Dual PanelSion, Huta Pamatang ni Harajaon Hadameion na Sihol Roh in
1Hata na nididah ni si Jesaya, anak ni si Amos pasal Juda pakon Jerusalem.
2Masa do bani panorang parpudi, totap ma pajonamon dolog ni rumah ni Jahowa bani pakpak ni dolog-dolog, gijangan humbani buntu-buntu; jadi marodor ma sagala bangsa parbegu roh hujai,
3anjaha buei do bangsa-bangsa bingkat hujai, nini, “Eta, tangkog ma hita hu dolog ni Jahowa, hu rumah ni Naibata ni si Jakob, ase iajarhon banta sagala dalan-Ni anjaha mardalan hita bani lapang-Ni. Ai hun Sion do harohan ni titah, anjaha hata ni Jahowa hun Jerusalem.
4Jadi Ia ma manguhum i tongah-tongah ni bangsa parbegu anjaha na padalan uhum bani buei bangsa. Jadi patopahonon ni sidea ma podangni gabe mata ni tinggala, anjaha tanja ni sidea gabe sasabi. Seng be sintakon ni bangsa dompak bangsa podang, anjaha seng be guruhonon ni sidea hamunsuhon.
5Ale ginompar ni si Jakob, eta ma, mardalan ma hita bani sondang ni Jahowa.
6Tongon, iambukkon Ham do bangsa-Mu, ginompar ni si Jakob, ai igoki partondungon na hun hapoltakan do sidea ampa pangulpukon songon halak Palistim; sariah do sidea pakon halak na legan.
7Gok do tanoh ni sidea bani omas ampa pirak, seng tarhira arta ni sidea; gok do nagori ni sidea bani huda, anjaha seng tarbilangni garetani.
8Gok do tanohni bani sisombahon; bani jadi-jadian ni tanganni do sidea manombah, ai ma na pinauli ni jari-jarini.
9Mangunduk jolma, marrogop halak. Ulang ma marulak-ulakan uhurmu bani sidea.
10Laho ma hubagas dolog batu, ponopkon ma dirimu bani orbuk i lobei ni panonggoti ni Jahowa ampa i lobei ni hamuliaon-Ni na marhidorat in.
11Mata hagijangon ni jolma sipatoruhon do, ampa uhur hagijangon ni dalahi sipatundukon do, pitah Jahowa do na timbul bani ari ai.
12Tongon, ari ni Jahowa Zebaot maningon roh do bani ganup na mangenjeng ampa na timbul ampa bani sagala na pinagijang, ase ipatunduk,
13age bani sagala hayu ares na i Libanon, sonai bani hayu jati na i Basan;
14age bani sagala dolog na gijang ampa bani batu buntu-buntu na bolon;
15age bani ganup manara na gijang ampa bani tembok na toguh;
16age bani sagala kapal ni Tarsis ampa bani sagala na madear, na pinauli ni jolma.
17Jadi patundukon ma gijang ni uhur ni jolma, ampa pangenjengon ni dalahi, pitah Jahowa do na timbul bani ari ai.
18Sagala sisombah-sombahon masab ma.
19Jadi masuk ma halak hubagas liang ampa ruang-ruang ni tanoh halani panonggoti ni Jahowa pakon halani jombut ni hamuliaon-Ni, sanggah bingkat Ia mangkirjati tanoh on.
20Bani panorang ai iambukkon halak ma gana-ganani na humbani pirak ampa omas, ai ma na pinaulini bahen sisombahonni, igijigkon hubani ubag ampa arip-arip,
21sanggah na laho masuk hubagas liang ni dolog batu ampa bani riga ni dolog-dolog, halani panonggoti ni Jahowa pakon jombut ni hamuliaon-Ni, sanggah bingkat Ia mangkirjati tanoh on.
22Paholang hanima ma dirinima humbani jolma si parhosah marhitei igungni! Ai aha ma ia hiraon?