Dual PanelDoding Tangis-tangis Pasal Tirus
1Dob ai roh ma hata ni Jahowa hu bangku, mangkatahon,
2“Ale anak ni jolma, bahen ma sada doding tangis-tangis pasal Tirus,
3anjaha hatahon ma bani Tirus, na marianan bani dalan masuk hu laut, partiga-tiga ni bangsa-bangsa bani buei nagori-nagori i topi laut: Sonon do hata ni Tuhan Jahowa: Ale Tirus, ihatahon ho do, kapal na gokan jenges do Ahu.
4Tongah-tongah ni laut do gomgomanmu, jenges tumang do ho ipauli situhangi ho.
5Humbani hayu maranti Senir do ipauli sidea dasormu, hayu ares do ibuat hun Libanon, bahen tiang ni layarmu.
6Humbani hayu jati Basan do ibahen holemu, anjaha tayubmu humbani hayu ares na hun pulou Kittim do ibahen sidea, ilapis bani gading.
7Humbani hiou linen Masir na marrupa-rupa do layarmu, gabe partanda pasal ho; hiou simahonda ampa sigerger, na hun topi ni laut Elisa do tendamu.
8Halak Sidon pakon Arwad do sipanlugai bam; halak na pandei hun Zamar do ibagas ho, sidea do gabe jurumudimu.
9Partua-partua na hun Gebal ampa na pentar-pentarni do ibagas ho, padear-dearhon na maseda bam. Haganup kapal na i laut ampa parhorja kapal roh do hu bam, laho mantiga-tigahon boniagamu.
10Halak Persia, Tud ampa Put do gabe balamu; ipanggantungkon sidea do gantar ampa tangkulukni ibagas ho; sidea do gabe hagijangon bam.
11Halak Arwad do balamu iatas tembokmu inggot, anjaha halak Gamad bani manaramu, ipansangkotkon sidea do gantarni bani tembokmu inggot, sidea do na mambahen gok hajengesonmu.
12Tarsis do hasomanmu martiga-tiga halani hinabuei ni barang-barangmu; pirak, bosi, timah ampa timah sibirong do ibahen sidea tukar ni barang-barangmu.
13Halak Javan, Tubal pakon Mesek martiga-tiga do pakon ho, jolma ampa parugas tombaga do itukarhon sidea bani barang-barangmu.
14Halak Togarma manukarhon huda, huda porang ampa halode bani tiga-tigamu.
15Halak Rodus martiga-tiga pakon ho, buei nagori partopi laut mandalankon partiga-tigaon pakon ho, gading ampa hayu birong do ibahen sidea galarni bam.
16Martiga-tiga do halak Edom pakon ho halani hinabuei ni barangmu; itukarhon sidea do bam mata intan samarag, hiou hasumba, hiou na marrupa-rupa, hiou linnen, simatah ampa mata intan jaspis.
17Juda ampa tanoh Israel martiga-tiga do pakon ho; gandum na hun Minit, buah ara, manisan, minak ampa minak balsem do itukarhon sidea bam.
18Martiga-tiga do Damaskus pakon ho halani hinabuei ni boniagamu na marbagei-bagei in, anggur hun Helbun ampa wol hun Zahar itukarhon sidea hu bam.
19Hun Usal roh do barang-barang bosi, rompah-rompah ampa kulit manis gantih ni boniagamu.
20Halak Dedan marboniaga palana pakon ho, sihundulan sanggah marhuda.
21Halak Arab pakon sagala kopala-kopala hun Kedar, ai ma partiga-tiga harosuh ni uhurmu pasal biribiri, biribiri tunggal ampa hambing tunggal; ai do tiga-tiga ni sidea pakon ho.
22Saudagar na hun Seba pakon Raama martiga-tiga do pakon ho; itukarhon do hubani barangmu marbagei-bagei rompah-rompah sijengesan, marbagei-bagei mata intan na maharga ampa omas.
23Haran, Kanneh, Eden, Assur ampa Madai martiga-tiga do pakon ho.
24Itiga-tigahon sidea do hubam hiou pilihan, hiou simahonda, hiou na marrupa-rupa, parmadani na marrupa-rupa ampa tali banggal na pinuyuh.
25Kapal-kapal Tarsis do marlayar bam, mamboan tiga-tigamu. Sonai ma gabe gok ho, anjaha marmuatan na borat i tongah laut.
26Halak sipanlugaimu do mamboan ho hu laut bolag, tapi logou na hun hapoltakan do mangkaromkon ho hubagas laut.
27Habayakonmu, barang-barangmu, boniagamu, anak kapalmu, jurumudimu, tukang-tukangmu, partiga-tigamu ampa haganup balamu na ibagas ho ampa haganup halak na i tongah-tongahmu, harom do hubagas laut bani panorang pardabuhmu.
28Mambogei pandoruh ni jurumudimu, hitir-hitir do partopi laut;
29lintun bei ma hun kapalni haganup sijolom hole, anjaha anak kapal ampa haganup jurumudi na i laut turun ma hu darat;
30itangisi sidea do ho, anjaha doruh-doruh do sidea gogoh; inahkon sidea do orbuk bani uluni, margulu do sidea bani abuan.
31Ipalpal sidea do uluni halani ho, anjaha marhiou guni do sidea; itangisi sidea do ho humbani uhur na marhoru, gok pusok ni uhur,
32Halani horu ni ai ibahen sidea do tangis-tangis pasal ho, idoruhi sidea do ho: Ai ise ma ongga iparseda doskon Tirus ibagas laut?
33Sanggah na roh boniagamu hun laut, bosur do buei bangsa-bangsa ibahen ho; marhitei hinabuei ni artamu ampa boniagamu, bayak do raja-raja ni tanoh on ibahen ho.
34Tapi sonari maropuk do ho, harom hubagas laut; boniagamu ampa haganup panumpangmu harom do rap pakon ho.
35Haganup halak partopi laut tarsonggot do pasal ho; raja-rajani mabiar tumang, marposi do bohi ni sidea.
36Manihul-nihul do partiga-tiga ni bangsa-bangsa halani ho; jangin do parroh ni ajalmu, seng anjai dong be ho lalab.”