Dual PanelIlumbahon Use Uhum dompak Masir
1Dob ai roh ma hata ni Jahowa hu bangku, mangkatahon,
2“Ale anak ni jolma, manjahai ma ho hatahon ma: Sonon do hata ni Tuhan Jahowa: Doruhkon ma! Aih, jangin ni ari ai!
3Tongon, dohor ma ari ai, dohor ma ari ni Jahowa ai, ari na golap do ai, panorang pambalason bani bangsa-bangsa!
4Roh do podang hu Masir, jadi masa ma hagobiron i Etiopia, anggo rasei halak tarbunuh i Masir; iusung halak habayakonni, anjaha iparseda palas-palasni.
5Halak Etiopia pe, Put, Lud, bangsa panginsolat haganup, Libia ampa bangsa siparpadan pakon sidea, maningon rasei do bahenon ni podang.
6Sonon do hata ni Tuhan Jahowa: Maningon rasei do halak na manungkoli Masir, anjaha marumbak do kuasani na timbul in, hun Migdol das hu Siene rasei do sidea ijai ibahen podang, nini Tuhan Jahowa.
7Maseda do ia i tongah-tongah ni nagori-nagori na dob maseda; anjaha huta-hutani pe i tongah-tongah ni huta-huta na dob mareong.
8Jadi tandaon ni sidea ma, Ahu do Jahowa, anggo Hupagara ma apuy i Masir anjaha maropuk ma haganup na mangurupisi.
9Bani ari ai misir ma mangolos suruhan hun lobei marayak Etiopia laho manonggoti ia; hagobiron do sogop bani sidea bani ari parmagou ni Masir. Tonggor ma, roh do ai!
10Sonon do hata ni Tuhan Jahowa: Parontihonon-Ku do hariahon ni Masir marhitei tangan ni si Nebukadnesar, raja ni Babel.
11Ia rap pakon balani, ai ma sibisangan ai humbani bangsa-bangsa, iparoh do hujai parsedahon tanoh ai; sintakon ni sidea do podangni dompak Masir, anjaha gokan ni sidea do tanoh ai bani halak na tarbunuh.
12Pahorahon-Ku do Bah Nil ai, anjaha jualon-Ku tanoh ai hu tangan ni halak parjahat; parohon-Ku do hasedaon bani tanoh ai ampa bani haganup na adong ijai, marhitei tangan ni halak sileban; Ahu, Jahowa do na mansahapkon in.
13Sonon do hata ni Tuhan Jahowa: Parsedaon-Ku do sagala gana-gana, anjaha boiskonon sisombah-sombahon hun Wop, seng anjai dong be raja-raja i Masir; pasogopon-Ku do biar i tanoh Masir.
14Parsedaon-Ku do Patros, pagaraon-Ku do apuy i Soan, anjaha dabuhon-Ku do uhum i No.
15Useihononku do ringisku bani Sin, benteng ni Masir ai, anjaha raseihononku halak simbuei na i No.
16Pagaraonku do apuy i Masir, rusak anjaha gobir ma Sin; runtas do tembok ni No, iparreong do tembok ni Nob.
17Raseihonon ni podang do garama ni On ampa Pibeset, anjaha tarbuang do anak boru.
18Manggolapi do ari i Tahpanhes, anggo Huponggolhon ma ijai tungkot harajaon ni Masir, anjaha marujung kuasani na timbul ai; rungkubon ni hagolapan ma huta ai, anjaha tarbuang pangisi ni dusun-dusunni.
19Sonai ma dalankonon-Ku uhum bani Masir, ase itanda sidea, Ahu do Jahowa.
20Pasapuluhsada-tahunkon, bani ari pitu bulan sada, roh ma hata ni Jahowa hu bangku, mangkatahon,
21Ale anak ni jolma, domma huponggolhon tangan ni Parao, raja ni Masir, anjaha tonggor ma, seng ibaluti ai, seng itambari, seng ililit, ase margogoh namin use manjolom podang.
22Halani ai sonon do hata ni Tuhan Jahowa: Tonggor ma, imbang-Ku do Parao, raja ni Masir, ponggolhonon-Ku do tanganni haduasi, na margogoh ai ampa na dob maponggol ai, anjaha dabuhkonon-Ku do podang ai humbani tanganni.
23Erapon-Ku do halak Masir hu tongah-tongah ni bangsa-bangsa, anjaha mambur do sidea hu nagori-nagori ai bahenon-Ku.
24Pargogohon-Ku do tangan ni raja Babel, anjaha nahkonon-Ku podang-Ku hubagas tanganni, tapi ponggolhonon-Ku do tangan ni Parao, gabe doruh-doruh ma ia i lobei-Hu, songon halak na ugahan parah.
25Tongon, pargogohon-Ku do tangan ni raja Babel, tapi galek ma anggo tangan ni Parao; jadi tandaonni ma, Ahu do Jahowa. Berehonon-Ku do podang-Ku hubagas tangan ni raja Babel, tampulhononni do ai dompak tanoh Masir.
26Erapon-Ku do halak Masir hutongah-tongah ni bangsa-bangsa, anjaha mambur do sidea bahenon-Ku hu nagori-nagori ai; ase itanda sidea, Ahu do Jahowa.”