Dual PanelPanjahaion Pasal Partalu ni Babel
1Pangungkabon pasal halimisan laut. Songon halisungsung na marpuyuh-puyuh i tanoh dangsina, sonai do parrohni hun halimisan, humbani tanoh na majangin.
2Pangungkabon na parah do ipatalar bangku, “Sipanamun manamun, sipanaban manaban. Tangkog ho, ale Elam! Hubu ma, ale Madai! Ganup hoih-hoih parontihononku do!
3Halani ai gok do binongeihu bani na maborit, pangarouon do mandorab ahu, songon pangarouon ni parinangon na sihol tubuhan tuah; mangirput do ahu manangar ai, malitonduy mangidahsi.
4Minggot do huahap, hitir-hitir ibahen songgotni; panorang bodari na huharosuhkon, gabe hagobiron do bangku.”
5Ipasirsir sidea do sipanganon bani meja, iamparhon parmadani, mangan minum sidea. Hehe ma, ale raja-raja! Minaki gantar!
6Ai sonon do hata ni Tuhan bangku, “Lao ho, suruh parjaga marjaga, na nididahni hatahon ipatugah!
7Anggo ididah sipangajak huda na marpasangan siajak halode, siajak unta, pangkei ma itangihon ai, pangkei tumang.
8Jadi idilohon ma, ʻBani panungkir-nungkiran do ahu jongjong, Ham Tuhan, tongtong ari-ari, anjaha bani parjagaanku do ahu jongjong ganup borngin.ʼ
9Anjaha, tonggor ma, andon roh sipangajak, huda na pinasang! Jadi ibalosi, itaurhon ma, ʻDomma talu, domma talu Babel, anjaha sagala gana-gana sisombahon ni sidea domma irosaki hu tanoh.ʼ
10Ale bangsangku, na nidogei-dogei anjaha na nirojatan, na hubogei humbani Jahowa Zebaot, Naibata ni Israel, ai do hubaritahon bani nasiam.”
Panjahaion Pasal Edom
11Pangungkabon Pasal Duma. Dong do na dilo-dilo bangku hun Seir, “Ale parjaga, sonaha ma nuan borngin? Ale parjaga, sonaha ma nuan borngin?
12Nini siparjaga, ʻLaho siang ma ari, tapi homa na roh ma borngin.ʼ Anggo sihol manungkun ope nasiam, roh ma nasiam use laho manungkun.”
Panjahaion Pasal Arab
13Pangungkabon Pasal Arab. Bani harangan ni Arab ma nasiam marborngin, ale partiga-tiga ni Dedan.
14Jumpahkon nasiam ma halak na horahan, boan nasiam bah, ale parnagori Tema. Bere nasiam ma ruti bani halak na maporus.
15Ai maporus do sidea humbani podang, humbani podang na sinintak, ampa humbani sior na gistang ampa humbani jobu ni parporangan.
16Ai sonon do ihatahon Tuhan hu bangku, “Ibagas satahun nari, domu hubani tahun ni anak gajian, jadi bois ma ganup hamuliaon ni Kedar.
17Anjaha na teba humbani bilangan ni puanglima siparsior humbani halak Kedar lambin otikni ma, tongon, Jahowa Naibata ni Israel do na mangkatahon ai.”