonduy na baru. Mase rahanan matei hanima, ale ginompar ni Israel?
32Tongon, seng marosuh Ahu mangidah matei na matei in,” nini Tuhan Jahowa. “Halani ai paubah hanima ma uhurnima, ase manggoluh hanima.”