Dual PanelHatuahon ni Bangsa ni Naibata, na dob Pinaluah
1Marmalas ni uhur ma halimisan pakon tanoh dorging-dorging, marolob-olob ma tanoh na lungun anjaha marbunga. Songon silundat ma ai marbunga, anjaha marolob-olob; tongon, marsurak-surak anjaha marolob-olob.
2Hamuliaon ni Libanon ibere do bani, sonai hajagaron ni Karmel ampa Saron. Idahon ni sidea do hamuliaon ni Jahowa, hajombuton ni Naibatanta.
3Pargogohi nasiam ma tangan na galek, patotap towod na rebad-rebad!
4Hatahon nasiam ma bani paruhur na galek, “Tenger ma uhur nasiam, ulang mabiar! Tonggor ma Naibata nasiam, roh do Ia mambalas ampa marlulu; Ia sandiri do na roh, laho paluahkon nasiam.”
5Bukaon ma ijai mata ni halak na mapitung, anjaha ungkabon pinggol ni halak na nengel;
6manlumpat-lumpat do ijai halak na repat songon ursa, anjaha marsurak-surak dilah ni halak na longah; anjaha pultak do bah i halimisan, sonai age binanga i tanoh dorging-dorging.
7Gabe tao do horsik na marohop-ohop, anjaha martubuhan bah i tanoh na horah; ianan ni sorigala hinan gabe hatubuhan ni tolong ampa arung-arung.
8Anjaha dong do ijai dalan na bolon, anjaha igoran do ai dalan na ma pansing; seng montas hunjai halak na mabutak, tapi bangsani na mandalani dalan ai do simada ai; halak na oto pe seng kahou ijai.
9Seng dong singa ijai, anjaha binatang panoroh seng montas hunjai, seng dong jumpah ai ijai; tapi halak na pinaluah do mardalan ijai. Anjaha mulak ma halak na tinobus ni Jahowa,
10roh hu Sion mandoding-doding, malas ni uhur sisadokah ni dokahni do i atas uluni. Jaloon ni sidea do hamegahon ampa malas ni uhur, tapi maporus ma pusok ni uhur ampa hoih-hoih.