Dual PanelPambalason ni Naibata bani Halak Amon, Moab, Edom ampa Palistim
1Jadi roh ma hata ni Jahowa hu bangku, mangkatahon,
2“Ale anak ni jolma, tujuhon ma bohimu dompak halak Amon, anjaha manjahai ma ho pasal sidea.
3Hatahon ma bani halak Amon: Tangihon ma hata ni Tuhan Jahowa: Sonon do hata ni Tuhan Jahowa: Halani ihatahon hanima: Ha! ha! ha! bani rumah-Ku na mapansing ai, sanggah ibutaki ai, bani tanoh Israel, halani tarulang ai, ampa bani ginompar ni Juda, halani tarbuang sidea.
4Halani ai, tonggor ma, ondoskonon-Ku do ho bani halak na i hapoltakan bahen parbagianan ni sidea, pasukon ni sidea do lampolamponi i tongah-tongahmu, anjaha paulionni do ianan ni sidea ibagas ho; panganon ni sidea do gogoh ni tanohmu, anjaha inumon ni sidea do dadih ni pinahanmu.
5Bahenon-Ku do huta Rabba gabe sampalan ni unta, anjaha tanoh ni halak Amon gabe parsaranan ni biribiri, ase itanda hanima, Ahu do Jahowa.
6Tongon, sonon do hata ni Tuhan Jahowa, Halani martopap-topap ho, anjaha marinjak-injak, anjaha marmegah-megah ho mangidah hasedaon ni tanoh Israel.
7Halani ai, tonggor ma, Hupagostong do tangan-Ku manlawan ho, anjaha Huondoskon do ho gabe taban-taban ni bangsa-bangsa, anjaha raseihonon-Ku hun tongah-tongah ni nagori-nagori; Huboiskon do ho, ase itanda ho, Ahu do Jahowa.”
8Sonon do hata ni Tuhan Jahowa, “Halani ihatahon Moab ampa Seir: Tonggor ma, doskon haganup bangsa parbegu do halak Juda,
9halani ai, tonggor ma, sae-sae do bahenon-Ku raboyon ni Moab, gabe seng dong be huta ijai, i sab nagori ai, ai ma habanggalon bani nagori ai: Bet-Jesimot, Baal-Meon pakon Kiriataim.
10Berehonon-Ku do ai rap pakon tanoh ni halak Amon, bani halak na i hapoltakan, bahen parbagianan bani sidea, ase ulang be taringat halak pasal sidea i tongah-tongah ni bangsa-bangsa.
11Dabuhon-Ku do uhum bani Moab, ase itanda sidea. Ahu do Jahowa.”
12Sonon do hata ni Tuhan Jahowa, “Halani maruhur pambalason Edom bani ginompar ni Juda, gabe marsalah banggal sidea halani pambalason ni sidea ai,”
13halani ai sonon do hata ni Tuhan Jahowa, “Hupagostong do tangan-Ku manlawan Edom, ripaskonon-Ku do hunjai jolma age pinahan, anjaha gabe halimisan do ai bahenon-Ku hun Teman das hu Dedan; maningon rasei do sidea bahenon ni podang.
14Dalankonon-Ku do pambalason dompak Edom marhitei bangsang-Ku halak Israel; bahenon ni sidea do dompak Edom romban hu bani ringis-Ku ampa gilang-Ku; jadi ahapkonon ni sidea ma sonaha pambalas-Ku,” nini Tuhan Jahowa.
15Sonon do hata ni Tuhan Jahowa, “Halani maruhur pambalason halak Palistim, anjaha marmegah-megah, marhajahaton sidea mambalas, laho mangagou marhalanihon ni parmunsuhon na dob madokah,
16halani ai sonon do hata ni Tuhan Jahowa: Hupagostong do tangan-Ku manlawan halak Palistim, anjaha ripaskonon-Ku do halak Kereti, anjaha boiskononku do halak na tading i topi ni laut ai.
17Dalankonon-Ku do pambalason banggal bani sidea marhitei paminsangon na gok ringis, ase ibotoh sidea, Ahu do Jahowa, anggo Hupadalan ma pambalason bani sidea.”