Dual PanelTanoh Sipapuligon Gabe Tanoh na Mapansing
1Anggo domma ibagihon hanima tanoh in marhitei ruji-ruji, papulig hanima ma sabagian ni nagori in bani Jahowa gabe tanoh na mapansing, ganjangni dua puluh lima ribu asta, anjaha bolagni dua puluh ribu asta; pansing do haganup tanoh in inggot.
2Hunjon do buaton sanlambar tanoh na marompat suhi; lima ratus asta ganjangni sonai homa bolagni, bahen ianan ni Rumah na Mapansing ai; ambahni ai lima puluh asta tanoh porei inggotni ai.
3Humbani tanoh na dob sinibar ai, sibar ma sabagian dua puluh lima ribu asta ganjangni anjaha sapuluh ribu asta bolagni, ai ma ianan bani rumah na mapansing ai ampa ianan tang na mapansing ai.
4Bagian na mapansing do in humbani tanoh in, parbagianan bani malim, na marugas bani ianan na mapansing in anjaha na mandohori Jahowa, laho marugas bani; gabe ianan ni rumah-rumah ni sidea ma in ampa partapakan na mapansing bani Rumah na Mapansing in.
5Bagian na legan, dua puluh lima ribu asta ganjangni anjaha sapuluh ribu asta bolagni, bani halak Levi ma ai, na marugas i Rumah Panumbahan, bahen parbagianan bani sidea, bahen ianan ni huta-huta siiankonon ni sidea.
6Anjaha parbagianan bani huta ai, bahen hanima ma sanlambar tanoh, dua puluh lima ribu asta ganjangni, anjaha lima ribu asta bolagni, na saganjang ni tanoh na mapansing, na pinapulig ai, haganup ma ginompar ni Israel simada ai.
7Anjaha bani raja, bere hanima ma tanoh parbagianan angkup lopah ni tanoh na mapansing ai ampa parbagianan bani huta ai romban hubani tanoh na mapansing ai ampa parbagianan bani huta ai, hampit hapoltakan ampa hampit hasundutan dos ganjangni ampa parbagianan ni sada marga, marganjang hun balog parhasundutan das hu balog parhapoltakan ni nagori ai.
8Ai ma gabe tanoh parbagianan bani raja i Israel, ase ulang iodoh-odoh raja na Hupabangkit in be bangsang-Ku; tapi ase ipaturut ginompar ni Israel marnah tanoh domu hubani parbagianan ni margani bei.
Hawajiban ampa Horja ni Raja
9Sonon do hata ni Tuhan Jahowa, “Sungkup ma in, ale raja-raja ni Israel: Padaoh ma hajahaton ampa odoh-odoh, dalankon uhum ampa hasintongan! Parontihon ma na mangusir-usir bangsang-Kin! nini Tuhan Jahowa.
10Pakei hanima ma timbangan na sintong, epa na sintong ampa bat na sintong.
11Maningon dos suhatan ni epa ampa bat, ai ma sada bat saparsapuluh homer, anjaha sada epa saparsapuluh homer; homer ai ma onjolan ni suhat-suhat.
12Ia sikal ai, dua puluh gera ma ai; lima sikal hot ma ai lima sikal, na sapuluh sikal totap sapuluh; anjaha sada mina bannima lima puluh sikal ma ai.
13On do guguan sibereonnima; saparonom epa humbani ganup homer gandum, anjaha saparonom epa humbani ganup homer andolei.
14Ia guguan minak, ai ma saparsapuluh bat humbani ganup kor, sada kor marisi sapuluh bat.
15Ambahni ai sada biribiri humbani dua ratus biribiri sibereon ni ganup marga ni Israel; haganupan ai, ai ma bahen galangan sipanganon, galangan situtungon ampa galangan pardameian, laho mambahen pardearan bani sidea, nini Tuhan Jahowa.
16Maningon ondoskonon ni haganup bangsa in do guguan on bani raja i Israel.
17Horja ni raja ai do mamboan galangan situtungon, galangan sipanganon ampa galangan siinumon sanggah pesta, sanggah poltak ni bulan ari Sabat, ai ma haganup pesta na dob tinontuhon bani ginompar ni Israel. Ia do siboan galangan pardousaon, galangan sipanganon, galangan situtungon ampa galangan pardameian, laho mambahen pardearan bani ginompar ni Israel.”
Aturan Pasal Pesta ampa Galangan
18Sonon do hata ni Tuhan Jahowa, “Bani bulan sada, ari sada bulan ai, maningon buatonnima do sada anak ni lombu na so martikas, laho manguras ianan na mapansing in.
19Ibuat malim ma deba humbani daroh galangan pardousaon ai, anjaha inahkon ma ai bani tiang ni labah ni Rumah Panumbahan ai, bani haompatsi suhi-suhi ni tangga-tangga ni anjapanjap ai ampa bani tiang ni horbangan ni alaman parbagas ai.
20Sonai ma homa bahen hanima bani ari sada bulan pitu, bani halak na mardousa na so tinuntun atap halani haotoon, sonai ma bahenonnima manguras Rumah Panumbahan ai.
21Bani bulan sada ari sapuluh ompat maningon pestahononnima do Paskah ai; pitu ari dokahni maningon panganonnima ruti na so niigaran ijai.
22Ipasirsir raja ma bani ari ai sada anak ni lombu bahen galangan pardousaon, mangkopkop dirini sandiri pakon mangkopkop bangsa na i tanoh in.
23Torus bani mata ni pesta na pitu ari ai maningon pasirsiron do siap arian galangan situtungon bani Jahowa, ai ma pitu anak ni lombu ampa pitu biribiri tunggal na so martikas; anjaha sada hambing tunggal bahen galangan pardousaon siap arian.
24Anjaha maningon pasirsironni do galangan sipanganon, ai ma sada epa pangkasomani ni sada anak ni lombu, anjaha sada epa pangkasomani ni sada biribiri tunggal, anjaha sada hin minak bani ganup epa.
25Bani bulan pitu, ari sapuluh lima ni bulan ai, torus bani mata ni pesta sipitu ari ai maningon pasirsironni do homa sonai, dos bueini bani galangan pardousaon, galangan situtungon, galangan sipanganon ampa minak.”