Dual PanelPasal Galangan Sigalangonkon ni Raja
1Sonon do hata ni Tuhan Jahowa, “Ia horbangan parhapoltakan ni alaman parbagas ai maningon itutup do ibagas sionom ari parhorjaonkon; tapi bani ari Sabat ampa bani bona ni bulan maningon ibuka do.
2Masuk ma raja ai hun darat humbani surambih ni horbangan ai, anjaha jongjong ma ia i lambung ni tiang ni horbangan ai. Dob ai roh ma malim manggalangkon galangan situtungon ampa galangan pardameian, tapi anggo raja ai manrogop ma bani molmolan ni horbangan ai. Dob ai luar ma ia, tapi horbangan ai seng bulih ai tutupon ronsi bodari.
3Ia bangsa na i tanoh in maningon manrogop do homa bani dalan masuk humbani horbangan ai i lobei ni Jahowa sanggah ari Sabat ampa bani poltak ni bulan.
4Ia galangan situtungon, sigalangkonon ni raja ai bani Jahowa bani ari Sabat, ai ma onom anak ni biribiri na so martikas ampa sada biribiri tunggal na so martikas,
5anjaha galangan sipanganon pangkasomani ni biribiri tunggal ai sada epa do, anjaha galangan sipanganon pangkasomani ni anak ni biribiri ai haganup, ai ma sadiha na boi tarberesi, ambah ni ai sada hin minak hasoman ni ganup epa.
6Bani poltak ni bulan maningon galangkononni do sada anak ni lombu na so martikas, onom anak ni biribiri ampa sada biribiri tunggal na so martikas.
7Anjaha pasirsironni do galangan sipanganon pangkasomani ni anak ni lombu ai, sada epa; pangkasomani ni biribiri tunggal ai sada epa do homa, anjaha pangkasomani ni anak ni biribiri ai haganup, ai ma sadiha na boi tarberesi, ambah ni ai sada hin minak hasoman ni ganup epa.
8Anggo masuk raja ai, humbani surambih ni horbangan ai ma ia masuk, anjaha kaluar pe humbani dalan na sada ai ma.
9Anggo roh bangsa parnagori ai hu lobei ni Jahowa bani ari pesta na dob tinontuhon, ise na masuk hun horbangan parutara laho marsombah, hun horbangan pardangsina ma ia luar; anjaha ise na masuk hun horbangan pardangsina hun horbangan parutara ma ia luar; ulang ma adong na mulak hun horbangan hamasukanni ai, tapi ganup ma kaluar torus dompak lobei.
10Sanggah na masuk ai sidea, masuk ma homa raja ai; anjaha anggo kaluar sidea, ia pe kaluar ma.
11Bani pesta-pesta ampa bani ari raya, galangan sipanganon pangkasomani ni anak ni lombu ai, ai ma sada epa; pangkasomani ni biribiri tunggal ai, sada epa homa; tapi pangkasomani ni anak biribiri ai haganup, ai ma sadiha na tarberesi, ambah ni ai sada hin minak hasoman ni sada epa.
12Anggo sihol boanon ni raja ai galangan banggal ni uhur bani Jahowa, ai ma galangan situtungon atap galangan pardameian, humbani banggal ni uhurni, maningon bukaon ma horbangan parhapoltakan ai bani; igalangkon ma galangan situtungonni ai atap galangan pardameianni ai, songon na binahenni bani ari Sabat. Dob ai luar ma ia, anjaha dob luar ia, tutupon ma horbangan ai.
13Maningon pasirsironni do sada anak ni biribiri, na marumur satahun anjaha na so martikas, bahen galangan situtungon ari-ari bani Jahowa; siap sogod do ai pasirsironni.
14Anjaha maningon pasirsironni do galangan sipanganon pangkasomani ni ai ganup sogod, ai ma saparonom epa anjaha minak sapartolu hin pangarbahi ni nitak bahen galangan sipanganon bani Jahowa; ai ma aturan na totap sadokah ni dokahni bani galangan siganup ari ai.
15Sonai ma pasirsiron anak ni biribiri ai, galangan sipanganon ai ampa minak ai siap sogod bahen galangan situtungon marturut-turut.”
Aturan Pasal Tanoh Parbagianan ni Raja
16Sonon do hata ni Tuhan Jahowa, “Anggo sihol marsibere-bere raja ai humbani parbagiananni hubani anakni, gabe anakni ai ma simada ai, gabe tean-teananni ma ai.
17Tapi anggo marsibere-bere ia humbani parbagiananni hubani juakjuakni, gabe ia ma simada ai ronsi tahun haluahon hansa; dob ai paulakon do ai bani raja ai; pitah anakni do na boi totap marbagian bani tean-teanan.
18Seng bulih buaton ni raja humbani parbagianan ni rayat marhitei na mangusir sidea humbani parbagiananni; humbani bagianni ma ibere hubani anakni, ase ulang adong humbani bangsang-Ku na hona usir humbani parbagiananni.”
Pasal Dapur Panlompahan
19Dob ai ibobai ma ahu humbani dalan hamasukan ai, ai ma na bani lambung ni horbangan ai, dompak kamar-kamar ni malim na mapansing ai, ai ma na hampit utara ai; anjaha tonggor ma, adong do sada ianan ijai tang hampit ujung parhasundutan.
20Jadi nini ma dompak ahu, “On ma ianan bani malim manlompah galangan parsalahan ampa galangan pardousaon, anjaha ianan ni sidea pamasak galangan sipanganon, ase ulang iboan sidea ai hu alaman pardarat ai, gabe marhitei ai mandipar na mapansing bani halak na mabuei ai.”
21Dob ai iboan ma ahu hu alaman pardarat ai, anjaha ibobai ma ahu hubani haompatsi suhi-suhi ni alaman ai; anjaha tonggor ma, bani ganup suhi-suhi ni alaman ai adong do sada alaman;
22etek do alaman na bani na ompat suhi-suhi ni alaman ai, ompat puluh asta ganjangni, anjaha tolu puluh asta bolagni; haompatsi ai dos do sibaranni.
23Adong do tembok na etek-etek bani na ompat alaman ai inggot, anjaha i toruh ni tembok ai inggot ipauli do tataring.
24Jadi nini ma hu bangku, “On ma dapur ianan ni siparugas i Rumah Panumbahan manlompah galangan sisayaton ni halak simbuei.”