Dual PanelParsuruh ni Naibata bani si Hesekiel Pasingatkon Bangsa ai
1Jadi nini ma hu bangku, “Ale anak ni jolma, jongjong ma ho bani naheimu, ase marsahap Ahu bam!”
2Sanggah na marsahap ai Ia bangku, masuk ma Tonduy ai hu bangku, lanjar ipajongjong ma ahu bani naheihu, jadi hutangihon ma Ia na marsahap ai bangku.
3Anjaha ihatahon ma hu bangku, “Ale anak ni jolma, Husuruh do ho bani halak Israel, bani bangsa sipanlawan, na manlawan dompak Ahu; sidea ampa ompungni sidea sai marbalik do hun Bangku ronsi sadari on.
4Hubani anak parbohi na mapir ampa paruhur na hengkeng do ho Husuruh, anjaha hatahon ma hubani sidea, “Sonon do hata ni Tuhan Jahowa.
5Atap ra sidea manangihon, atap manjua sidea manangihon (ai bangsa sipanlawan do sidea), tapi botohon ni sidea ma na adong do nabi i tongah-tongah ni sidea.
6Tapi anggo ho, ale anak ni jolma, ulang ho mabiar bani sidea, ulang gobir ho mambogei hata ni sidea, age pe liot bam duri pakon tatada anjaha marianan ho i tongah-tongah ni gansip golang; ulang gobir ho mambogei hata ni sidea, anjaha ulang ho mabiar mangidah sidea, ai bangsa sipanlawan do sidea.
7Hatahon ma hatang-Ku bani sidea, atap ra sidea manangihon atap lang, ai bangsa sipanlawan do sidea.
8Tapi anggo ho, ale anak ni jolma, tangihon ma na Huhatahon bam, ulang ma ho manlawan songon bangsa sipanlawan in. Buha ma pamanganmu, anjaha pangan ma aha na Hubere bam.”
9Anjaha sanggah mangkawah ahu, tonggor ma, sada tangan durdur bangku, anjaha ibagas adong sada surat gulungan.
10Jadi ipaherbang ma ai i lobeihu, anjaha marsurat do ai angkup lopah; tarsurat do ijai hata tangis-tangis, hoih-hoih ampa bursik-bursik.